Comunicación

‘El Comercio’ cambia de director. El diariu decanu de la prensa asturiana, editáu en Xixón, pasará a tar dirixíu por Íñigo Noriega, qu’anguaño desempeña llabores de dirección del periódicu vallisoletanu ‘El Norte de Castilla’. Noriega sucederá nel cargu a Juan Carlos Martínez Gauna, que repite’l trayectu fechu pol anterior director de ‘El Comercio’, Juan María Gastaca, y abandona Asturies pa incorporase al equipu directivu del diariu madrilanu ‘ABC’.

Nun procesu qu’ha enmarcase nos fluxos internos de personal dientro’l Grupu Vocento -antes Grupo Correo-, el relevu materializaráse nos prósimos díes, darréu que los trabayadores del diariu xixonés despidieren yá con una cena al entá director, Martínez Gauna, que según fontes de la redacción d’El Comercio’ dexa tres d’él una bona alcordanza.

El so pasu pol decanu de la prensa asturiana -que l’añu pasáu cumplió 125 años- foi breve: Gauna aportara a la dirección del periódicu xixonés hai agora dos años, garrando’l relevu de Juan María Gastaca, cuya xestión de seis años al frente del rotativu provocara una fuerte contestación sindical.

En fecha inminente, dambos sedrán compañeros nel ‘staff’ del diariu ‘ABC’, Gastaca como subdirector y Martínez Gauna en calidá de director adxuntu.

Hestoria d’El Comercio’ na so páxina web

El panorama de medios de difusión qu’empleguen l’asturianu como llingua vehicular cuenta dende’l pasáu vienres con una nueva emisora de radio on-line, frutu d’un conveniu firmáu ente la Universidá d’Uviéu, la empresa asturiana de telecomunicaciones Telecable y la páxina web Asturies.com, que se responsabiliza del funcionamientu cotidianu de les emisiones.

Nes primeres hores del nuevu mediu de difusión, les correspondientes a les emisiones en pruebes, la parrilla nútrese de temes musicales d’autores ya intérpretes asturianos, col envís de dir sumando nuevos conteníos en feches futures.

El nuevu serviciu radiofónicu on-line vien a contribuyir a facer medrar l’abanicu de medios n’asturianu, al que se sumó Asturnews.com cola so apaición na rede el pasáu 19 d’abril.

Alí Lmrabet, el periodista marroquí condergáu a tres años de cárcele por ultraxe a la figura’l monarca Mohamed VI, trai el so testimoniu a Asturies. Coincidiendo cola celebración del Día Internacional de la Llibertá d’Espresión, el comunicador magrebín ufrirá nel Auditoriu ‘Príncipe Felipe’ una conferencia vertebrada sobro dos conceptos de plena vixencia: L’islamismu y la propia llibertá d’espresión.

La intervención pública de Lmrabet n’Uviéu empezará a les 19 hores, pero l’axenda asturiana del periodista marroquín inclúi amás una xinta nun restaurante uvieín xunta’l conseyeru de Xusticia, Seguridá Pública y Relaciones Esteriores, Francisco Javier García Valledor; el presidente de l’Asociación de la Prensa d’Uviéu, José Antonio Rodríguez Fernández-Bron, y el redactor del centru territorial de TVE n’Asturies Xuan Cándano.

En Xineru pasáu, y depués de permanecer encarceláu más de siete meses na prisión de Salé, nos andurriales de Rabat, Ali Lmrabet recuperó la llibertá al ser indultáu pol rey marroquín, presionáu por una acxtiva campaña internacional pola lliberación del periodista como defensa de la llibertá d’espresión en Marruecos.

Web de sofitu a Ali Lmrabet

La futura radiotelevisión pública asturiana salta penriba del enésimu pilancu. El Conseyu de Ministros decretó na so xuntanza de güei retirar el recursu que’l Gobiernu de José María Aznar interpusiera énte’l Tribunal Constitucional, y que’l martes pasáu foi almitíu a trámite pol altu órganu xudicial. Tala midida, agora neutralizada, suponía la probable ‘conxelación’ del nacimientu de la tv asturiana nun plazu inicial d’hasta cinco meses.

Ensin embargu, l’escenariu col qu’empezara la selmana ye bien distintu al qu’agora se debuxa. Tal como daba por fecho el Gobiernu asturianu, rexíu pol PSOE col sofitu d’Izquierda Xunida-Bloque por Asturies, l’accesu de los socialistes al Executivu de Madrid tres les elecciones del pasáu 14 de marzu tradúxose a la fin na complicidá del Gobiernu central pa qu’a la fin eche a andar la rediotelevisión pública asturiana, dafechu repudiada pol PP al considerala cara ya innecesaria.

