Comunicación

El Conseyu de Gobiernu dio ayeri lluz verde al segundu proyectu de llei de reestructuración del sector públicu, centráu de forma casi esclusiva na RTPA pero ensin munchos cambios de modelu: namái amenorga’l Conseyu d’Alministración de 10 a 15 miembros, que prometen ser profesionales y non políticos, y dexen de cobrar los del Conseyu de Comunicación. La llei pasa agora a la Xunta pa la so tramitación parlamentaria nun momentu en que l’Executivu escarez de mayoríes sólides que garanticen la so aprobación.

El plan del gabinete que lidera Javier Fernández contempla la fusión de los cuatro entidaes que nestos momentos dan forma al ente nuna sola, que pasaría a denominase Radio Televisión del Principáu, y amenorga’l númberu d’integrantes tantu del conseyu d’alministración como del de comunicación, nel que nun se cobraría un res.

Almite’l Gobiernu que l’impactu prácticu d’estes midíes, en términos económicos, va ser escasu, anque aprofia que’l gruesu del axuste aplicáu na RTPA yá se constata nos presupuestos de 2013, con un amenorgamientu del so financiamientu públicu de casi 13 millones.

L’aprobación d’esta segunda llei, que va dir siguida d’una tercera que va poner orde y conciertu normativu nel conxuntu de cambeos introducíos nel sector públicu demientres la llexislatura, llega nun momentu especialmente delicáu nel ámbitu audiovisual.

Entá recién la decisión del Gobiernu valencianu de pesllar la so canal autonómica y cuando l’Executivu madrilanu ta dispuestu a faer lo mesmo si, como asocedió nel primer casu, la xusticia anula l’ERE aplicáu sobre la plantiya, el futuru de la RTPA tendría de pasar por un modelu económicu sostenible, pero tamién por un modelu sociocultural qu’ufriera utilidá y non fora namái qu’un “televisión piquiñina” como nomaba hai décades un cantautor pernomáu a la emisión territorial de TVE.

Los planes del Principáu nun planteguen pol momentu pesllar la canal, sinón defender, en palabres del voceru y conseyeru de Presidencia, Guillermo Martínez, “un mediu de comunicación públicu, eficaz, tresparente, calidable nos sos conteníos y austeru nel gastu”.

El proyectu de llei aprobáu ayeri centrase na xestión del ente, na midida na que l’Executivu cree que la RTPA yá ta esperimentando anguaño un retayu de fondos bien cuantiosu al pasar nesti añu de 32,8 millones a 20 y a que la filosofía qu’empón la reestructuración del sector públicu quier facelu eficiente pero non desanicialu.

Los cambeos previstos na llei afecten al modelu de xestión, amenorgando les cuatro entidaes actuales a una sola, de forma que l’Ente Públicu de Comunicación sume y les otres trés sociedades, TPA, RPA y la Productora de Programes, fúndense nun mesmu organismu, buscando, en palabres del voceru, un funcionamientu más eficaz.

AL paecer, lo que s’intenta ye algamar un modelu de comunicación públicu con un programa-marcu a nueve años vista qu’afite los oxetivos xenerales que tendría de cumplir el serviciu. Mandatu que depués s’afigurará en contratos-programa de tres años onde detallarase nidiamente’l financiamientu.

La XDLA quier que la llei nueva de RTPA faiga posible asturianizar les emisiones y asina asegurar el so futuru. La organización solicita al Gobiernu, partíos parllamentarios y demás entidaes sociales que defendan el papel del mediu nel procesu de normalización llingüística, una vegada que se conociera que’l Conseyu de Gobiernu va aprobar esta selmana la segunda llei de reforma del sector públicu, que va regular, sobre manera, la Radio Televisión del Principáu d’Asturies (RTPA), axustándola a la llei audiovisual nueva y a los criterios d’austeridá.

La Xunta pola Defensa de la Llingua Asturiana (XDLA) recuerda que la llei actual señala ente los sos oxetivos la promoción de la cultura y la educación, “con especial protección del bable, mediante la promoción del so usu y espardimientu nos medios de comunicación social”. Sicasí, esa especial protección nun llegó a más d’un 5% de la emisión na TPA y un 2% en RPA, mentes que na web rtpa.es l’asturianu cuasi nun existe. Por eso, pa la XDLA resulta evidente que la reforma de la llei de RTPA tien que valir pa recoyer esplicitamente la necesidá de que la televisión y la radio autonómica xueguen un papel fundamental nel procesu de normalización social del idioma.

