Comunicación

Una bona riestra d’espertos en periodismu dixital desendolquen esta selmana en Vilanova i la Geltrú (Cataluña) la Segunda Selmana de los Medios Dixitales, un seminariu que continuando cola esperiencia de xunetu de 2003, axunta a 40 profesores universitarios y profesionales del periodismu dixital na “Escola Universitària de la UPC a Vilanova” y quier ufiertar formación de vanguardia na estaya periodística. Ente los ponentes, especialistes españoles ya internacionales d?abondu prestixu, figura’l director d’Asturnews, Próspero Morán.

Les sesiones d’esta Segunda Selmana de los Medios Dixitales amiesten ponencies y actividaes práctiques y entamaron el martes 22 cola participación de Javier Díaz Noci (de la EHU-UPV, Universidá del País Vascu) y Nora Paul (Universidá de Minnesota), que falaron alrodiu de los nuevos xéneros periodísticos. Los modelos d’organización nes redacciones dixitales foi la tema de la que falaron Ismael Nafría (consultor) y Boris Razon (Le Monde Interactif), a los que siguieron Joan Rosés (CCRTVi) y Xavier Patau (Consultor), con ponencies alrodiu de los conteníos y la so xestión; y Sal Atxondo (Claro Studio) y Laura Ruel (Eyetrack Project), que falaron sobre l’usuariu y el conocimientu de l’audiencia pa xenerar servicios empobinaos a públicos especificos.

El programa d’esti xueves 23 de Setiembre entama cola tema “Estudis de viabilitat dels projectes empresarials per segmentació d’audiències”, nuna sesión na que van intervenir el director d’Asturnews y profesor de la Universidá Carlos III de Madrid, Próspero Morán, y Albert Cuesta, de CanalPDA. Darréu d’ello, abordaráse la personalización de los conteníos Vin Crosbie (de Digital Deliverance); falarán del periodismu participativu Sílvia Llombart (laMalla.net), Chris Willis y Shayne Bowman (Informe WeMedia); y disertarán sobro la sindicación de conteníos David Poblador (Puntbarra.com) y Christian Serarols (iMente).

Sitiu del Grupu de Medios Dixitales

El modelu informativu y de negociu del diariu cultural dixital en llingua asturiana Asturnews presentóse güei en Vilanova i la Geltrú dientro’l programa de la Selmana de los Medios Dixitales que se desendolca entamada pola UPC y el Grup de Periodistes Digitals. La política de Copyleft d’esti diariu, el so enfotu didáuticu y el formatu informativu ya hipertextual qu’emplega foron la cadarma d’una de les ponencies presentaes.

El director d’Asturnews, Próspero Morán, fizo una curtia descripción de les calterístiques principales de la publicación dixital y desplicó l’adaptación de la mesma al enfotu normalizador que dende’l puntu de vista llingüísticu se plantega’l diariu dixital en llingua asturiana. La cadarma informativa y la orientación na xestión de los conteníos, amás d’otres cuestiones que cinquen al calter periodísticu del proyeutu y a la segmentación de l’audiencia, foron les estayes cimeres de la presentación, que pue descargase equí pa la so visualización, xunta una grabación completa de la intervención de Próspero Morán.

El programa d’esti xueves 23 de setiembre de la Selmana de los Medios Dixitales de Vilanova i la Geltrú entamaba cola tema ‘Estudis de viabilitat dels projectes empresarials per segmentació d’audiències’, nel que’l director d’Asturnews intervenía xunta Albert Cuesta, de CanalPDA.

Darréu d’ello falábase de la personalización de los conteníos con Vin Crosbie (de Digital Deliverance); del periodismu participativu, con Sílvia Llombart (laMalla.net), Chris Willis y Shayne Bowman (Informe WeMedia); y de la sindicación de conteníos, con David Poblador (Puntbarra.com) y Christian Serarols (iMente).

L’alderique sobro los nuevos modelos de periodismu dixital treslládase a Cataluña

Más cursos de llingua asturiana p’atender la demanda de los trabayadores de los medios de comunicación. La Universidá d’Uviéu, en comuña cola Oficina de Política Llingüística, plantégase convocar nuevos monográficos nel segundu cuatrimestre, depués que les 35 places pal primeru de los cursos quedaren cubiertes nos primeros seis díes naturales del plazu de matrícula.

Asina, el periodu d’inscripción abrióse’l pasáu 9 d’ochobre y, depués de rexistrar 15 matrícules na primer xornada, completó les 35 places ufiertaes nel cuartu día hábil pa la matriculación, el pasáu martes. Poro, el cursu de llingua asturiana nel ámbitu de la información y la comunicación, dirixíu por Xulio Viejo, desendolcaráse ente’l 1 d’ochobre y el 13 de payares n’Uviéu y Xixón col aforu completu.

La Universidá y la Oficina de Política Llingüística tendrán una segunda ocasión de valorar l’ésitu de la so convocatoria específica pa formar periodistes nel usu del asturianu a partir del prósimu 29 d’ochobre, día en que quedará abiertu’l plazu pal segundu de los cursos previstos nesti cuatrimestre: un monográficu especializáu en comunicación audiovisual nes situaciones de minorización llingüística.

La conseyera de Cultura, Comunicación Social y Turismu, Ana Rosa Migoya, presentó’l pasáu 9 de setiembre los cursos empobinaos a periodistes como un preséu útil pa capacitar a profesionales qu’usen l’asturianu nos medios de comunicación, un entornu fundamental pal caltenimientu d’un idioma.

