Comunicación

Esti llunes, 20 de setiembre, presentóse nel dial 107.5 de Radio Narcea, y tamién n’Internet al traviés de Narceadigital.com, el programa radiofónicu “Regudixu”, un espaciu d’actualidá cultural qu’axunta anuncies varies, entrevistes a personaxes del conceyu de Cangas, música, lliteratura, etc.

El programa va poder sentise nel dial 107.4 de Radio Narcea, tolos llunes y xueves a les 11 la mañana.

Radio Narcea al traviés d’internet

Esti sábadu día 11, a las 10:40 hores, el programa “Nós” de la TPA que dirixe y presenta Próspero Morán dedícase dafechu a la primer edición de la Universidá Asturiana de Branu (UABRA) que tuviere llugar en Cangas del Narcea na primer quincena d’agostu.

El programa percorre les instalaciones de la Escuela Hogar de Cangas y adientrase nes clases onde más d’un cientu d’alumnos siguieron delles enseñances a lo llargo de dos selmanes.

Les aules normales, les d’informática, la xinta, les actividaes culturales y los participantes na UABRA son protagonistes a los llargo de diez minutos nesti espaciu de la TPA que fina copn esti programa la so tercer temporada.

Nos cursos participaron más d’un centenar de persones nos niveles que s’impartieron: Cursu Elemental de Llingua Asturiana, Cursu Avanzáu de Llingua Asturiana, Cursu de Capacitación pa la Traducción al Asturianu, los Cursos d’Afondamientu Cultural y Llingüísticu Internet y asturianu: aplicaciones socio-educatives, Cursu d’averamientu a la llocución periodística en llingua asturiana, Cantares, bailles ya instrumentos musicales asturianos, La lliteratura asturiana nel aula d’Educación Primaria y Cursu d’aniciu a la investigación dialeutal, toponímica y de tradición oral y la segunda fase del Curso de Capacitación en Gallego-Asturiano.

L’asociación de Moscones en Xixón asoleyó les bases de la edición quinta del so concursu pa trabayos periodísticos, nel que se pue participar con artículos, reportaxes, entrevistes, cróniques o cartes, escritos en castellán o n’asturianu. La obra ha tar asoleyada en dalgún mediu del estáu español ente l’1 de xineru y el 31 d’avientu de 2010. Como escepción, tamién pueden optar premiu los trabayos que nun ten publicaos, y nesi casu, Moscones en Xixón encargaríase d’asoleyalu. L’únicu requisitu en relación al tema, ye que contribuya a esparder y resaltar los valores culturales, cívicos y éticos del conceyu de Grau.

El premiu va a ser de 1.200 euros, pero podrá declarase ermu. Los trabayos han presentase per triplicao nel llar de l’asociación que ta na cai Ezcurdia de Xixón. Han llevar certificáu de la empresa que lo publicare si l’artículu ta ensin firmar o firmaú con nomatu, y si ye posible, acompañar la documentación d’un curriculum. El fallu va asoleyase enantes del mes de marzu. Pueden vese les bases completes na páxina web del Ayntamientu de Grau, que tamién collabora nel concursu.

El programa de la Radio del Principáu d’Asturies (RPA) Rockmería, que ta dirixíu y presentáu por Xune Elipe y que s’emite na nueche del xueves al vienres, n’horariu de 00:00 a 1:00 hores, va dedicase esta selmana a la I Nueche Celta de Corao, celebrada nel añu 1983.

La Nueche Celta de Corao, de la que se celebraron dos ediciones nos años 1983 y 1984, foi’l primer festival con esa denominación que s’entamó n’Asturies, y qu’axuntó a un bon númberu de públicu interesáu pol folk y la música tradicional de lo que daquella escomenzaba a conocese como Mundu Celta. La repercusión mediática que tuvo foi pergrande, y el so esquema y característiques dio orixe a una tradición de nueches celtes que s’espardieron per cuasi tola xeografía asturiana. Aquel modelu de festival n’entornos afayadizos (el de Corao facíase nun castañéu) diba marcar fondamente los alcuentros posteriores d’esti carácter.