Actualmente, hai díes de la selmana nos que nun hai programación n’asturianu y nos demás espacios nun hai una continuidá qu’ayude a reforciar l’efectu normalizador, dalgo que choca col éxitu de los programes d’entretenimientu nesta llingua. La XDLA considera especialmente grave l’ausencia de programación infantil n’asturianu, dalgo que supondría una importante fonte de trabayu gracies al establecimientu d’una industria del doblaxe n’Asturies.

Per otru llau, tamién ye grave’l vetu a esta llingua nos espacios informativos y deportivos. La XDLA señala qu’una televisión autonómica ye un mediu de tresmisión d’información y conteníos, y, al empar, un instrumentu d’integración social, de refuerciu identitariu y de normalización llingüística. Por eso, pide al Gobiernu d’Asturies, a los partíos con representación parllamentaria y a toles entidaes comprometíes col idioma que defendan que la llei nueva dexe claru’l papel del mediu na promoción del idioma y de la cultura asturiana, dalgo que tien que valir pa que se produza una asturianización, en tolos sentíos, de les emisiones.

Too ello tien que facer posible una presencia tresversal del asturianu nes emisiones de RTPA con criterios de gradualidá y discriminación positiva, amás de calidá nes emisiones y normalidá con norma nel usu del idioma, teniendo tamién en cuenta la utilización del gallego-asturianu y el respetu a la toponimia oficial. Per otru llau, la organización ve necesario la creación d’un Conseyu Llingüísticu —con presencia de l’ALLA, Universidá, Dirección Xeneral de Política Llingüística y profesionales— encargáu de velar poles emisiones. Too ello, pasu ente pasu, tendría que llevar a un aumentu nel porcentaxe d’espacios nel nuestru idioma.

Otra manera, al tener en cuenta que la ufierta en castellanu yá ye escomanada abondo en toles canales y que nun se pue caltener que los falantes de castellanu puedan resultar discriminaos, la llei tien qu’establecer qu’una de les dos canales que tien TPA (A7 y A8) tien qu’emitir dafechu n’asturianu. Del mesmu mou, tien que convertir a RPA nuna emisora 100% nel nuestru idioma que valga pa potenciar la música n’asturianu y informar sobre tola actualidá del país.

Los datos d’audiencia de TPA –menos del 5% de share- baxen mes a mes y muestren que los asturianos ven cada vez menos la so televisión. Nesti contestu, los datos d’espacios como Sones, Día de mercáu o La bolera –siempre perriba del 10%- dexen ver que l’usu del idioma propiu ye’l puntu d’enganche ente los ciudadanos y la so televisión.

Ye fundamental que los asturianos vean a los medios públicos como un serviciu que forma parte de la so identidá y como un pegollu fundamental del so autogobiernu, dalgo fundamental p’asegurar el futuru de la cadena y la so aceptación social. Nun queremos qu’a RTPA-y pueda pasar lo qu’a Canal 9.

Ta preparándose El Maratón de Radiu en Radio Nava y, un añu más, lléganos el so llamamientu ‘a toles radios llibres del mundu, podcast, o persones a títulu individual, pa qu’unviéis programes y poder escuchar y aprender unos d’otros’. Va Ser del 13 al 15 d’avientu.

En Radio Nava va haber programes especiales pa la ocasión, onde nun va faltar dalguna actuación n’acústicu de grupos conocíos, presentación de nuevos discos, etc. Tamién pueden allegar a grabar en directu aquellos programes de otru emisores que mientres l’añu unvien pa descargar. Contactu: radionavagmail.com

El periodista ya investigador Próspero Morán, direutor amás d’Asturnews, destacó esti martes, na so intervención nel Xornaes Internacionales d’Estudiu de l’Academia de la Llingua Asturiana la “oportunidá perdida” n’Asturies a la hora d’utilizar el proyectu de radiotelevisión autonómica como mediu d’articulación social, tanto pola tardanza en ponela en marcha, como pola falta de producción propia y poles sos carencies na penetración nes redes sociales, afitando tres arrenuncios que comparó colos tres cantos del gallu de San Pedru.

Señaló tamién na so intervención qu’estes trés oportunidaes perdíes suponíen la renuncia que dende l’entamu la transición vien teniendo la clas política asturiana a diseñar una política de comunicación audiovisual talamente como fai tamién cola so renuncia a deselnvolver una política de normalización llingüística.

