Comunicación

Antonio Virgili, director xeneral de la RTPA, contestó a la carta que-y mandare la Xunta pola Defensa de la Llingua Asturiana (XDLA) el primeru de febreru pasáu pidiendo que se respetare la llegalidá toponímica nes sos emisiones. Na contestación, Virgili declárase «consciente» del llabor del Ente Públicu como divulgador y promotor de la cultura y la llingua asturiana. Aclaria qu’en tou momentu remitiéronse al usu de les formes oficiales qu’apaecen nel BOPA, pero que «pa una mayor seguridá» treslladó l’escritu de la XDLA a tolos programes ya informativos de la Televisión y la Radio del Principáu d’Asturies pa que revisen l’usu que tán faciendo.

El director de la RTPA agradez les suxerencies que-y faiga la XDLA «p’ayudar a detectar posibles errores».

La XDLA denunciaba na carta que nos informativos de la televisión delles veces usen les formes oficiales nos lletreros qu’acompañen la información y otres non, y que los presentadores poques veces usen oralmente la forma oficial. Lo mesmo asocede colos demás programes en cuantes al respetu a la llegalidá en toponimia. Na radio, l’usu de les formes oficiales ye nulu (nun siendo les formes que coinciden, evidentemente). Tamién se-y suxería al director de la RTPA que, atendiendo a un criteriu de normalización básicu, nel casu de los topónimos que s’aprobaron con una forma doble (Gijón/Xixón, Llangréu/Langreo, etc.) sería aconseyable usar la forma asturiana oralmente porque’l doblete sería absurdu nesa situación. «Usar namás la forma castellana implicaría la condena a que nunca s’oyera na televisión y la radio públiques la forma que se quier recuperar», dicíase na carta unviada a Antonio Virgili.

La XDLA agradez l’actitú collaboradora del director de la RTPA, anque va tar atenta al cumplimientu del compromisu que fai na so carta, amás d’aprovechar p’animar públicamente a los telespectadores y radioyentes a que faigan llegar al Ente Públicu los errores que detecten nes sos emisiones. Como esplicaba la XDLA na so carta, «la oficialización nel BOPA de les denominaciones de les entidaes de población implica qu’estes s’usen siempre, oralmente y nes rotulaciones, independientemente de la llingua na que se faigan los programes».

La Xunta pola Defensa de la Llingua Asturiana (XDLA) dio anuncia de que ta acabante unviar cartes, tanto al director de la RTPA, Antonio Virgili, como a la directora xeneral de Política Llingüística, Ana Fueyo Llaneza, pidiendo que nel ente públicu de comunicación, atendiendo a la so importancia como vehículu normalizador, s’usen de manera sistemática na programación los topónimos oficiales. El procesu de recuperación que ta faciendo la Xunta de Toponimia, qu’entamó nel añu 2005 y que tien como remate llegal l’aprobación en Conseyu de Gobiernu y la publicación consiguiente de los decretos d’oficialización nel Boletín Oficial del Principáu d’Asturies, “queda en papel moyao porque l’Alministración autonómica y los organismos dependientes d’ella nun tán usando esa toponimia oficial”, esplica la organización.

Como vien denunciando la XDLA, “por desgracia, ensin el menor resultáu positivu”, afirmen, “la RTPA ye un exemplu sintomáticu d’esa contradicción ente la llegalidá y la realidá”. “Na televisión delles veces úsense les formes oficiales nos lletreros qu’acompañen la información y otres non, y los presentadores poques veces usen oralmente la forma oficial”, denuncien dende la Xunta. Como exemplu, “na información meteorolóxica, les denominaciones de les capitales de conceyos nun se correspuenden con exactitú coles oficiales y hasta s’usen formes dobles en casos que s’oficializó namás la forma asturiana”. No que cinca a la radio “l’usu de les formes oficiales ye nulu (nun siendo les formes que coinciden, evidentemente)”.

Na carta al director de la RTPA, la XDLA recuérda-y que «la oficialización nel BOPA de les denominaciones de les entidaes de población implica qu’estes s’usen siempre, oralmente y nes rotulaciones, independientemente de la llingua na que se faigan los programes». Por eso, píde-y que «tresmita tanto a los servicios informativos como a les productores d’otros programes los decretos d’oficialización toponímica existentes y los que se vaigan publicando nel BOPA». A la XDLA, paez-y «inaceptable que la RTPA nun siga la llegalidá vixente en materia de toponimia de manera escupulosa». Tamién se-y faen delles suxerencies, yá feches años atrás y desatendíes pol so predecesor nel cargu: «Atendiendo a un criteriu de normalización básicu, nel casu de los topónimos que s’aprobaron con una forma doble (Gijón/Xixón, Llangréu/Langreo, etc.) sería aconseyable usar la forma asturiana oralmente porque’l doblete sería absurdu nesa situación. Usar namás la forma castellana implicaría la condena a que nunca s’oyera na televisión y la radio públiques la forma que se quier recuperar».

