Comunicación

La comunidá de blogueros en llingua asturiana ta d’elecciones. Los responsables de blogues na nuesa llingua escueyen estos díes, y hasta’l 30 de xineru, el que va ser el Meyor Blogue fechu n’asturianu del añu acabante terminar. Cuando yá pasó’l meridianu’l mes, yá son más de cuarenta los blogues n’asturianu que mandaron les sos votaciones, destcando, según declaraciones de la organización “cinco o seis blogues que se tán afitando na tiesta”.

Cada titular d’un blogue pue votar con 4, 3 y 2 puntos a los trés blogues que meyor conteníu tengan. Y con 1 puntu al blogue con meyor estética, imaxe o diseñu, pue ser a ún de los anteriores pero enxamás al propiu blogue del votante.

Los ganadores d’esta edición van recibir CDs orixinales de la cabera versión d’Ubuntu 9.10 (con tol sistema operativu n’asturianu, incluyíu l’instalador) cedíos por Softastur y el LoCo Team Asturianu, amás d’otros regalos que van desvelase bien ceo.

Na edición de 2008 resultó ganador el blogue “González y González”, quedando en segundu y tercer llugar, respectivamente, “El Xanu’l Caborniu” y “La verdá ye mentira”.

Blogue de la iniciativa

Tres la retresmisión de la gala de Nuechebona y Nuechevieya na TPA, dende’l Partíu Asturianista (PAS) denunciaron “la probe presencia de músicos asturianos nel programa especial de la última nueche del añu”.

A lo llargo la gala actuaron varios cantantes que según el PAS “teníen nula rellación con Asturies y cola so cultura, escaeciéndose l’Ente públicu de que n’Asturies tamién tenemos cantantes, gaiteros, grupos… y una música y cultura propia que no tien que ser eclipsada con cantantes de copla”.

N’otru orde de coses, el PAS pide tamién el cumplimientu de la toponimia oficial aprobada pol Gobiernu del Principáu d’Asturies, no referente a la retransmisión de las campanaes dende Rusecu, capital del conceyu de Sobrescobiu, onde la TPA “nun se digno en utilizar la toponimia oficial na so web demientres el Gobiernu d’Asturies ta en plena de supuesta promoción de la nuesa toponimia”.

Nesti añu 2010 qu’entama el PAS esixe tmaién “que la RTPA tome en serio l’usu de la toponimia oficial de los conceyos y pueblos de la nuesa comunidá”. Tamién pidieron “una mayor presencia de la llingua asturiana nel ente públicu de comunicación d’Asturies, que ye llamentablemente curtia y arrequexada a usos mui determinaos, en contra de lo que dispón l’Estatutu d’Autonomía y la Llei d’Usu del asturianu de 1998”.

La Televisión del Principáu d’Asturies (TPA) tresmitió les campanaes de fin d’añu dende Rusecu, capital del conceyu de Sobrescobiu, pa facer alcordanza de la concesión a esti conceyu del premiu al Pueblu Exemplar 2009 de la Fundación principe d’Asturies. Los vecinos d’esta población fueron de magar les 23.45 hores, los protagonistes d’una tresmisitón que presentar0n Lía Beltrán y Pachi Poncela.

La TPA entamaba 2010 coles emisiones de los conciertos ‘Diez años del Auditoriu Príncipe Felipe’, a les 10.45 cola Symphonica Toscani y l’Orfeón Donostiarra, y el Conciertu de Fin d’añu dende’l Teatru Campoamor, n’Uviéu, a les 12.15 hores.

La cobertura de la Televisión Dixital Terrestre (TDT) algama’l 97,5 por cientu de la población d’Asturies, a 105 díes del apagáu analóxicu de la señal de televisión. El datu apurriólu estos díes en Les Arriondes la Conseyera d’Alministraciones Públiques y Vocera del Gobiernu, Ana Rosa Migoya, tres la visita que fixo a la carpa que dende va unos meses percuerre Asturies pa informar sobre’l pasu a la nueva señal de televisión dixital, que va implantase de forma definitiva’l 3 d’abril de 2010.

Trátase d’un iglú nel que col eslogan de “Si no tienes TDT, mañana en tu casa nieva”, respuenden a les preguntes principales sobre qué ye la TDT, el procesu necesariu pal cambéu na recepción de la señal, la mena de conexones… Tamién s’informa sobre les ventayes de la televisión nueva, gracies a los usos y conteníos qu’ufierta.