El primer arrenunciamientu del que faló foi na década de los 80, pola renuncia del PSOE, al formular a finales de 1986 una propuesta alternativa pa les comunidaes nes que tenía mayoría pa la puesta en marcha d’una especie de Tercer Canal Federada, de la que formaríen parte Asturies, Extremadura, Castilla-La Mancha y Murcia.

La segunda renuncia aportaba nesti sieglu, cola aprobación de la llei qu’establecía los porcentaxes d’inversión de les televisiones na creación audiovisual. Asina, recuerda que nel casu de la TPA, nun siendo’l “fracasu de la coproducción de la serie de ficción ‘El Faro’, dafechamente criticada dende delles asociaciones sociales y culturales, nun hai conocencia de producciones de ficción cinematográfica nestos años caberos, nin tan siquier nel ambitu de les series o películes pa televisión”. “L’arrenunciu ye dafechamente visible tamién al desistir de convertir la llingua asturiana na vehicular de la programación dende l’entamu de les emisiones de la TPA”, apuntó Próspero Morán.

L’investigador citó nesti puntu al profesor de la UPV Miguel Angel Casado del Río, que dexa claro que “pensar qu’una televisión autonómica pue ser una ferramienta d’espardimientu de la cultura y de la identidá rexonal ensin cuntar cola producción de ficción ye un error”.

La tercer y definitiva renuncia llega, según Morán, cola incorporación d’internet y les redes sociales a les televisiones autonómiques. “La RTPA nun tien malpenes presencia nes redes sociales como entidá nin los sos informativos de forma específica. Nun cunten con canal de YouTube, nin perfil o páxina en Facebook. En 2011 yeren, con Murcia, la única Televisión autonómica sin presencia nes redes sociales y eso que cásique’l 7% de les visites a la so páxina web veníen de Facebook. La TPA incluyera una aplicación en iOS pal iPhone pero escaeciose d’Android, resalvando’l mayor volume d’audiencia del Principáu nesti sistema operativu pa móviles que tien a disposición de los falantes d’asturianu bien de ferramientes gratuites como’l Diccionariu de l’Alla”, critica Próspero Morán.

El cobru de sobresueldos ente los dirixentes del PP, que desvelaron los papeles de Bárcenas, nun beneficiaba solamente a la cúpula del partíu de la cai Xénova sino qu’amás n’Asturies tamién yera la práctica habitual, sigún va espublizar mañana nel so últimu númberu ATLÁNTICA XXII con un ampliu reportaxe de Fernando Romero. Sigún adelantaba la revista na so web esti día, el periodista tuvo accesu a les cuentes del PP asturianu de 2010, que reflexen esos sobresueldos de los que se beneficiaben los sos dirixentes y el que más cobró esi añu foi l’entós presidente y agora diputáu nel Congresu Ovidio Sánchez, que s’embolsaba 6.000 euros mensuales en dos sobresueldos distintos, al marxe del so sueldu.

Esti númberu 29 de la revista tamién va informar, nun reportaxe d’Elena Plaza, de la imputación de trés persones, ente elles la ex xefa de Puertos del Principáu, pola esviadura de dineru n’obres executaes nos puertos asturianos de Puertu de Vega, Viavélez y San Esteban.

Y ente los munchos trabayos que recueye’l númberu 29 tamién destaca otru artículu, de Xuan Cándano, que detalla les causes que llevaron a la dimisión na alcaldía de Cuideiru de Gabriel López, lo qu’anició una crisis municipal ensin precedentes que va poner el Gobiernu d’esi conceyu en manos d’una xestora.

Otra información de Lucas Padilla desvela’l funcionamientu del sindicatu Manos Llimpies y la so intención de formar un partíu políticu que compita nes elecciones ocupando’l llugar del populismu d’ultraderecha qu’entá nun cuayó n’España.

La revista, qu’inclúi otros munchos artículos y entevistes nos sos 80 páxines habituales, pue adquirise nos puntos de vienta habituales d’Asturies, Madrid y Llión (Vil.lablinu y Villaseca de L.laciana) a partir del 31 d’ochobre.
Web d’Atlantica XXII

Daniel Fernández, como voceru nacional de Compromisu por Asturies, criticó el fechu qu’el 16 d’ochobre pasáu, Antonio Virgili, director xeneral de RTPA, compareció na Xunta Xeneral pa informar sobre la situación de la radio y la televisión pública. Sicasí, nel momentu nel que tolos asturianos podíamos enteranos del modelu de medios de comunicación que defenden los partíos con representación parllamentaria, pudimos ver como PP y Foro centraron el debate en quién salía más en TPA Noticias, mentes que PSOE y IX refugaron usar el so turnu de palabra y UPyD nin acudió a la comparecencia.

