Comunicación

L’últimu programa de la primer temporada de “Territoriu Sidreru” llega al Llagar Castañón, depués de tener un 7,1% del share nel capítulu séptimu. Inaciu Galán llévanos nel capítulu caberu d’esta primer temporada de Territoriu Sidreru a conocer el Llagar Castañón, que cola so llarga hestoria ta acabante renovase con unes modernes instalaciones na parroquia de Quintueles, en conceyu Villaviciosa. Na cai Gascona d’Uviéu adientrámonos nel chigre La Pumarada.

Nel Niemeyer d’Avilés asistimos al actu de presentación de la collecha de Denomación d’Orixe Sidra d’Asturies. Amás falamos con Xurde Margaride de “sidrografíes”, unes semeyes trataes con sidra pa da-yos otra testura y colores. Averámonos al mapa d’Asturies pa conocer el repartu de pumaraes y producción de mazana per conceyos a lo llargo’l país y conocemos más pallabres de la sidra con Fernán Gonzali Llechosa.

El programa, que ta teniendo bonos resultaos d’audiencia, cuntaba la selmana pasada con un 7,1% del share, sobre una media del 4,6% nesi día en TPA. Darréu d’estos ocho primeros capítulos van poder vese dos especiales con “Lo meyor de Territoriu Sidreru”, onde’l presentador dirá viendo los meyores momentos del programa acompañáu de dellos convidaos especiales.

La XDLA critica la incapacidá de la dirección de RTPA pa xestionar la programación porque na so opinión los primeros programes estrenaos nel 2014 siguen la llinia marcada pol “arecismu” d’inorar la realidá llingüística asturiana, dalgo que fixo que los espectadores nun sigan la programación.

Dende’l nacimientu de RTPA, la Xunta pola Defensa de la Llingua Asturiana (XDLA) vien denunciando una programación inspirada pol discursu oficial del arecismu: modernidá malentendida y distanciamientu de l’Asturies real. Asina, pa la Xunta ye “como si’l nuestru país fora una comunidá monollingüe, TPA llegó a les pantalles escondiendo la realidá al nun apaecer l’idioma propiu nes emisiones. Sicasí, la presión social fixo que, un añu depués de la primer emisión, la cadena estrenara los primeros programes n’asturianu que, como reconoció José Ramón Pérez Ornia, primer director del Ente, taben dellos puntos perriba de l’audiencia de los espacios en castellanu”. D’aquella, comprometióse a que la llingua tuviera «un valor nuevu», semando l’orixe «d’una industria audiovisual n’asturianu», pero quedó escaecío a les primeres de cambiu.

Años depués d’estes palabres y tres la llegada d’Antonio Virgili a la dirección, la XUnta critica que “los programes n’asturianu siguen siendo mui pocos, anque paradóxicamente sían los más vistos. La canal nun emite dibuxos, series, deportes o informativos n’asturianu; tampoco la toponimia oficial tien un usu xeneralizáu na programación en castellanu”.

Nuna nota de prensa enforma dura, la Xunta diz que “la televisión que paguen tolos asturianos nun respeta lleis básiques como la Carta Europea de les Llingües Minoritaries, l’Estatutu d’Autonomía o la Llei d’Usu. La prueba ta nos primeros programes estrenaos nel 2014, propios d’una cadena estatal o de TeleMadrid. Sicasí, pa poner “unes pingarates de casa”, en dalgún d’estos espacios nuevos trátase al nuestru idioma como una realidá ayena, rara, cómica. Pudimos ver un concursu onde se facía una encuesta sobre’l significáu d’una “palabra asturiana” na Plaza la Escandalera d’Uviéu, con un montaxe que busca la comicidá al ver que naide sabe qué significa. Depués, facíen una llamada a Castripol pa ver si topaben a daquién que la conociera, ensin reparar en que nesi conceyu nun se fala asturianu sinón gallego-asturianu. Too ello entemecío con collaboradores del espaciu que dicen que nun saben asturianu, como si d’una llingua remota se tratara, anque la llei de creación de la canal onde trabayen diz que RTPA tien que xugar un papel importante dientro del procesu de normalización”.