La pelota vuelve agora pa cancha asturiana, yá que’l siguiente pasu ye’l nomamientu del conseyu d’alministración del futuru ente públicu. El recursu que retira José Luis Rodríguez Zapatero referíase precisamente a esi puntu, yá que el PP decidiera impugnar nel Constitucional un cambiu llegal ensertáu pol Principáu na Llei d’acompañamientu de los presupuestos, pensáu ‘ad hoc’ pa que’l conseyu de la tv puea constituyise ensin los representantes que-y correspuende nomar al PP.

La negativa de los conservadores a designar a los sos representantes, que previsiblemente se mantenga, venía bloqueando el nacimientu del ente públicu de comunicación, que nel primer Gobiernu de Vicente Álvarez Areces permaneció somorguiáu nel escaezu por mor d’engarradielles internes ente distintes facciones de la Federación Socialista Asturiana.

La retirada del recursu almitíu a trámite pol Tribunal Constitucional permitirá-y al Gobiernu asturianu poder cumplir coles sos previsiones y poner a furrular la radiotelevisión asturiana na prósima seronda con un allugamientu provisional na Universidá Llaboral de Xixón.

La futura radiotelevisión autonómica asturiana choca col enésimu pilancu nel espinosu camín p’hacia el so nacimientu. El Tribunal Constitucional almite a trámite el recursu d’inconstitucionalidá que’l Gobiernu de José María Aznar presentara en febreru contra les alusiones a la tv incluyíes na Llei d’Acompañamientu de Presupuestos del Principáu, lo que nuna primer fase pue postergar la constitución del nuevu ente de comunicación hasta cinco meses.

Esi ye’l plazu que tien agora l’Altu Tribunal pa decidir si-y da la razón al PP y anula les disposiciones del Principáu o si, pol contrariu, archiva les dilixencies y dexa vía llibre pa qu’eche a andar la radiotelevisión pública asturiana, que’l Gobiernu autonómicu quería tener en marcha na prósima seronda.

L’escenariu llegal ye más complicáu que too eso: El cambiu de signu políticu nel Executivu central, qu’agora preside’l PSOE, favocerá con toa probabilidá la renovación del marcu normativu estatal que rixe’l funcionamientu de los medios de comunicación de titularidá pública, con lo que la llei de la tv asturiana podría vese modificada -siguiendo la llegalidá estatal- en puntos como’l decisivu nomamientu’l director del conseyu d’alministración.

Esi foi precisamente l’orixe del recursu presentáu pol propiu José María Aznar, yá que’l PP asturianu alitara la impugnación del cambiu llegal ‘coláu’ pol Gobiernu’l Principáu na Llei de Midíes Presupuestaries, Alministratives y Fiscales -d’acompañamientu de los presupuestos- n’avientu pasáu al albidrar que l’Executivu asturianu estrallimitábase al regular a so propia conveniencia el procedimientu pa nomar al conseyu del futuru ente públicu.

En concreto, la llei del Principáu daba vía llibre a la constitución del conseyu d’alministración de la tv asturiana con a lo menos ocho de los sos quince miembros, nomaos por a lo menos dos grupos parlamentarios. O lo que ye lo mesmo: La llei ye un textu escritu ‘ad hoc’ pa que PSOE y IX pudieren echar a andar la televisión ensin la participación del PP, que cola so negativa a apoyar un ente de comunicación que-y paez caru y superfluu vien torgando’l nacimientu de la tv asturiana dende hai años.

La resolución del Constitucional, publicada nel Boletín Oficial del Estáu cola firma’l maxistráu Manuel Jiménez de Parga, vuelve a poner en suspensu el llargu partu de l’autonómica, somorguiada nel escaezu durante’l primer Gobiernu de Vicente Álvarez Areces por mor d’engarradielles internes ente les estremaes facciones de la Federación Socialista Asturiana (FSA).

“Lamas-Santi” por “Lamasanti”, “Avivélez” en cuenta de “Viavélez” y “Juani de Avilés” pa referise al malográu cantante de tonada Juanín de Mieres. Talos despropósitos verbales correspuénden-yos a miembros del equipu directivu del centru territorial de Televisión Española n’Asturies, según un estensu informe que trabayadores del centru tán acabante presentar pa denunciar manipulación y deterioru informativu.