Compromisu por Asturies destacó que “temes tán importantes pal sector audiovisual y pa la ciudadanía como la caída d’audiencies, el modelu de xestión, la situación de los subcontrataos, los pleitos con extrabayadores, la política de contrataciones o la presencia escasa de la cultura y llingua asturiana na programación, tuvieron ausentes”, los nuestros representantes prefirieron más centrar el debate en “cómo-yos afectaba a ellos salir o non nel informativu de la televisión pública, una muestra más de la so desconexón cola realidá del país y de la vanidá: un insultu pa los asturianos, en definitiva”.

Pa Copromisu por Asturies “mentanto, los llamos partíos -d’esquierda- nun quixeron facer usu del so tiempu, cola escusa de que yeren temes que yá se trataben nel Conseyu d’Alministración de RTPA.” Sicasí, hai una diferencia bien grande, “nengún asturianu conoz qué se fala o se dexa de falar nesi organismu, polo que la comparecencia y respuestes de Virgili na Xunta Xeneral suponen que la ciudadanía pueda conocer la situación de la radio y la televisión pública”.

Dende Compromisu por Asturies consideren que “una de les poques coses interesantes que se dieron a conocer na comparecencia ye que RTPA debe 4 millones d’euros y que’l coste n’indemnizaciones ye de más de 400.000 €, mentes que’l Conseyu d’Alministración, del que’l restu de la ciudadanía desconoz les funciones, cuesta 110.000 €, mentes que 18.000 € ye lo que lleven los miembros del Conseyu de Comunicación”. Tampoco nun se centraron los nuestros políticos en “por qué l’axudicatariu de realizar la información meteorolóxica de RTPA lleva 8.900 euros cada mes, mentes que VAV –empresa axudicataria de la información municipal y que ta en concursu d’acreedores- fai’l so serviciu ensin equipos, polo que los redactores tienen qu’editar usando’l wifi de chigres y tienen qu’utilizar el so coche personal pa cubrir noticies”.

Otra manera, “tampoco nun hubo nenguna preocupación pola situación de la RPA, con tolos conteníos subcontrataos y una programación baxo mínimos, onde actualmente nun existe nengún programa encargáu pola emisora que tea realizáu n’asturianu, anque RPA empezó a emitir nel 2006 col 70% de conteníos nesti idioma”. Sobre la situación de la llingua na televisión tampoco “nun tuvo que responder Virgili, magar que la so presencia nun llega al 5%. Sicasí, nin IX, partíu que diz defender nel so programa una RTPA billingüe, preocupóse pol tema”.

Compromisu por Asturies señaló que precisamente, “la comparencia coincidía cola denuncia fecha pública pola Xunta pola Defensa de la Llingua Asturiana por mor del estrenu de la serie El Faro en TPA, onde la organización denunció que la cadena taba gastando’l so prespuestu pa financiar una serie rodada en gallegu que nel so estrenu en TPA namás axuntó al 1,3% d’asturianos énte la televisión”. Compromisu quier sumase a esta denuncia y critica “la falta d’interes de los partíos parllamentarios y de la mesma RTPA poles propuestes que vienen de la mesma sociedá civil, qu’a la fin ye la que paga y a la que se dirixe la televisión pública”.

Otra manera, Daniel Fernández quiso tamién recordar la so “defensa d’una RTPA pública que valga pa cohesionar el territoriu; crear una industria audiovisual y puestos de trabayu; informar de mou imparcial de lo que pasa nel país –amás de dar una visión asturiana del mundu-; mostrar la nuestru cultura ya identidá; y, como manda la llei, ayudar a normalizar l’asturianu” concluyó.

Nesti eventu, representantes d’organismos internacionales como’l propiu Parllamentu, la UNESCO o la Rede Europea de Llingües en Peligru (ELEN) amosaron la realidá que les radios comunitaries y comerciales tan sofriendo anguañu n’Europa no que cinca al usu de llingües minoritaries.

Iniciativa pol Asturianu foi convidada a la conferencia como resultáu del so proyeutu de radio ‘Iniciativa pol Asturianu nes ondes’, una iniciativa de radiodifusión consistente nun programa de radio selmanal presentáu por Samuel Gradín y lluéu emitíu per numberoses radios nel país.