Esta carpa xúnese a la campaña intensa fecha nos meses últimos en collaboración col Ministeriu d’Industria, Turismu y Comerciu que tamién instaló un puntu d’información n’Asturies.

Según esplicó la Conseyera, nel conceyu de Parres la cobertura de TDT algama al 99,1 por cientu de la población (5.674 habitantes) tres una inversión de 182.626 euros. Anguaño yá tán dixitalizaos tolos centros: Bode, Fíos y Llerandi.

Ivonne Reyes y Carlos Lozano van presentar la Gala de Navidá de TPA, qu’esti añu va cuntar con Isabel Pantoja y Paloma San Basilio; la intérprete de flamencu Diana Navarro; l’artista puerturriqueñu Luis Fonsi; el cantante mexicanu Alejandro Fernández; Manuel Carrasco, ex concursante d’Operación Triunfo; Raúl; el grupu de pop-rock Tennesse; el dúu Cómplices; el grupu de flamencu Son de sol; y el ganador d’Eurojunior 2005 Antonio José, ente otros.

Destaca nesta gala la falta de representantes de la música asturiana, que s’entiende pola mor de ser esti un programa de la ufierta fecha pola FORTA pa les televisiones autonómiques que nun faen producción propia pa la Nuechebona. La gala va emitise a les once la nueche y va durar 150 minutos.

Anque la idea inicial nel momentu de la fundación de la TPA, yera que los asturianos asitiaren la canal nel númberu 6 de los sos televisores (d’ehí l’asemeyu ente l’“a” del llogotipu y esti númberu), l’apaición de la canal estatal “laSexta” fizo que la dirección del Ente escaeciera esta idea bien pronto. Agora, y dende ayeri llunes, TPA cambia la so idea incial sumando al llogotipu de les sos canales na TDT un 7 y un 8 respectivamente.

El nuevu diseñu ye una evolución de les mosques actuales TPA y TPA 2 qu’estremará les dos canales de TDT colos símbolos A7 y A8 pa, según l’Ente “facilitar el so sintonización nes posiciones 7 y 8 de les canales de la televisión”. Esta anovación tien como oxetivu “tresmitir la marca la TPA de manera más visible, simple y efectiva, una vez qu’ésta yá ye conocida pola audiencia dempués de más de trés años d’emisión”.

La tipografía camuda a una fonte “nuezeit” con formes más arredondidar que tresmiten, según comenten “una mayor calidez”. Amás introduzse el color verde na mosca A8, en dos games de color asemeyaes a les que s’utilicen col azul actual.

Les nueves mosques completar el procesu d’anovación d’imaxe corporativa que la televisión autonómica yá empecipió’l pasáu mes de setiembre y que ta patente nos identificativos de la cadena, autopromociones, el periódicu dixital www.rtpa.es, según nel nuevu decoráu de TPA Noticies. Los llogotipos A7 y A8 desenrrollólos el departamentu de Grafismu de TPA, embaxo la dirección y supervisión del diseñador Fernando Gutiérrez.

Llinia gráfica inicial de TPA, que proponía da-y la vuelta al llogotipu (a > e) pa les emisiones n’asturianu

La Fundación Asturias Film Commisssion organiza un cursu de formación ocupacional sobre periodismu dixital destináu a desempleaos. Va entamar el 28 d’avientu, terminando’l 31 de marzu de 2010, impartiéndose les clases de 15:00 a 20:30 hores, sumando un total de 354. Les clases van repartise ente Uviéu y Llangréu.

Pa más información pue llamase al teléfonu 656 827 309 o escribir a info@asturiasfilmcommission.com

Radio Nava, emisora de l’Asociación Aupate, organiza un maratón de radio los díes 11,12 y 13 d’avientu. Una actividá que lleven faciendo más de diez aós y qu’acerca la creatividá de la radio alternativa a los oyentes del 108.0 FM na Comarca la Sidra y al traviés d’internet na so web.

Na mesma pueden participar otres radios llibres, asociaciones, ONGs, asociaciones…

Los interesaos pueden ponese en contactu nel corréu aupateradionava@telefonica.net o na cai Prau Llamargón 15 de Nava, amás de los teléfonos: 985 716 268 y 985 716 127 y 651 893 980.

www.radionava.org

La Xunta pola Defensa de la Llingua Asturiana (XDLA), depués de la presentación de la campaña institucional de promoción de la toponimia asturiana, unvió cartes, tanto al director de la RTPA, José Ramón Pérez Ornia, como a la directora xeneral de Política Llingüística, Consuelo Vega, pidiendo que nel ente públicu de comunicación, atendiendo a la so importancia como vehículu normalizador, s’usen de manera sistemática na programación los topónimos oficiales.