Con too y con eso, parez que la sociedá dio’l llombu a estos espacios que, a pesar de contar con una promoción bien grande, tuvieron perbaxo de la media d’audiencia –Medicina tv.com salud y De hoy no pasa tuvieron un 2,5% na estrena, mentes que la media del día foi del 4%-. Otra manera, la reemisión del espaciu n’asturianu Día de mercáu, emitíu por sorpresa y en prime-time ensin nenguna promoción, tuvo un share del 5,2%, perriba de la media.

La Xunta tamién dexa bien afitao que “la promoción de los espacios n’asturianu nun tien nada que ver cola que se fai pa los espacios en castellanu: programes como Camín, espaciu que llegó a algamar un 30% de share, emitióse’l sábadu pela nueche ensin nenguna promoción, faciendo que l’espaciu quedara nun 0,7%, que, otra manera, ye la media d’audiencia que tien la TPA un sábadu pela nueche. ¿Por qué nun promocionó la cadena la emisión d’ún de los programes de más éxitu? ¿Nun quieren que Camín ayude a la cadena a xubir a l’audiencia media del mes? ¿O ye que la dirección de RTPA nun quier que los programes n’asturianu tengan éxitu y asina xustificar el pocu porcentaxe d’emisión nesti idioma? Lo mesmo pasó con Día de mercáu –anque nesti casu, sí que tuvo audiencia, anque non la avezada (10%) al tratase d’una reposición que s’emitió ensin promoción- o con El club musical, emitíu’l miércoles ensin anunciu previu”.

La nota de prensa tamién dala de que “esta falta d’atención choca cola que-y tán dando a El Faro, serie gallega que por mor de los datos tan malos d’audiencia pasó a emitise peles mañanes. La serie tuvo’l primer día col horariu nuevu un 0% d’audiencia, pero la cadena sigue enfotada nella, mostrando un ciñu que nun tien hacia los espacios n’asturianu y anunciándola en cada pausa publicitaria. Otra manera, la estrena’l domingu pela nueche d’un programa nuevu en castellanu fixo que baxara hasta’l 4% l’audiencia que TPA tenía cola emisión de Güelos. Amás, tamién tuvo repercusión nel programa n’asturianu que vieno depués: Sones, que quedó nun 4,9%, cuando la media ye del 10% (¡y tovía quedó perriba de la media de TPA de tol día, 4,6%). Ún de los espacios más vistos d’esi domingu foi Territoriu sidreru, tamién n’asturianu y que tuvo un 7,1%”.

A pesar de que l’audiencia ta mostrando que quier programes basaos na nuestra identidá cultural y llingüística, TPA anecia nuna programación fecha por productores que vienen de Madrid. Mentanto, mantién a les productores del país con programes de pocu presupuestu, dalgo que nun permite l’afitamientu del nuestru sector audiovisual y la so competitividá a nivel estatal. Les productores de fuera, qu’aparecieron n’Asturies col nacimientu de TPA, consumen unos 15 millones d’euros del presupuestu del Ente –23 millones-. La dirección de RTPA ta llevando a la cadena a la so desaparición, con un gastu de dineru escomanáu pa una programación que nun tien una respuesta de l’audiencia nin xenera beneficios nel país. Hai que preguntase qué capacidá tienen los xestores del Ente pa dirixir la nuestra televisión si les sos decisiones tán faciendo que la sociedá asturiana-y dea’l llombu y que cada vez tenga menos sentíu mantener una televisión con esi modelu de programación”.

A lo cabero, la Xunta atalanta que “l’aparición de la TDT y l’aumentu na ufierta de canales esixe a la cadena una precisión mayor na so programación, que tien que basar na especificidá y nes espectatives de l’audiencia a la que se dirixen. TPA namás va tener sentíu y namás va contar col respaldu de la xente si va del llau de la nuestra realidá llingüística y del sector audiovisual asturianu. Ye fundamental que los asturianos vean los medios públicos como un serviciu que forma parte de la so identidá, dalgo fundamental p’asegurar el futuru de la cadena y la so aceptación social. Lo contrario va mostrar que la cadena namás respuende a los intereses políticos y empresariales de dalgunos, amás de dexar clara la incapacidá de la directiva de RTPA pa xestionar el seviciu públicu audiovisual de tolos asturianos”.