A lo cabero, la conferencia permitió, sigún cunten na so web Iniciativa pol Asturianu, “non solo amosar la dura realidá que l’asturianu y otres llingües minoritaries tan viviendo no tocante a la so presencia en medios de comunicación, sinon qu’amás permitió establecer y fortalecer llazos con otres comunidaes europées como Irlanda, Escocia, Bretaña, Transilvania, Friuli, Cataluña o’l País Vascu, qu’a vegaes puen sofrir problemes asemeyaos a los que nós esperimentamos na nuestra tierra”.

Pues vese la sesión matutina na web institucional, col únicu problema de que, debio a la presencia de traductores simultáneos, el videu nun cunta con sotítulos pa les persones que falaron vascu, húngaru o corsu.

L’Asociación de la Prensa d’Uviéu, qu’arrexunta a más de 350 profesionales asturianos, espresaba’l so refugu esta fin de selmana al espediente disciplinariu abiertu pola dirección de RTVE, a instancia de la sección sindical de la UXT nel centru territorial d’Asturies, al periodista Juan Manuel Fernández Suárez (Xuan Cándano), motiváu supuestamente pol fechu de figurar como apoderáu d’una empresa, Bocamar Producciones, que nun tien actividá industrial dalguna dende va diecisiete años.

La denuncia de la UXT y l’apertura del espediente coinciden, sospechosamente, cola publicación nel últimu númberu de la revista Atlántica XXII, de la que Cándano ye director, d’un reportaxe d’investigación sobre les actividaes empresariales del sindicatu socialista n’Asturies tituláu “UGT-Asturies: Negocios, mentires y cintes d’audiu”. Dichu reportaxe ye destacáu na portada de la revista col títulu “UXT S. A. Un sindicatu empresarial”.

A xuiciu de l’Asociación, cabo pensar na esistencia d’una relación directa ente la citada información y la denuncia de la UXT en RTVE-Asturies na midida na que tien entá menos sentíu atribuyila – falsamente, como se demostró – a una inesistente incompatibilidá. Per otru llau, “resultaría llamativu, amás d’insólitu, que la UXT dedicárase agora a hostilizar a el trabayadores en cuenta de defender y promover los sos derechos, como s’espera d’un sindicatu”.

Teniendo en cuenta lo anterior, l’Asociación de la Prensa considera que, “basándose n’acusaciones infundaes, la UXT, al traviés de la so sección sindical na televisión pública, fixo un usu torticero de los sos prerrogativas sindicales p’amedranar, cuando nun escarmar, a un periodista de trayectoria intachable que’l so pecáu foi exercer el so derechu a la llibertá d’información. Y encamienta a la dirección de RTVE que nun se dexe utilizar y esquice directamente tantu los fundamentos de la denuncia como los intereses espurios de la UXT al plantegala”.

Igualmente, na Asociación “esiximos a la UXT d’Asturies y a la executiva de la sección estatal en RTVE un pronunciamientu claru sobre la sorprendente actuación de la so sección na delegación del Principáu, que’l so acoso a Xuan Cándano podría desaguar inclusive nel so despidu si la empresa cai na trampa de les sos falacias. A esti respectu, la APO quier denunciar l’absoluta indefensión del periodista, yá que magar el procedimientu sancionador preve consultar al comité d’empresa como garantía de que se van respetar los sos derechos llaborales, nesti casu’l procedimientu ta viciáu al tener la UXT la mayoría en dichu comité”.

L’Asociación de la Prensa d’Uviéu va poner a disposición del periodista tolos medios de los que dispon pa la defensa de los sos intereses profesional y llaboral y de la llibertá d’espresión.

El director xeneral del Ente Públicu de Comunicación del Principáu d’Asturies, Antonio Virgili, defendió esti miércoles pela mañana la oxetividá de los servicios informativos de Radio Televisión del Principáu d’Asturies (RTPA) ante les crítiques de los grupos de la oposición de Foru y PP qu’afirmen que la cadena ta politizada y que los marxina. Tampoco IX nun ta conforme col tratamientu de les informaciones, anque señaló qu’esti ye un asuntu qu’ha d’aldericase nel senu del conseyu d’alministración de la RTPA.

Antonio Virgili compareció na Comisión de Control del Ente Públicu de Comunicación, a pidimientu del PP, y sorrayó que los criterios nos informativos son “oxetivos” y “periodísticos”, porque sina lo establez un documentu aprobáu pol conseyu d’alministración yá en 2006.

Ante les crítiques de los grupos de la oposición, Virgili señaló que les quexes más habituales vienen de organizaciones polítiques y clubes deportivos: “Daqué entendible, porque tanto la política como los deportes vivense con pasión”.

