Comunicación

Iniciativa pol Asturianu nes ondes, programa de radio d’esta organización, suma una emisora más a la so rede de difusión, que suma yá trece medios. Esti ye’l primeru que va llevar el programa hasta l’occidente d’Asturies. El programa va poder sentise tolos miércoles a les 23:30 y los sábados a les 14 hores, nel 107.5 de la FM.

Amás d’esta nueva radio emítese tamién en Radio Qk, Radio Parpayuela, Onda Peñes, Onda Corvera, Radio Sele, Radio Ujo, AllerFM, Radio Ḷḷena, Radio Kras, Radio Noreña, Radio Nava, Radio Alma (Bruxeles)… y puede sentise tamién nes canales d’Iniciativa pol Asturianu n’Ivoox y YouTube.

Ta abiertu’l plazu pa matriculase nun cursu que va celebrase nel Niemeyer d’Avilés del 10 al 14 de xunu. El cursu pretende ufiertar una visión multidisciplinar del sector audiovisual n’Asturies. Nel mesmu va estudiase la hestoria de la televisión n’Asturies, falando de doblaxe, programación, y la llingua asturiana nos medios de comunicación, cuntando pa ello con persones como Antón García, Francisco Álvarez o Cristobal Ruitiña.

Amás, nel cursu participen otres persones como Carlos Menéndez Otero, director xunto a Ruitiña, Dolfo Camilo Díaz, Illán Gonzali o’l director de la TPA, Antonio Virgili.

Dientro del programa ta previsto tamién va dedicar al analís de la producción, distribución y exhibición cinematográfica n’Asturies, completándose con proyecciones de producciones audiovisuales asturianes.

Porgrama completu del cursu

La Xunta pola Defensa de la Llingua Asturiana (XDLA) ta acabante presentar l’Informe sobre l’usu del asturianu en RTPA 2013, un documentu qu’analiza’l cumplimientu en tolos soportes del Ente Públicu de Comunicación —televisión, radio y web— cola llexislación vixente en cuantes a la llingua asturiana y al gallego-asturianu, tanto en toponimia como na so función primordial de normalización llingüística.

Yá a ultimos de febreru del 2013, la XDLA unvió cartes tanto al director de RTPA, Antonio Virgili, como a la directora xeneral de Política Llingüística, Ana Fueyo Llaneza, pidiendo que nel Ente públicu de comunicación s’usaren de manera sistemática na programación los topónimos oficiales. Virgili declaróse “consciente” del llabor del Ente Públicu como divulgador y promotor de la cultura y la llingua asturiana. Aclarió qu’en tou momentu usaren les formes oficiales qu’apaecen nel BOPA, pero que «pa una mayor seguridá» diba treslladar l’escritu de la XDLA a tolos programes y informativos de RTPA pa que revisaren l’usu que taben faciendo. Sicasí, a pesar de la promesa d’Antonio Virgili, el respetu a la llexislación en materia toponímica —como tolo que tien que ver col asturianu en RTPA— sigue siendo mui deficiente.

Otra manera, la organización recuerda que, ocho años depués de les primeres emisiones, el porcentaxe de programación nel nuestru idioma queda nel 4,6% na TPA y un 1,8% na RPA —datos engordaos gracies les repeticiones—, mentes que na web rtpa.es, l’asturianu cuasi nun existe. La cifra de programes n’asturianu ye asemeyada a la de la TVE franquista col catalán: permisividá n’espacios pequeños sobre cultura tradicional que lleguen con cuentagotes a los espectadores. Por eso, ensin arrenunciar a qu’Asturies tenga una radiotelevisión dafechu n’asturianu, pa la XDLA resulta evidente la urxencia d’aumentar el porcentaxe d’espacios tanto na radio como na televisión.

La organización señala que nun hai programación diaria n’asturianu, la emisión nel nuestru idioma nun llega nin a les 30 hores al mes y nel restu de la programación nun hai una continuidá qu’ayude a reforciar l’efectu normalizador de los espacios n’asturianu, dalgo que choca col éxitu de los programes d’entretenimientu nesta llingua. Ye tamién urxente más atención a la industria cultural n’asturianu en tola programación, sobre manera nos informativos. La XDLA considera especialmente grave l’ausencia de programación infantil n’asturianu, dalgo que supondría una importante fonte de trabayu gracies al establecimientu d’una industria del doblaxe n’Asturies. Ye de reseñar que toles televisiones autonómiques del Estáu español dediquen un porcentaxe importante d’emisión a los espacios infantiles na llingua propia —nel peor de los casos nun baxen del 25%—, mentes qu’en TPA l’espaciu ye del 0%. Per otru llau, l’asociación de defensa del asturianu considera especialmente grave’l vetu a esta llingua nos espacios informativos y deportivos.