Na carta a la directora de Política Llingüística, Ana Fueyo Llaneza, la XDLA diz-y que «la sida de la “adecuación progresiva” podía entendese pa la renovación d’un lletreru de carretera pero non pal usu oral o escritu inmediatu». Por eso, reclámase qu’intervenga pa que se tomen les midíes pa que la radiotelevisión pública respete la llegalidá vixente.

Otra manera, tamién se-y recuerda a la directora xeneral de Política Llingüística’l so compromisu de poner a andar otra vez la Xunta de Toponimia y por eso se-y pide qu’entaíne col procesu d’oficialización, porque dende’l mes d’agostu del añu pasáu, cola aprobación de la toponimia d’Illas, nun hubo más novedaes nel Conseyu de Gobiernu nesta materia.

El próximu 1 de marzu va entamar una segunda edición del Máster en Social Media Management (xestión de redes sociales) entamáu pola Cámara de Comerciu de Xixón y Comunicación Profesional. Cola esperiencia compartida polos venti alumnos de la edición en marcha, presenten una nueva oportunidá de recibir la única acción formativa n’Asturies, que da títulu propiu de la Cámara de Comerciu de Xixón, con 120 hores de formación presencial (n’horarios de 16.30 a 20.30 los xueves y vienres), 8 hores de Masterclass, 250 hores de práctiques y Trabayu Fin de Máster sobre empreses reales de referencia y trabayu empobináu, al traviés de tutoríes y preceptuaciones.

El so director, Rubén Martín-Llames muéstrase “percontentu” cola primer edición “agotó toles places y eso quier dicir, per un llau, que hai interés nesta materia y col respaldu de ser un títulu propiu de la Cámara de Comercio de Xixón y, per otru, el fechu de que el 70% de los alumnos vengan d’empreses amuesa que ente’l empresariau asturianu demándase el conocimientu en Redes Sociales”, esplica.

Llames comenta qu’esta edición segunda “sigue la llinia de l’anterior con dalguna modificación frutu de la esperiencia, per exemplu toos aquellos profesores que nun puntuaren per enriba de 4 (sobre un máximu de 5) nes encuestes de calidá pasaes ente’l alumnáu nun repiten”. Ente’l profesoráu, esplica’l director de Máster, “va cuntase con clases especiales con xente como Gustavo Entrala, que-y fizo la cuenta Twitter al Papa, entre otres xeres, Carlos Gutierrez, que ye la Social Media Manager d’American Abroad for Obama na recién campaña presidencial o Xavier Marín el Social Media Strategist del Banco Sabadell, ente otros”.

Más información sobre’l máster

La entrega octava d’Iniciativa pol Asturinau nes ondes, programa de la organización omónima, inclúi una entrevista na que Francisco Álvarez fala del llibru “Un país llamáu Dixebra”, otra con Montse Machicado, de la Estaya de Llingua d’Avilés, falando de la campaña pal cambiu de nome y apellíos al asturianu, y una tercera de Diana Alba de la web del occidente d’Asturies, Qué Femos. Amás, como siempres l’editorial y la clas d’asturianu.

Sienti’l programa n’Ivoox

La mala situación económica de la emisora n’asturianu Radio Sele, fai necesario recaldar fondos. Por ello, los grupos Skama la Rede, La Tarrancha y La Curuxa van dar un conciertu’l sábadu 26 de xineru a les ocho la tarde. Les actuaciones sedrán n’Antigua Estación d’Uviéu con un bonu d’ayuda de 6 euros como entrada destinada a atropar fondos económicos. Radio Sele informó que pa caltener esta radio comunitaria ye necesario cuntar con fondos por 6.000 euros al añu, de los que lleven atropaos dalgo más de 1.500. Piden donaciones na cuenta de l’Asociación Cultural Secha na Caxa Rural 3059 0001 18 2366328629.

Va unes selmanes que Les Noticies pesllaba la so actividá como diariu dixital, dempués de que va cuasi un añu acabara cola so edición en papel. Coincidiendo cola fin de la so actividá Publicaciones Ámitu estrena “Les Noticies, 15 años de periodismu n’asturianu”, un documental dirixíu por Alberto Suárez, nel que se recueyen los testimonios y opinones de personalidaes de dellos ámbitos de la sociedá civil y representantes institucionales a la manera de valoraciones sobre’l papel qu’ellos y elles creen que desendolcó Les Noticies na normalización y promoción del asturianu.

Nel documental participen nel documental, ente otros munchos, Antonio Trevín, ex-presidente d’Asturies; Graciano García, director eméritu de la Fundación Principe d’Asturies; Xuan Xosé Sánchez Vicente, ex-diputáu y fundador de Conceyu Bable; Manuel De la Cera, ex-conseyeru de Cultura del Gobiernu d’Asturies; Roberto González-Quevedo, secretariu de l’ALLA; Ramón d’Andrés, ex-xefe de la Oficina de Política Llingüística; Antonio Virgili, director xeneral de RTPA; Íñigo Noriega, director d’El Comercio; o Lisardo Lombardía, director del Festival Intercélticu de Lorient; amas d’una representación bie amplia del mundu cultural, académicu y social asturianista.