El procesu de recuperación que ta faciendo la Xunta de Toponimia, que tien como remate llegal l’aprobación en Conseyu de Gobiernu y la publicación consiguiente de los decretos d’oficialización nel Boletín Oficial del Principáu d’Asturies, nun ta cumpliendo les espectatives que despertó en cuantes a la so aplicación porque l’Alministración autonómica y los organismos dependientes d’ella nun tán usando esa toponimia oficial. A pesar de que les campañes oficiales dicen que «agora son oficiales, agora usalos ye lo normal», la realidá ye mui distinta. Y la RTPA ye un exemplu sintomáticu d’esa contradicción. La sida de la «adecuación progresiva» podría entendese pa cuestiones como la renovación física de rótulos y señales, pero non pal usu inmediatu de manera oral o escrita, más cuando dellos decretos toponímicos lleven cuatro años en vigor.

Trataríase, ensin más, de dar instrucciones concretes y facilitar los decretos d’oficialización toponímica a los responsables de la TPA.

La Radio Televisión del Principáu d’Asturies, como organismo públicu dependiente del Gobiernu asturianu, tendría qu’aplicar dafechu la llegalidá vixente en materia de toponimia, pero tamos viendo que nun ye asina. Nos servicios informativos delles veces úsense les formes oficiales nos lletreros qu’acompañen la información, pero mui poques veces s’usen de forma oral. Na carta al director de la RTPA, la XDLA píde-y que faiga llegar «tanto a los servicios informativos como a les productores de programes los decretos d’oficialización toponímica existentes y los que se vaigan publicando nel BOPA, de la mesma manera que s’apliquen al detalle les circulares del Gobiernu n’otres cuestiones. Ye inaceptable qu’un ente autonómicu como la TPA nun siga la llegalidá vixente de manera escupulosa». Tamién se-y faen delles suxerencies: «La toponimia oficial habría respetase na programación en castellanu tanto en rótulos como nel usu oral. Nel casu de los topónimos que s’aprobaron con una forma doble (Gijón/Xixón, Llangréu/Langreo, Cangues d’Onís/Cangas de Onís, etc.) sería absurdo usalos d’esa manera oralmente y, nesi casu, por una cuestión de discriminación positiva, paeznos habría qu’usar la forma asturiana, que ye la que se quier recuperar, porque si non quedaría condenada a que nunca se pronunciare na televisión y la radio públiques».

Na carta a Consuelo Vega, recuérdase-y que «como responsable de la política llingüística», tien que tomar «les midíes que faigan falta pa que’l Gobiernu dea instrucciones al ente de radiotelevisión pa que s’aplique d’una vez por toes la llegalidá vixente».

El númberu 34 de la revista El Súmmum, publicación de cultura, ociu y tendencies editada por Publicaciones Ámbitu, ta acabante salir a la cai. Dende’l so nacimientu, la revista cuenta con delles de les firmes más importantes de la cultura asturiana, tanto nel tarrén lliterariu como nel gráficu y caracterízase pola atención que-y presta a cualquier tipu de fenómenu cultural.

El númberu qu’agora llega a los puntos de distribución avezaos cuenta con una interesante conversación ente Antón García y Xuan Bello, dos de los nomes más importantes de la lliteratura asturiana de los nuestros díes, onde falen de les sos obres, la so influencia y la visión que caún tien de la cultura del país. Amás, Manolo D. Abad y Eduardo Carruébano falen de les sos esperiencies nel Festival Internacional de Benicássim, y Jesús Palacios fai un análisis fonderu de la vida y la obra d’Aleksei Balabanov, ún de los cineastes invitaos a la edición d’esti añu de FICXixón.

Sergio Rodríguez cuenta cómo foron les sesiones de grabación del últimu discu de Dixebra, Amor incendiariu, nun artículu bien estensu illustráu con fotos d’Alejandro Braña. L’apartáu gráficu cuenta coles aportaciones d’Isabel Marqués y Marco Villabrille, que publiquen una muestra de los sos últimos trabayos, y la memoria histórica tamién ta presente gracies a la firma de Xosé Miguel Suárez, qu’escribe sobre la Biblioteca Popular Circulante de Castripol. Los últimos discos de Nacho Vegas o Dr. Líbido, el llibru Incendiarios de ídolos o un adelantu de la próxima obra de Ramón Lluís Bande, Historia de un árbol (con ilustraciones de Francisco Pimiango), tamién tienen sitiu nes páxines de la revista.