La XDLA ve como dalgo prioritario que nel Ente Públicu exista un proyectu de normalización llingüística y cultural d’Asturies, pa lo que sería necesario la figura d’un llingüista que s’encargue de velar polos bonos usos del asturianu na programación. Amás, como pasa en munches televisiones, sería fundamental la existencia d’un departamentu encargáu d’asesorar y velar pol bon cumplimientu de la llexislación llingüística, amás de proponer la emisión d’espacios nel nuestru idioma y emitir informes sobre esta programación. Esa necesidá ye más clara viendo la dexadez de funciones de los miembros del Conseyu d’Alministración de RTPA y de la Dirección Xeneral de Política Llingüística del Gobiernu d’Asturies.

Pa rematar, la XDLA ve con esmolición l’usu diglósicu del asturianu que promueve RTPA en munchos espacios y mesmamente na publicidá corporativa, que se fai en castellanu anque seya de programes n’asturianu. Ye mui frecuente la presencia de programes onde l’usu del asturianu déxase namás pa la oralidá mentes que la rotulación ta en castellanu o onde nun se mira d’ofrecer un modelu cuidáu y correctu d’asturianu, sinón una llingua amestada o caricaturizada. Son estilos de llingua que podíen tener el so espaciu, pero güei son la mayoría de lo qu’ofrez RTPA y van en contra del papel exemplarizante dende’l puntu de vista llingüísticu que tenía que xugar l’Ente públicu.

Informe completu

La Xunta pola Defensa de la Llingua Asturiana convoca una rueda de prensa esti vienres 12 d’abril, a les 12:30 hores, nel so local de la cai La Gascona 12, baxu A, pa la presentación del Informe sobre l’usu del asturianu na RTPA 2013, documentu que reflexona sobre la situación y perspectives de futuru de la llingua asturiana nel Ente.

La subcontratación de los servicios d’información llocal de la RTPA en bloque a una empresa madrilana, por un presupuestu inferior en menos d’un ún por cientu respeutu a l’alternativa asturiana más prósima económicamente, y ensin tener en cuenta la llingua nin la cultura asturiana, nin ensiquier daqué tan básico comu la conocencia del mediu y la vinculación del territoriu, aspeutos toos ellos esenciales a la hora rializar l’actividá contratada, supón un amenorgamientu de la calidá del serviciu y un mecanismu inxustificable pa favorecer les candidatures foriates frente a les nacionales. Esta ye la conclusión d’Andecha Astur tres de conocer l’alxudicación de la producción de noticies locales na RTPA a una empresa madrilana.

Sigún la formación política “si yá la RTPA incumplía sistemáticamente coles sos obligaes funciones de dignificación y espardimientu de la llingua y cultura asturiana, cuyu tratu ye anguañu llamentable, cola alxudicación a una empresa madrilana de la información llocal, tamién incumple sos sos funciones de potenciación de la industria audio-visual asturiana y de los profesionales de los medios de comunicación asturianos, empeorando entá más si ye posible les espeutatives llaborales de los profesionales d’estos medios y les industries ausiliares de los mesmos, desviando un capital a Madrid qu’agora mesmo resulta indispensable p’Asturies”.

Esti domingu, con nuevu horariu, Xosé Ambás estrenó temporada, la séptima de Camín -enantes Camín de cantares-. Con un cuartu d’hora más de programa esta selmana Ambás visitó a Carme y Teresina, en Porrúa (Llanes), con elles faló de les formes de vida tradicional nesa zona del oriente, de la que recupera dalgunos cantares. Amás, un grupu de moces interpreta unos ramos y una danza.

Dende la productora del programa espliquen qu’arraquen una temporada “cargada de novedaes significatives”, nun horariu qu’agora ye teloneru del programa de música tradicional y folclore “Sones”.