De la mano d’Inaciu Galán el programa de la TPA “Territoriu Sidreru” aporta esti domingu a les trés de la tarde, al Llagar Peñón, un llagar que pasó yá del sieglu d’hestoria na parroquia d’Albandi, en Carreño, y na que se cuida la sidra con munchu procuru. Amás, el programa da a conocer conocer les actividaes gastronómiques y d’ociu d’unes xornaes yá afitaes nel calendariu sidreru, “Xixón de sidra”.

Avérase tamién esti capítulu al funcionamientu de la D.O. Sidra d’Asturies y a los controles que pasen los llagares pa consiguir esti sellu de calidá. Con Inaciu Hevia Llavona, el programa da a conocer na sección “Xente sidrero”, la hestoria de la botella de sidra, que trata nel so llibru últimu, “La botella de Xixón” ganador del premiu Fierro Botas d’ensayu. A lo llargo de la entrevista conócense datos llamativos, como que la última botella de sidra fabricada n’Asturies data de 1981, o cómo la sidra esplumoso ye más antiguo que’l cava catalán, per unos cuantos años. En Mieres “Territoriu Sidreru” avérase al chigre-llagar Panizales, el primeru en producir sidra de xelu. Rematando, como ye vezu, cola pallabra sidrera comentanda por Fernán Gonzali Llechosa.

La Xunta pola Defensa de la Llingua denuncia esti día nun comunicáu que la TPA gasta unos 100.000 euros nel doblaxe al castellanu de productos audiovisuales estranxeros, aportación que tien que pagar TPA a la FORTA, por ser la entidá qu’encarga doblaxes a empreses de Madrid. Nel casu de que la canal pública emitiera n’asturianu podría destinar esa parte del presupuestu a doblar al asturianu unes 30 hores de ficción estranxera, dalgo que permitiría’l nacimientu d’una industria del doblaxe nel nuestru país.

Hai unos díes, la Xunta pola Defensa de la Llingua Asturiana (XDLA) daba a conocer que la emisión de la primer película doblada al asturianu emitida por TPA, El rostru impenetrable, tuvo una acoyida bona ente l’audiencia de la nuestra canal pública al algamar un 5,1% d’audiencia, un share que la asitiaba ente los espacios más vistos del día en TPA y que taba perriba de la media de la canal (4,7%). Sicasí, hubo opiniones que quixeron presentar el datu como malu al asegurar que na dirección de RTPA había munches más espectatives –anque tampoco nun se fixo una campaña publicitaria d’alcuerdu col fechu históricu que suponía la película-.

Agora, la XDLA quier reseñar qu’una selmana depués d’emitir El rostru impenetrable, TPA programó US Marshals, una película d’acción de 1998 protagonizada por Tommy Lee Jones. La cinta tuvo un 3,4% d’audiencia, perbaxo de la media del día, que quedó nun 4,1%. Los datos esfrónense contra les opiniones de los que dicen que na cadena pública tien más demanda’l cine en castellanu.

>p>Por eso, la XDLA entrúgase si estos datos van facer que daquién se cuestione la falta de doblaxes al asturianu en TPA, porque parez qu’hai una vara doble de midir pal idioma propiu. La mayor parte de los espacios n’asturianu emitíos na cadena pública doblen la media d’audiencia de TPA y nunca tán perbaxo del 10%. Sicasí, les mesmes voces que presenten los datos d’El rostru impenetrable como perbaxo de les espectatives, nun cuestionen la programación en castellanu de TPA.

Ye más, la XDLA ye sabedora de qu’hai productores que tán presentando propuestes de programes nel nuestru idioma a la dirección de la cadena, espacios con calidá, que valdríen pa da-y sentíu a la existencia d’una televisión pública y que, de xuru, consiguiríen una bona acoyida de l’audiencia. Sicasí, la dirección de RTPA diz non a estos espacios y sigue apostando por programes en castellanu que son copies d’espacios emitíos nes televisiones estatales y que nun aporten nada al sector audiovisual asturianu.