Ver documental

L’historietista asturianu Alfonso Zapico, premiu nacional recién de Cómic 2102, ye l’autor de la obra que va sirvir d’imaxe pa la decimocuarta edición del Congresu de Periodismu Dixital, que se va desenvolver nel Palaciu de Congresos d’Huesca ente los díes 14 y 15 de marzu de 2013. El Congresu de Periodismu Dixital ta entamáu l’Asociación de Periodistes d’Aragón y el Conceyu d’Huesca y cuenta cola collaboración de Gobiernu d’Aragón, Ibercaja, Diputación Provincial d’Huesca, Telefónica y Conceyu d’Huesca.

La previsión de losorganizadores ye qu’asistan más de 300 periodistes a un eventu que se convirtió nuna cita clásica onde s’axunten los meyores especialistes de medios dixitales d’España y Llatinoamérica. Como n’ediciones anteriores, el día 13 de marzu, víspora del congresu, van axuntase na ciudá los responsables d’alredor de 50 medios dixitales nun ‘workshop’ a puerta zarrada. Los comenenciudos en participar na edición de 2013 van poder facer la inscripción a partir del día 15 de xineru na páxina web del congresu.

Alfonso Zapico (Blimea, Samartín del Rei Aurelio, 1981) ye un historietista y ilustrador asturianu que trabaya fundamentalmente pal mercáu francu-belga y qu’esti añu 2012 algamó cola so novela gráfica Dublinés el Premiu Nacional de Cómic.

En faciendo los estudios d’ilustración y diseñu na escuela d’arte d’Uviéu, los sos primeros trabayos profesionales nel mundu del cómic vieron la lluz en Francia: La guerre du professeur Bertenev (Editions Paquet, 2006), ambientada na guerra de Crimea y que recibió’l Prix BD Romanesque nel FestiBD Ville de Moulins nel 2007, y el volume colectivo Un jour de mai.Nel 2008 publicó Café Budapest, qu’enceta’l conflictu árabe-israelín y que foi editáu n’España por Astiberri y en Polonia (Timof). En xunu de 2008 algamaría’l Premiu Haxtur al meyor guion. Amás de cómic, realiza trabayos gráficos pa diverses editoriales. Collabora coles mesmes col diariu La Nueva España y otros periódicos rexonales, y facer cola revista de cómic n’asturianu El Gomeru.

A partir del mes d’ochobre de 2008 empezó a collaborar col selmanariu Les Notícies con una tira titulada Les Pites de Grau, que sustituyó al espaciu qu’ocupaba otru dibuxante asturianu pernomáu, Ruma Barberu. N’agostu de 2008 llogró una beca otorgada pol Festival de la historieta de Angulema que-y dexó morar nel so célebre Maison deas auteurs hasta 2011.

En 2010, llogró’l Premiu Josep Toutain al Autor Revelación nel Salón del Cómic de Barcelona por La guerra del profesor Bertenev, editáu n’España por Dolmen.

La emisora Radio Sele pasar per importantes dificultaes económiques que faen que-yos seya complicao pagar el llocal y otros gastos. Los interesaos en collaborar económicamente con Radio Sele, pueden facelo na cuenta d’Asociación Cultural Secha (Caxa Rural): 2059 0001 18 2366328629.

Radio Sele emite n’asturianu dende Uviéu y dende febreru de 1986. En 1999 dieron-y llicencia comercial baxo’l gobiernu de Sergio Marqués colo que pudo ampliar la so cobertura, anque un par d’años dempués, tres de que Vicente Álvarez Areces algamara la presidencia asturiana, quitó-yosla acordies con un recursu empobináu por otra empresa asturiana. Anque Radio Sele venció nos tribunales, nun recuperó l’espaciu.

Páxina de Radio Sele

El BOPA yá espublizó la resolución de les ayudes al usu del asturianu nos medios de comunicación. 127.79,45 euros a repartir ente medios dixitales, en papel, radios, televisiones y revistes, p’afalar l’usu del asturianu.

Decretu nel BOPA

Iniciativa pol Asturianu vien de solicitar a la direutora nueva de RTVE n’Asturies, Patricia Álvarez Ramos, un conceyu pa proponer la inclusión del asturianu dientro de la cobertura informativa p’Asturies y pa tratar cuestiones rellatives al usu toponímicu y llingüísticu que se fai na Radio Televisión Pública. La petición coincide con que TVE ta acabante presentar un informativu diariu d’ocho minutos, complementariu a Panorama Regional, “nel qu’otra vuelta la llingua vehicular ye’l castellán”, espliquen dende Iniciativa pol Asturianu.

Dende la organización creen “qu’esti podría ser un bon espaciu pal emplegu del idioma asturianu con total normalidá y una amuesa al ente de comunicación públicu de la demanda qu’hai d’esti tipu de conteníos”, ausentes de la cadena pública dende la esperiencia pilotu nel yá mentáu Panorama Regional.

D’otra miente, dende Iniciativa pol Asturianu esperen que la respuesta de la Directora “seya positiva y podamos sentir l’asturianu na cadena pública española” dempués d’años de lo que califiquen como “ausencia inxustificable”.