Según denuncia la dirección de Radio Kara recibieron “demandes xudiciales per parte de la Sociedá Xeneral d’Autores d’España (SGAE) y l’Asociación d’Artistes, Intérpretes y Executantes (AIE) y Asociación de Xestión de Derechos Intelectuales (AGEDI). La SGAE recláma-yos 2.328,08 € y la AGEDI-AIE, pela so parte, 13.625,28 €, al aplica-yos la categoría 2 ó, nel so casu, 3.982 € si aplicaren la categoría 4, “na que ye obligatorio demostrar que nun tienen ánimu d’arriquecimientu, nun emitimos publicidá y nun recibimos mas de 25.000€ en subvenciones”, espliquen.

L’Asociación que sofita la esistencia de Radio Kras, “nútrese económicamente de les cuotes de los socios y socies, fundamentalmente la xente que fai programes de radio y delles persones que, nel so día, participaron nesti proyectu de comunicación alternativa y siguen collaborando como socies”, recuerden.

A la emisora “resulta-y abondo complicao poder caltener esti proyectu económicamente, como pa facer frente a estos pagos y si la xusticia-yos da la razón a estes entidaes de xestión supondría la desapaición del nuesu mediu, tres más de 27 años d’esistencia, yá que nun podríamos encarar los gastos”.

Recuerden a les autoridaes que son “una entidá ensin ánimu d’arriquecimientu y que nun se llogra nengún ingresu por esplotación comercial, nun tenemos publicidá, damos a conocer músiques que nun suelen tener cabida en el emisores comerciales, promocionamos grupos o cantantes noveles”, y piden a les entidaes demandante “con presupuestos de millones d’euros nun valoren nada d’esto nel so enfotu recaldatoriu”.

El próximu 11 d’abril celebrará’l xuiciu verbal de la reclamación de la SGAE. Dende Radio Kras piden la retirada de les demandes presentaes.

Esti sábadu, 16 de marzu, a les 3 de la tarde, estrénase na TPA’l primer programa de La Bolera, un espaciu dedicáu a los deportes y xuegos d’Asturies. Nel mesmu va falase de cuatriada y de corta de troncos, Amás, van preguntar a la montañera Rosa Fernández a qué xugaba de cría; Ramón Blanco, de Los Berrones, fai lo que pue respondiendo al nuesu Cascayu. Y Luisa Prendes guía a Milio’l del Nido, presentador del programa, pel interesante mundu de la corta.

La producción cuerre a cargu de Saltadera, d’Antón García, cuntando nel equipu con Carlos Suari, espertu en xuegos y deportes asturianos tradicionales.

Sigui a La Bolera en Facebook

La dirección de la RTPA emitió un documentu que según Iniciativa pol Asturianu “llega a la llocura de nun permitir l’usu de términos como “argayu” y que pon toles torgues posibles al emplegu de la toponimia oficial”. La organización denunciante afirma que ta acabante conocer la esistencia d’un documentu unviáu a los sos trabayadores de la Radiotelevisión del Principáu d’Asturies “onde s’impide l’usu del asturianu”. Nel documentu oblígase a los trabayadores a castellanizar términos como “argayu” y a tratar a pallabres asturianes como “el campanu” como si se trataran d’estranxerismos, obligando a ponelos ente comines.

Como “tovía más graves” califiquen les indicaciones que faen pa col usu de la toponimia. La dirección de la RTPA ordena nesti documentu dar pasos atrás nel usu de los nomes de llugar na canal, asina, obliga a los trabayadores del Ente a nun usar los topónimos asturianos de los conceyos, pesie a que la Llei d’Usu del Asturianu de 1998 espifica que los topónimos oficiales son los asturianos, na so forma tradicional, espliquen dende Iniciativa pol Asturianu, organización que califica esti fechu como “especialmente indignante pues produzse pocos díes dempués de que’l director de la TPA escribiere una carta a la Xunta pola Defensa de la Llingua Asturiana comprometiéndose a respetar la toponimia oficial y a promocionala, mientres al mesmu tiempu unvía a los sos trabayadores un documentu nel que pon toles torgues posibles pal so usu”.