Per otru llau, hai quien diz que la emisión de ficción estranxera n’asturianu xeneraría un gastu mayor, dalgo que nun tendría xacíu en tiempos de crisis y d’austeridá presupuestaria. La XDLA quier recordar que l’usu del asturianu como llingua vehicular del doblaxe xeneraría una ventaya económica, porque actualmente RTPA gasta cerca de 100.000 euros nel doblaxe al castellanu de productos audiovisuales estranxeros, aportación que tien que pagar TPA a la FORTA, entidá qu’encarga doblaxes a empreses de Madrid. Nel casu de que la canal pública emitiera n’asturianu podría destinar esa parte del presupuestu a doblar al asturianu unes 30 hores de ficción estranxera, dalgo que permitiría’l nacimientu d’una industria del doblaxe nel nuestru país.

Otra manera, la XDLA recuerda la inversión –que tovía nun conocemos- que fixo TPA na serie gallega El Faro, coproducción al 50% ente TVG y les demás cadenes autonómiques. La serie, rodada en gallegu lo más d’ella, recibió una partida económica de TPA, qu’amás tamién tuvo qu’invertir pa poder emitila doblada al castellanu, doblaxe fechu nuna empresa gallega y que nun xeneró nengún empléu nel nuestru país. Amás, la emisión na cadena asturiana queda tolos díes ente’l 0,1 y 0,2% d’audiencia, unos datos que muestren el so fracasu y la falta d’interés de los directivos de RTPA. Namás podemos pensar en razones ideolóxiques pa esplicar por qué nun quieren facer un apueste pol idioma, cuando ta comprobao que xeneraría unos datos meyores d’audiencia y mayores beneficios económicos, amás de vertebrar el texíu audiovisual del país. Siguir cola llinia de programación actual ye llevar a la cadena pel camín lentu de la so desapaición, porque los datos d’audiencia muestren el desapegu de la sociedá asturiana cola mayor parte de la emisión de TPA.

Esti vienres 3 de xineru Noreña va acoyer una charra al rodiu del proyeutu editorial de l’Asociación Cultural N’Ast, la revista “N’Ast. Cartafueyos d’Ensayu”, na que van intervenir el direutor de la espublización asina comu otros miembros del coleutivu que desplicarán cómu nació, en qué consiste, qué oxetivos tien y cómu se pue participar nella. La charra va sirvir de presentación del númberu 9 d’esta veterana publicación en llingua asturiana.

L’actu, organizáu a comuña cola Asociación Cultural InfoNoreña, va tener llugar na sala d’aconceyamientos del Vieyu Depósitu del Agua (Plaza El Rebollín, s/n; xunto a La Torre’l Reló), a les 20’00 hores, y el mesmu va aprovechase pa presentar el númberu 9 de “N’Ast. Cartafueyos d’Ensayu”, polo que se cuntará, amás, cola presencia de dellos de los autores que participen na espublización.

Nesta novena entrega de los cartafueyos, pa los que por primer vegada nun se cuntó col sofitu de la Conseyería Cultura, recuéyense los trabayos “Remanar la hestoria d’Asturies” (Xuan Porta Allende); “Totalitarismu (os): notes sobre les sos carauterístiques cimeres y la so aplicación al facismu español” (Natalia Fernández Jimeno); “La llucha de clases na Corona de Castiella” (Eduardo Abad García y Sergio Alonso Pampliega) y “El republicanismu federal na Asturies decimonónica” (Javier Cubero de Vicente).

La revista, que tien un llargor de 118 páxines y un preciu de venta al públicu de 10 €, yá ta a la venta nes meyores llibreríes del país, anque tamién se pue mercar al traviés del corréu lletrónicu nast.oficialida@gmail.com.

Como ye vezu por estes feches, Goxe Producciones publica l’Anuariu de la Música Asturiana, un volume onde fai resume de lo que foi l’añu musical n’Asturies. La decimoquinta entrega d’esta publicación vien nesta ocasión con más de cien páxines a tou color y información abondo sobre bien d’aspectos que tienen a la música del país como protagonista.