El programa va tener como invitáu a Ignaciu Llope, escritor, críticu musical y estudiosu del fenómenu musical asturianu y del celtismu modernu. Pertenez al conseyu de redacción de la revista Asturies. Memoria encesa d’un país y ye collaborador d’otres publicaciones como l’Anuariu de la Música Asturiana, Interfolk o Atlántica XXII.

La II Gala Xixón Fala, na que participaron Rafa Lorenzo, Chus Pedro, Manolo Penayos y dixebra xunta cantantes de tonada, actores y monologuistes, el pasáu Avientu nel teatru Xovellanos, ye la protagonista del espaciu “Nós” qu’emite los sábados la TPA y dirixe y presenta’l periodista Próspero Morán.

El programa recueye les actuaciones cimeres d’aquella nuechi d’Iviernu, nun programa de diez minutos de duración que s’emite al meudía de la xornada del sábadu, magar ya camudare delles vegaes d’horariu, lo que fai necesario cofnirmar la emisión na web de la TPA cada selmana.

Unidá Nacionalista Asturiana vieno acabante felicitar a la comunidá Ubuntu-ast que’l pasáu 17 d’agostu algamó’l caráuter de comunidá Ubuntu oficial, tres les comunidaes en castellanu y catalán. Dende UNA vuelven a instar a toles alministraciones a qu’apuesten pol software llibre, tanto como midida d’aforru frente al pagamientu de llicencies como pol encontu que supondría pa una industria emerxente n’Asturies y dinamizadora de la economía como ye’l desendolcu de software llibre.

Faustino Zapico como portavoz d’UNA treslladó la felicitación “a la comunidá d’Ubuntu n’asturianu, pola so reconocencia como comunidá oficial d’esti sistema operativu gratuitu, detrás de les comunidaes en castellanu y catalán”. Pa UNA ye decepcionante que “los mayores éxitos na normalización de la nuesa llingua tengan que llegar ensin el mínimu encontu de les instituciones”, pero al empar ye una muestra de “la potencialidá de la nuesa llingua como erbía de futuru, a pesar de toles estorbises que quiera poner el gobiernu asturianu pa ello, y demuestra bien a les clares que la sociedá asturiana quier entrar nel sieglu XXI cola so llingua al nivel de cualquier otru idioma”.

Dende UNA ínstase nuevamente a “toles alministraciones asturianes a manda-y al software llibre” porque ello supón “una importante midida d’aforru frente al costu de tener que pagar llicencies de caráuter priváu, lo que nuna dómina de crisis como ésta, habría ser totalmente prioritariu” y tamién porque tal midida supondría “un fuerte sofitu a una industria emerxente y que xenera puestos de trabayu estables d’altu valor amestáu, como ye’l desendolcu del software llibre, una de les industries básiques na economía del sector de les tecnoloxíes de la información y comunicación, y con meyores perspectives de medria” señaló Faustino Zapico.

UNA considera que “el gobiernu asturianu ta a años lluz de la sociedá asturiana, qu’apuesta por una economía productiva a nivel internacional y non pola subvención pola subvención, y onde l’asturianu ye un elementu arriquecedor y diferenciador pa ganar en competitividá frente al sucursalismu de la política económica del gobiernu asturianu del PSOE ya IU frente al gobiernu Zapatero” lo qu’ensin dulda “ye una muestra más del fin d’esti ciclu políticu protagonizáu por PSOE ya IU, que nos fixo perder el nuesu pesu económicu y escaecenos de la nuesa identidᔠconcluyó Faustino Zapico.

La comunidá Ubuntu-ast que vieno acabante recibir el caráuter de comunidá Ubuntu oficial, tres les comunidaes en castellanu y catalán, protagoniza la emisión, esti domingu 29 a les 10,45, del programa en llingua asturiana de la TPA “Nós” que dirixe y presenta’l director d’Asturnews, Próspero Morán.