Pa Iniciativa pol Asturianu “ye una tomadura de pelos a los asturianos y una falta de respetu pola llingua que falen una parte importante d’ellos y que ye patrimoniu de tola sociedá asturiana”. Amás, la RTPA sáltase la llegalidá vixente y vien usando cada vegada menos l’asturianu nes sos emisiones, pesie al mandatu que fai l’Estatutu d’Autonomía d’Asturies de “esparder l’usu del asturianu nos medios de comunicación” y pesie al ésitu d’audiencia que tuvieron siempres toles emisiones que fizo la canal nesti idioma.

Dende Iniciativa pol Asturianu afirmen amás “que nun ye la primer vegada que se-y impide a dalgunos trabayadores d’esta canal usar l’asturianu, pesie a tar formaos munchos d’ellos pa facelo”. Pa esta asociación “sedría muestra de bona voluntá per parte de la canal que dexaren usar l’asturianu a aquellos profesionales que quieran facelo”, que, según afirmen “nun son pocos”.

Iniciativa pol Asturianu esixe a la RTPA qu’incluya más programación n’asturianu, porque dende esta organización “nun s’entiende que yá paguemos por una televisión pública en castellán -TVE- y tengamos que pagar una segunda, ensin cuntar con medios públicos na nuesa llingua”. Dende la organización entienden que “una televisión pública asturiana nun tien sentíu si nun ye pa da-y usu a la llingua asturiana nes sos emisiones”.

Antonio Virgili, director xeneral de la RTPA, contestó a la carta que-y mandare la Xunta pola Defensa de la Llingua Asturiana (XDLA) el primeru de febreru pasáu pidiendo que se respetare la llegalidá toponímica nes sos emisiones. Na contestación, Virgili declárase «consciente» del llabor del Ente Públicu como divulgador y promotor de la cultura y la llingua asturiana. Aclaria qu’en tou momentu remitiéronse al usu de les formes oficiales qu’apaecen nel BOPA, pero que «pa una mayor seguridá» treslladó l’escritu de la XDLA a tolos programes y informativos de la Televisión y la Radio del Principáu d’Asturies pa que revisen l’usu que tán faciendo. El director de la RTPA agradez les suxerencies que-y faiga la XDLA «p’ayudar a detectar posibles errores».

La XDLA denunciaba na carta que nos informativos de la televisión delles veces usen les formes oficiales nos lletreros qu’acompañen la información y otres non, y que los presentadores poques veces usen oralmente la forma oficial. Lo mesmo asocede colos demás programes en cuantes al respetu a la llegalidá en toponimia. Na radio, l’usu de les formes oficiales ye nulu (nun siendo les formes que coinciden, evidentemente). Tamién se-y suxería al director de la RTPA que, atendiendo a un criteriu de normalización básicu, nel casu de los topónimos que s’aprobaron con una forma doble (Gijón/Xixón, Llangréu/Langreo, etc.) sería aconseyable usar la forma asturiana oralmente porque’l doblete sería absurdu nesa situación. «Usar namás la forma castellana implicaría la condena a que nunca s’oyera na televisión y la radio públiques la forma que se quier recuperar», dicíase na carta unviada a Antonio Virgili.

La XDLA agradez l’actitú collaboradora del director de la RTPA, anque va tar atenta al cumplimientu del compromisu que fai na so carta, amás d’aprovechar p’animar públicamente a los telespectadores y radioyentes a que faigan llegar al Ente Públicu los errores que detecten nes sos emisiones. Como esplicaba la XDLA na so carta, «la oficialización nel BOPA de les denominaciones de les entidaes de población implica qu’estes s’usen siempre, oralmente y nes rotulaciones, independientemente de la llingua na que se faigan los programes».

La respuesta inmediata del director de la RTPA contrasta col silenciu d’Ana Fueyo, directora xeneral de Política Llingüística, a la que tamién s’unvió na mesma fecha una carta asemeyada pidiéndo-y qu’interviniere pa que l’Ente Públicu cumpliere la llegalidá vixente en materia toponímica. Tamién se-y recordaba’l so compromisu de poner a andar otra vez la Xunta de Toponimia y se-y pidía qu’entainare col procesu d’oficialización, porque dende’l mes d’agostu del añu pasáu, cola aprobación de la toponimia d’Illas, nun hubo más novedaes nel Conseyu de Gobiernu nesta materia.