La portada d’esta entrega nueva protagonízala’l Festival Intercélticu de Lorient, qu’esti branu pasáu dedicaba la so última edición a Asturies, asina nes páxines centrales apaez tamién un repasu fondu a lo que dio de sí la representación asturiana nesi alcuentru músico-cultural de gran importancia. Otros conteníos destacables son reportaxes como’l tituláu «(Sobre) Viviendo de la música»; cróniques como les dedicaes al II Sol Celta d’Avilés o al Festival Arcu Atánticu de Xixón; l’informe «Cuando Lluis Llach nun sonaba na radio», onde se fai una comparanza ente’l tratamientu que les radios públiques autonómiques dan a la música propia de les sos respectives comunidaes; artículos d’opinión dedicaos, ente otres cuestiones, al trenta aniversariu de la Noite Celta de Porcía o a la polémica suspensión del conciertu d’Albert Pla en Xixón; un reportaxe fotográficu y lliterariu dobre’l discu Tiempos Modernos de Dixebra; un repasu a los diez años de vida del grupu Skama la Rede; amás d’entrevistes (a Misiva por exemplu) y les secciones Anuncies y Collecha, ente otros munchos temes.

La editorial d’esti AMA 2013 titúlase «Consumir música asturiana» y nél reflexónase alredor del mercáu musical asturianu, con frases como: «La solución a tou esti enguedeyu pasa inevitablemente por un mayor compromisu del poder públicu autonómicu, qu’entienda a la música asturiana non como un hobby d’unos cuantos «alloriaos» o como un productu esclusivamente destináu al ociu, sinón como un posible campu d’actividá económica estable y un factor d’internacionalización d’Asturies perimportante, que pueda valir d’escaparate del país. Pero tamién los músicos tienen que ser conscientes del so papel, resistiendo n’époques de crisis y nun dexando qu’ésta amenorgue la so creatividá y productividá. Ensin escaecer a los sellos discográficos, qu’han d’ufiertar productos atractivos, guapos, con «pluses» más allá de lo meramente musical qu’atrayan al posible comprador».

Como complementu sonoru l’AMA vien con un discu de regalu que ye un resume de les producciones apaecíes a lo llargo del añu 2013, con diecinueve temes que van de los soníos más tradicionales a los más contemporáneos: tonada, bandes de gaites, folk, canción d’autor, rock…

El programa de la TPA Territoriu Sidreru, que presenta Ignaciu Galán, visita esti domingu’l Llagar Muñiz y fala de música y sidra con Ismael Arias, escritor y espertu en tonada amás de trabayador de la estaya cultural del Ayuntamientu de Mieres. El programa fala tamién de la fabricación de toneles de sidra y visita’l chigre El Restallu, en Xixón.

De la mano d’Inaciu Galán, Territoriu Sidreru llega esti domingu a les 15 hores, en TPA, al Llagar Muñiz, en Tiñana, una de les parroquies con más llagares del conceyu de Siero y d’Asturies. Galán avera a los telespectadores al vieyu oficiu de facer toneles, les posibilidaes de futuru d’esti trabayu y los nuevos usos de los toneles y pipes, na Tonelería Hermanos Argüelles, que lleva más de cien años faciendo estos recipientes sidreros de madera en Breceña, Villaviciosa.

En “Xente sidrero” esti capítulu fala de la presencia de la sidra y la mazana na música asturiana col espertu Ismael María González Arias, en Mieres del Camín. En Xixón el programa da a conoer la sidra y la gastronomía del chigre El Restallu, rematando esta edición del programa cola hestoria y la evolución de les espiches en “¿Sabíes qué?” y con una nueva pallabra sidrera esplicada por Fernán Gonzali Llechosa. El programa repítese a les 16 hores en TPA 2 (A8) y los miércoles a les 15 hores.

La esposición “25 años de Conciertu en Cartelos” llega al Espaciu Astragal de Xixón (Conseyu de la Mocedá de xixón, cai Manuel llaneza 68), y va poder visitase del 27 d’avientu al 31 de xineru. Esta esposición de la Xunta pola Defensa de la Llingua Asturiana, fai un percorríu pelos cartelos de les venticico ediciones del Conciertu pola Oficialidá. Trátase d’un repasu a los cuasi 70 grupos que pasaron per estes 25 ediciones d’esti conciertu, y que quier valir d’homenaxe al llabor comprometíu de tola xente de la música que participen nos conciertos y tamién de denuncia y reivindicación de los drechos llingüísticos de tolos y toles asturianes.