El programa recueye les actividaes d’instalación llibre d’Ubuntu desendolcaes na pasada Selmana Negra y avérase a les novedaes que tapresentando esti añu y va peresentar darréu la versión d’Ubuntu en Llingua Asturiana.

La emisión de la carrera de Fórmula 1 de Spa en Bélxica fai necesario que los interesaos en seguir el programa tean atentos a los cambios de les hores d’emisión que se producen los fines de selmana nos que la TPA emite les carreres de Formula 1.

Según vieno acabante denunciar la Xunta pola Defensa de la Llingua, La RTPA (Radio Televisión del Principáu d’Asturies) lleva más de cuatro meses negándose a entregar los informes solicitaos pola Procuraduría Xeneral d’Asturies sobre’l tratamientu de marxinación que carez la llingua asturiana na so programación.

Dende la oficina de la Procuradora Xeneral confirman que yá solicitaron los citaos informes en dos ocasiones y nun tuvieron rempuesta dala.

La Xunta pola Defensa de la Llingua Asturiana (XDLA) entamó va dellos meses una campaña per Internet pa pidir a los miembros de la dirección de la RTPA más programación n’asturianu, con meyores horarios y más amplitú temática, y el respetu a la toponimia oficial na programación en castellanu. Según asoleya nuna nota de prensa, la Xunta ufrió “un modelu de carta y les señes de corréu electrónicu de la dirección de la RTPA a les que la mandar. Gracies a la iniciativa tamos pudiendo ver cómo, hasta’l día de güei, son más de 5.000 los mails qu’aportaron a les diferentes cuentes de los dirixentes del serviciu públicu de televisión d’Asturies. La XDLA quier agradecer l’ésitu d’esta campaña a toles persones que participaron nella”.

De la mesma manera fain anuncia de “qu’esta campaña sigue activa pa toles persones que quieran sumase y, amás, completóse cola presentación d’una quexa oficial énte la Procuradora Xeneral d’Asturies, que tien ente les sos funciones la defensa de los derechos de la ciudadanía asturiana y el cumplimientu de les disposiciones llegales d’ámbitu autonómicu, estatal y européu. En cumplimientu d’estes funciones la Procuraduría solicitó delles veces la documentación pertinente al Ente Públicu RTPA, pero esti, en rebeldía contra les instituciones democrátiques y les disposiciones de la llexislación vixente, niégase sistemáticamente a la entrega d’información y al cumplimientu de la llegalidá”.

Por mor d’esto, dende la Xunta pídese “una actuación contundente dende les instituciones encargaes de velar polos derechos cívicos y pol cumplimientu de les disposiciones llegales asturianes, estatales y europees”.

La etnógrafa asturiana Fe Santoveña protagoniza esti sábadu al meudía la emisión del programa “Nós” de la TPA que dirixe y presenta’l director d’Asturnews.com, Próspero Morán.

La llicenciada en historia d’orixen llaniscu foi cofundadora del Coleutivu Muyeres, delegada d’Asturies nel Festival Intercélticu de Lorient ya investigadora en dellos ámbitos de la etnografía y la cultura tradicional d’Asturies.

Nel programa de la TPA ufrirá un repasu a toles estayes de la so actividça dende ne4ña, con un especial envís na etnografía y la danza, que l¡’acompañaren dende la nacencia.

El II Festival Beltaine que tuvo llugar en xunetu n’Avilés esti 2010, per segunda vegada, va ser el protagonista de la emisión esti sábadu del programa Nós qu’emite al mediudía la TPA.

Nel espaciu fadráse un percorríu pel festival, dende la xornada d’aniciu de la programación del mesmu a los pasacais diarios ensin escaecer les esposiciones y los conciertos que compuxeron esti segundu Festival Beltaine.

Nós, espaciu dirixíu y presentáu pol periodista y profesor universitariu Próspero Morán, emítese tamién pol satélite Hispasat pal restu d’España, Europa y América y por Internet para tol mundiu al traviés de la web de la RTPA.