Según esi testu, el director del centru territorial de TVE n’Asturies, José Antonio Ovies, respondió coles entrugues “¿Ónde ta Bual?” y “¿Quién yera Bousoño?” a la propuesta d’un trabayador de cubrir el nomamientu del poeta y académicu Carlos Bousoño -inda vivu- como Fíu adoptivu de Bual. Na mesma llinia de desconocencia l’entornu, los trabayadores aseguren que miembros del equipu de dirección llegaron a entruga-yos si A Veiga d’Eo pertenez a Asturies, y que’l mesmu Ovies pidió al Archivu, en setiembre de 2003, imáxenes “de ese Juani de Avilés”, n’alusión al malográu cantante de tonada Juanín de Mieres.

El respetu a la toponimia tampocu nun sal bien paráu nel informe de los trabayadores de TVE n’Asturies, que rexistraron cómo se dicía n’antena “Avivélez” pa referise a la llocalidá de Viavélez en febreru de 2003, el mesmu mes nel que se pronunciaba dos vegaes siguíes “La Corredoría”, en cuenta de “La Corredoria”.

Esa ignorancia que los trabayadoren-yos atribúin a los sos directivos tradúzse tamién nel silenciamientu d’actos talos como la presentación del primer discu en solitariu de Chus Pedro Suárez, veteranu vocalista de Nuberu, porque la editora de TVE-Asturies “nun conocía” al músicu. En payares del pasáu 2003, un accidente mineru achacóse n’antena a un “derrame”, en llugar de falar d’un derrabe de carbón.

El panorama complétase con una atención que los trabayadores del centru territorial xulguen “bochornosa” a fechos noticiables dafechu ayenos al ámbitu asturianu aliñaos con falta d’ética profesional, como prueba la emisión nel informativu del mediudía, n’ochobre de 2003, d’una información surdida nun congresu xerontolóxicu en Salamanca, según la cual gran parte de les muyeres vieyes nunca nun esperimentó un orgasmu. Esa noticia ilustrábase en pantalla con unes imáxenes d’archivu d’una pareya d’ancianos asturianos que tiempu atrás accediere a contar énte les cámares cómo se conocieren nuna residencia y decidieren casase.

Web del centru territorial de TVE n’Asturies

El director del centru territorial de Televisión Española n’Asturies, José Antonio Ovies, grabó na viéspora de la fuelga xeneral del 20 de xunu de 2002 un informativu ‘inventáu’ con datos ficticios de siguimientu de la protesta, que nun llegó a emitise por presiones de los trabayadores del centru. Asina lo asegura un informe ellaboráu pola plantiella de TVE-Asturies, documentu qu’Asturnews va ufrir íntegru na so edición del domingu.

Según el testu -una recopilación d’exemplos de manipulación y deterioru informativu atropaos por trabayadores del centru asturianu de TVE-, Ovies grabó’l 19 de xunu l’informativu del día siguiente, apoyándose n’imáxenes d’archivu y noticies ‘inventaes’ pa dar cuenta d’una fuelga xeneral qu’habría empezar hores depués de la grabación.

Siempre según l’informe, la pieza nun llegó a emitise por presiones de los propios trabayadores, y Ovies accedió a informar el mesmu 20 de xunu sobro’l desarrollu de la fuelga, cuya repercusión rebaxó’l director notablemente énte les cámares. Yá el 17 de febreru de 2002, una concurrida manifestación sindical xunitaria previa al 20-X apaeciera nos informativos de TVE-Asturies na sección de breves, y eso depués del emperruñamientu d’un miembru de la redacción, yá que la noticia nin siquiera diba emitise.

Son dos exemplos de la denuncia de males práctiques informatives que denuncia’l comité d’empresa de TVE n’Asturies nun informe qu’Asturnews va ufrir íntegru na so edición del domingu 25 d’abril.

Ente les acciones de manipulación citaes nel documentu apaecen la emisión d’un falsu asaltu con destrozos a la sé’l PP n’Uviéu tres d’una manifestación contra la guerra d’Iraq -con plena conocencia previa de la falsedá de la noticia-, el silenciamientu d’un abuchéu a José María Aznar n’Uviéu qu’algamó repercusión en tolos medios nacionales y l’apertura del informativu territorial asturianu del 27 d’ochobre de 2003 cola noticia -d’ámbitu madrilanu- de la victoria d’Esperanza Aguirre nes elecciones de Madrid.

Amás de dirixir el centru territorial de TVE n’Asturies, allugáu en San Esteban de les Cruces, José Antonio Ovies presenta l’informativu del mediudía y actúa ‘de facto’ como xefe d’informativos, depués de qu’esa figura desapaeciere nel centru en setiembre de 2002.

Web de Televisión Española n’Asturies

El diariu dixital Asturnews ye dende güei, 19 d’abril, una realidá na dirección d’Internet www.asturnews.com, onde ta a disposición de los llectores con calter continuu, abiertu y gratuitu. Dirixida por Próspero Morán y editada dafechu en llingua asturiana, la nueva publicación naz col envís d’usar con normalidá l’asturianu pa informar de la cultura’l país con criteriu periodísticu.