El periodista y presidente d’Iniciativa pol Asturianu, Inaciu Galán, entamó estos díes atrás una votación popular al traviés de les redes sociales Facebook y Twitter, col oxetivu de conocer les trés noticies más positives pa la llingua asturiana del añu 2013. La iniciativa surdió nel programa “La radio es mía”, presentáu por Pachi Poncela y Sonia Avellaneda na RPA, onde Galán tien una sección selmanal cada llunes a les 9:45.

Dempués d’una selmana de votaciones, y con un 16% de los votos, los internautes escoyeron como noticia más positiva la publicación y ésitu de ventes de les nueves aventures d’Asterix n’asturianu. Asoleyada al mesmu tiempu qu’en llingües como l’inglés, castellán o l’orixinal francés, en poques selmanes lleva dos ediciones siguíes, anunciando amás la editorial Bruño que van siguir publicando más aventures d’Asterix por mor del ésitu de ventes que supunxo la so salida en llingua asturiana.

En segundu llugar, col votu nes redes sociales d’un 15% de los participantes, tuvo la noticia xenerada por un estudiu fechu por Isabel Hevia, profesora de la Universidá d’Uviéu, nel que se destacó que’l 90% de los equipos directivos d’institutos y escueles asturianos sofiten una mayor presencia del asturianu nos centros, amás de ser favorables a la oficialidá. En tercer llugar, y col 12’5% de los votos, tuvo la emisión per parte de la TPA y per primer vegada d’una película doblada al asturianu n’horariu de máxima audiencia. La emisión d’El rostru impenetrable, de Marlom Brando tuvo gran repercusión nes redes sociales. Los comentarios de los votantes per internet coincidieron na necesidá de qu’esti fechu tenga continuidá, y que seya normal ver na televisión pública asturiana, películes na nuesa llingua.

No que cinca al restu de noticies, nel últimu llugar, col 5 y 6% de votos, respectivamente apaeció la resolución del Parllamentu Européu en sofitu a la situación de les llingües europees ensin protección suficiente, como l’asturianu, y los cambios de nome al asturianu del Colexu Rural del Cabu Peñes y el Colexu Montiana de Xixón, una decisión que trai una normalidá nel usu de la toponimia asturiana nos centros.

Cola 7%, n’octavu llugar, una decisión política na capital asturiana, la decisión del Conceyu d’Uviéu de cambiar les sos normes pa permitir la presentación de documentos n’asturianu a los ciudadanos. Esto asocedía dempués de que-y prohibieran a un miembru d’Iniciativa pol Asturianu presentar un documentu nes oficines del conceyu.

En séptimu llugar, col 8’5% de votos, la noticia pola que’l Descensu del Seya tuvo cartelu n’asturianu per primer vegada en 77 años, gracies a la iniciativa de la empresa Les Camisetes. En sestu llugar, la decisión de modificar el proyectu de la nueva Llei d’Educación pa incluyir un apartáu que permite la continuidá de la llingua asturiana nel sistema educativu.

En cuartu y quintu llugar, anque empataos en porcentaxe col 10% de votos caúna, l’estrenu de “Bernabé”, el primer llargumetraxe rodáu n’asturianu, del xoven director Pablo Casanueva, y la llegada del asturianu al Congresu los Diputaos, onde una propuesta d’Iniciativa pol Asturianu presentada como enmienda por Foru ya Izquierda Xunida, consiguió’l sofitu de tolos grupos menos PP y UPYD pa crear una partida pa l’Academia de la Llingua Asturiana nos presupuestos xenerales del estáu, como sí tienen les demás academies.

La emisión de la película “El Rostru Impenetrable”, doblada al asturianu, y que suponía la primer programación d’un filme na nuesa llingua na Televisión del Principáu d’Asturies algamó’l vienres un 5,1% de cuota de pantalla (share), asitiándose penrriba del últimu datu d’audiencia media de la TPA que finó’l mes de payares nel 4,8. ha tenese en cuenta la so emisión a les 22:45 d’un vienres, onde’l share ye siempres baxu en TPA y en vacaciones navidiegues onde los díes pa quedase en casa delantre la tele son otros.