Virgili dixo reconocer que pueden producise erros nun informativu concretu, pero refugó de forma tayante que sían frutu d’una intencionalidá.

La XDLA diz que’l fracasu de “El Faro” muestra que los asturianos quieren una televisión que reflexe la so realidá cultural y que la serie tuvo na so estrena en TPA una audiencia del 1,3%, dalgo que convirtió a l’autonómica na cadena onde menos siguimientu tuvo esta producción, porque nun hebo conexón denguna na serie cola realidá cultural asturiana.

Nuna nota de prensa asoleyada esti miércoles, l’asociación recuerda qu’hai selmanes, la Xunta pola Defensa de la Llingua Asturiana (XDLA) mostraba la so esmolición pola participación de la televisión pública asturiana (TPA) na producción de la serie El Faro, realizada mayormente con medios gallegos y que se rodó en más d’un 80% na llingua del país vecín. Nel so momentu, la organización calificó la participación de TPA na serie, con una ambientación que refuga les referencies a una idiosincrasia concreta, como dalgo que respondía a la política cultural de la FSA, caracterizada pol complexu d’inferioridá y el despreciu a lo propio. Agora, depués de la estrena d’El Faro, “pue vese cómo los asturianos-y dieron el llombu a esta producción, al quedar la serie con un 1,3% d’audiencia, dalgo que convirtió a TPA na cadena autonómica onde menos siguimientu tuvo la estrena –en TeleMadrid tuvo una audiencia perriba de la media de la cadena, mentes qu’en TVG algamó unos datos más qu’aceptables-“.

Na opinión de la XDLA, “el datu de TPA choca col éxitu de los programes n’asturianu, con exemplos como Día de mercáu o Sones, que siempre tán perriba del 10% de share, con más de 35.000 espectadores. A pesar d’estos datos, la televisión pública nun emite más del 5% de programes nel nuestru idioma y decidió espilfarrar el so presupuestu –pagáu del bolsu de los cuidadanos- y participar na producción d’El Faro. Esta serie nun xeneró nengún puestu de trabayu n’Asturies –incumpliendo’l principiu de defensa del texíu audiovisual asturiano- y nun respuende a los principios de defensa y promoción de la llingua y de la identidá cultural d’Asturies –polo que se refuga l’atención a los asturianos, l’audiencia a la que TPA tien que responder y atender-”

La XDLA recuerda l’éxitu de series autonómiques realizaes na llingua propia, como la vasca Goenkale, qu’acaba de cumplir 20 años n’emisión; la gallega Padre Casares –que foi adaptada pola televisión andaluza, valenciana y balear, amás d’emitise doblada al castellanu en TeleMadrid y Castilla-La Mancha TV-; la valenciana L’Alqueria Blanca, que ye líder d’audiencia nesti territoriu; o La Riera, telenovela de producción propia de TV3 qu’axunta cada tarde a 500.000 catalanes. El so éxitu vien marcáu pola identificación del públicu na pantalla al traviés d’elementos qu’ayuden a reforzar la identidá cultural y llingüística, amás de responder a un propósitu doble: l’interés económicu de poner los pegollos d’un sector audiovisual, per un llau, y ameyorar la imaxe de la televisión como símbolu de madurez, per otru.”

La realización de productos asina pola TPA, “amás d’ayudar a xenerar datos bonos d’audiencia, repercutiría na economía del nuestru territoriu al ayudar a promover una industria audiovisual autóctona. Sicasí, la cadena tovía nun fixo un apueste poles series de producción propia, pola emisión d’obres de teatru o pol doblaxe al asturianu de ficción ayena, dalgo qu’ayudaría a xenerar puestos de trabayu y al nacimientu d’un texíu audiovisual nel país. Un exemplu del éxitu que podríen tener productos asina en TPA ye cómo siguen enllenando los teatros del país les obres de teatru costumista. Aparte, obres de teatru n’asturianu como País, d’Adolfo Camilo Díaz, dende que s’estrenó nel 2006 tuvo más de 70.000 espectadores, pero tovía nun tuvo nengún pase en TPA. La webserie Chatarrona, tamién n’asturianu, que na so primer selmana d’emisión nel 2011 tuvo más de 20.000 visites en Youtube, tampoco nun mereció l’interés de la TPA”.

La nota de prensa de la XDL fina con una entruga retórica: “¿Pue falase de que nun hai presupuestu pa ello cuando s’echa pa crear producciones de ficción ayenes?”