Asturnews nútrese esencialmente de noticies referíes al ámbitu cultural, nes sos distintes manifestaciones, pero tamién ufre información de servicios, centralizada nuna axenda de cites culturales organizada según llugar o asuntu, ya inclúi un rellatu collectivu ellaboráu en comuña por estremaos autores del país.

Los titulares del nuevu diariu dixital son consultables dende’l teléfonu móvil, en tantu que los conteníos publíquense acordies con una política de ‘copyleft’ que permite la llibre reproducción de les informaciones d’Asturnews col únicu requisitu de citar al diariu como fonte’l textu. L’oxetivu d’esta política ye promover la llibre circulación de textos periodísticos en llingua asturiana ensin torgues pa la difusión del idioma.

Aprovechando les potencialidaes d’Internet, Asturnews incorpora amás la posibilidá de comentar una noticia o unviala nel actu por corréu ellectrónicu. L’usuariu tien, asinamesmo, la posibilidá de suscribise a un boletín selmanal gratuitu que-y informará, na so cuenta de corréu, de les principales cites culturales de la selmana en cursu.

Ibias ultima la so XIII Selmana de la Comunicación, que tendrá llugar ente’l 3 y el 9 de mayu y qu’esti añu incorpora como novedá la tresmisión en directu de 30 hores de les actividaes previstes nel programa, que llegarán a cualquier puntu’l mundu gracies a Internet y al usu d’una conexón vía satélite. Sedrán en total doce hores diaries d’actividá, estremada en ponencies, talleres y alderiques, destinaes a romper col aislamientu xeográficu qu’Ibias sufre por mor del so allugamientu nel estremu surodiccental d’Asturies.

Amás de la tresmisión en tiempu real, que podrá vese na dirección web www.educastur.princast.es, el programa d’actos pa esta edición, qu’esta mañana se presentó formalmente n’Uviéu col sofitu’l conseyeru d’Educación y Ciencia, José Luis Iglesias Riopedre, inclúi amás sendos actos d’homenaxe a los medios de comunicación y a los máximos responsables educativos qu’exercieron n’Alministración asturiana na democracia reciente.

Destacaos profesionales personaránse n’Ibias pa sofitar cola so presencia el programa d’actividaes, durante y depués de la XIII Selmana de la Comunicación. Ente ellos tarán los responsables del veteranu programa de Radio Nacional d’España ‘Clásicos Populares’, qu’acaba reafitase como meyor programa de música clásica nos recientes Premios de la Música y que s’emitirá en directu dende Ibias el 17 de mayu prósimu.

La organización de toles actividaes cuerre a cargu’l colexu públicu d’educación básica -infantil y primaria- ‘Aurelio Menéndez’, que cuenta con cientu d’alumnos y qu’esti añu cellebra’l décimu aniversariu de TV Connio, el canal educativu que’l centru echó a andar en 1994.

L’alcuentru ‘Les otres cares del planeta’, qu’entama en Xixón l’Asociación de Cooperación col Sur Acsur-Las Segovias, echará una güeyada especial a la manipulación informativa nos medios de titularidá pública. L’Asociación para la Investigación y Desarrollo de la Cultura Audiovisual (Aideka) amosará al traviés d’un estudiu propiu cómo trataron los servicios informativos de Televisión Española la fuelga xeneral del 20 de xunu de 2002 y la guerra d’Iraq.

Aideka presentará’l documentu nun taller abiertu a la participación del públicu que se cellebrará nel Antiguu Institutu de Xixón el sábadu 24 d’abril, cola conclusión central de que los estremaos Gobiernos centrales nun quixeron considerar a RTVE un mediu públicu al servicio de la ciudadanía, sinón que la esplotaron como arma de desinformación masiva.

El taller d’Aideka ye parte d’una xornada d’actividaes nes qu’habrá llugar tamién pa la ecoloxía, la educación y la inmigración nel cine español. D’eses tres estayes ocuparánse otros tantos talleres, conducíos respetivamente por Ecoloxistes n’Aición, Miguel Argibay y el Grupu Eleuterio Quintanilla.

Pa poder participar nuna de les actividaes ye preciso apuntase previamente nel llocal d’Acsur-Las Segovias, allugáu na cai Instituto, 13-1º, 33201-Xixón. La inscripción pue formalizase tamién nel númberu de teléfonu y fax 985351350, o nes direcciones de corréu ellectrónicu educacion.asturies@nodo50.org y ecoloxistes.asturies@nodo50.org

Páxina web de l’asociación Aideka