L’aemisión tu 25 veces más audiencia qu’una serie como “El Faru” (0,20% de share) y superó l’audiencia media del día y de tol mes pasáu. Un programación más afayadiza y averada a un horariu de “prime time” duplicara o triplicara de xuru esi datu.

Per otra parte, nun pues escaezamos que la so promoción, pola canal, como asocede davezu con cásqieu tolos programas que s’emiten en llingua asturiana, foi proba dafechu y namái que dos díes antes, llegando a unviase información sobre la película a los medios como si fora en castellán, como ya alvirtieron dellos internautes en díes pasaos.

Tampocu nun pue escaecese que canales nuna llingua autonómica oficial como la desaparecida Canal 9 (4,2%) y otres como Telemadrid (3,9%) y Castilla-La Mancha Televisión (4,1%) tienen menos audiencia media que l’algamada pola emisión del western en llingua asturiana.

Una cadena cola audiencia amenorgando

La Xunta pola Defensa de la LLingua asoleyó esti día una nota de prensa felicitándose pola audiencia algamada: “La película tuvo ente los espacios más vistos del 27 d’avientu y namás foi superada poles ediciones del mediudía y la nueche del TPA Noticias y por otru programa n’asturianu: Güelos, qu’algamó un 6,5% d’audiencia. Los datos muestren la expectación que xeneró la emisión. Por exemplu, los espacios programaos enantes d’El Rostru Impenetrable tuvieron perbaxu de la media de la cadena –Date una vuelta 3,9% y Superasturianos 4,5%-. Per otru llau, la película de la tarde tamién tuvo perbaxu d’esta media, al quedar nun 4,4%.”

Pa la XDLA, el share de la película n’asturianu –que competía con dalgún de los programes de más éxitu de la televisión española- y de Güelos –hai que reseñar que yera una remisión- muestren que n’Asturies nun tien sentíu una televisión pública que nun reflexe la nuestra identidá y el nuestru idioma. Como muestra val que la emisión d’El Faro, telenovela en gallegu participada por TPA y que n’Asturies emítese doblada al castellanu, quedó nun testimonial 0,2%. Per otru llau, ye de reseñar l’audiencia social de la película –datos qu’analicen cómo l’audiencia interactúa col programa al traviés de les redes sociales-.

Asina, El Rostru Impenetrable, al traviés del hashtag #ElRostruImpenetrable, foi ún de los espacios más comentaos na nueche del vienres ente los usuarios de Twitter n’Asturies, xenerando más d’un 80% de comentarios positivos. Asina, muestren un grau altu d’aceptación ente la xente mozo, una audiencia que, según les encuestes, nun suel mirar la cadena pública.

Ente estos datos –l’aceptación pola audiencia del doblaxe, sobre too ente la mocedá-, la XDLA vuelve a pidir que la emisión d’esta película nun quede nun casu aisláu y sía’l puntu d’arrinque pal nacimientu d’una industria del doblaxe n’Asturies, coles consecuencies positives qu’esto tendría pal empléu nel sector audivisual. Asina, l’asociación quier volver a recordar la importancia de facer un apueste pola emisión de dibuxos animaos n’asturianu. Hai que destacar que TPA ye la única televisión europea d’una comunidá billingüe que nun emite programación pa los más neños na llingua propia. Amás, esta programación podría xugar un papel importante como material lúdico pa les clases d’asturianu.

Ye de reseñar que, nel mesmu horariu que TPA algama un 0,2% de share con El Faro, cadenes como TV3 o TVG llegaron al 30% d’audiencia cola emisión de series xaponeses d’animación como Dragon Ball o Shin-Chan. Pa la XDLA, la espectación xenerada con El Rostru Impenetrable muestra que nel nuestru país podría pasar dalgo asemeyao. Nesti contestu, la programación infantil n’asturianu pue convertise nesi puntu d’enganche que necesita la canal -qu’actualmente tien menos del 5% d’audiencia y arrecostina cola época de menos siguimientu de la so historia-. Asina, la emisión de dibuxos animaos nel nuestru idioma pue valir pa espertar la ilusión de los ciudadanos pola so televisión y aumentar l’audiencia, dalgo fundamental p’asegurar el futuru de la cadena y la so aceptación social.