Migoya: “Ye una obviedá que l’asturianu tará presente na radio y na televisión autonómiques”

Los asturianos tamos a la cabeza de les comunidaes autónomes del Estáu Español na llectura de prensa, con un 59,9% de los mayores de 14 años lleendo davezu la prensa diaria. El Principáu d’Asturies, la Comunidad Foral Navarra y el País Vascu somos les tres Comunidades que más lleen de tol Estáu, onde la media ye del 39,7%.

En Navarra lleen periódicos el 57,3% de los mayores de 14 años, y nel País Vascu’l 54%, pero nes dos comunidaes bien amenorgándose la cifra nos últimos dos años. Los vascos yeren hasta hai poco los habitantes del Estado español que más periódicos lleíen, sigún los datos del Instituto Nacional de Estadística de España (INE). La situación en País Vascu ye especialmente significativa, porquela llectura de periódicos baxó nestos dos años del 59,3% del estudiu del INE de 2002, al actual 54%.

Nel otru cabu alcuéntrense les comunidaes con menor porcentax de llectores de prensa: Castilla La Mancha ( 22,4%), Andalucía (28,1%), Valencia (29,3 por cientu), Murcia (31,1%) y Extremadura (32,3%).

Los datos del INE dexen nidio, amás, que na zona norte d’españa ye onde más persones lleen la prensa diariamente y na metá sur onde menos.

“Ye una obviedá que l’asturianu va tar presente na televisión y na radio autonómiques”, nos términos y proporción que marque’l conseyu d’alministración del ente. Asina lo aseguró esta mañana la conseyera de Cultura, Comunicación Social y Turismu, Ana Rosa Migoya, na presentación n’Uviéu de dos cursos d’asturianu pa periodistes entamaos pol Principáu y la Universidá d’Uviéu y que na primer hora’l plazu de matriculación rexistraron 15 inscripciones pa les 35 places disponibles.

Nuna intervención dafechu en llingua asturiana, Migoya tildó de “impensable” el fechu de qu’esi idioma puea espoxigar ensin tener una presencia afayadiza na prensa escrita, radio ya internet, y “pa ello faen falta profesionales” capaces d’emplegar l’asturianu de forma adecuada.

Magar d’ello, la conseyera nun concretó si’l títulu que recibirán los participantes nos dos cursos d’Estensión Universitaria sedrá o non consideráu especialmente na esbilla de la plantiella de periodistes qu’entrarán a trabayar nel futuru ente públicu de comunicación. Migoya dexó entever qu’esi ye’l “deseyu” de la Conseyería, pero refugó precisar más allá d’una frase xenérica: Los títulos tendrán “la mesma validez p’acceder a la tv autonómica que p’acceder a otros medios de comunicación”.

Nuna andecha pionera ente la Conseyería de Cultura y la Universidá, güei quedó abiertu’l plazu de matrícula pal primeru de los cursos, un monográficu de primer nivel de llingua asturiana nel ámbitu de la información y la comunicación que va desendolcase ente’l 1 d’ochobre y el 13 de payares n’Uviéu y Xixón.

El director d’esti cursu, Xulio Viejo, felicitóse de les posibilidaes que la doble ufierta formativa abre pa difundir l’usu de l’asturianu “en niveles de dignidá afayadizos”, n’especial nun contestu enrarecíu, señaló, nel que los profesores de Llingua siéntense delles vegaes como si enseñaren Llatín, una llingua con escasa presencia cotidiana.

El segundu de los cursos, especializáu en comunicación audiovisual en situaciones de minorización llingüística, cellebraráse del 26 de payares al 22 de xineru -con matrícula a partir del 29 d’ochobre- y tará dirixíu pol docente universitariu Xuan Busto. Ente’l profesoráu figuren, amás, el director d’Asturnews y docente na Universidá Carlos III de Madrid, Próspero Morán; y los profesores Emilio Fernández Peña y María José Cantalapiedra.

Los dos cursos d’Estensión Universitaria foron presentaos esti mediudía nel edificiu hestóricu de la Universidá, nun actu al qu’asistieron, amás de Migoya, Viejo y Busto, el director de la Oficina de Política Llingüística’l Principáu, Ramón D’Andrés; y la vicerrectora d’Estensión Universitaria, Paz Andrés. Esta última ufrió la “disposición másima” la Universidá p’afitar la enseñanza de la llingua asturiana.

La Universidá programa por primer vegada dos cursos especializaos de llingua asturiana pa periodistes

Sandra, con 28 años, adientróse esti domingu 5 na casa de Gran Hermano falando asturianu dafechu y presentándose tamién en llingua asturiana nel vídiu de presentación que fai esti programa de Telecinco qu’entamaba esti domingu primeru de setiembre la so sesta edición. Sandra, que yera la segunda asturiana qu’entraba na casa de Gran Hermano d’anguaño depués del xixonés Nicky, ye un bon exemplu de munches y munchos neños que ñacieron en Francia o Bélxica y que depredieron el “castellán” que falaba so ma, que nun yera talu sinon asturianu dafechu. Nun hai más que sentir a la má de Sandra pa dase cuenta del bon acentu asturianu que tien. Un acentu que ye menos ñatural nuna rapaza qu’espolleta en Francia y vivi en Benidorm, pero a la que-y presta falar asturiano cola normalidá del que fala la llingua que más siente.

La entrada de Sandra foi un torbellín nel que dexó bien nidio que l’asturianu esiste y ye una llingua de comunicación con frases costantes de costrucción asturiana. Nel vídiu de presentación, depués de pedir una botellina sidra nel chigre que tien so má en Benidorm, dexó bien claro que fala asturianu: “Tamos equi na sidrería la mio má en Benidorm onde voi a tomar la mio sidrina”, anque la ma dexó bien nidio qu’a lo que diba yera “a moñase colos amigos y a ayudar a mamá pa na”.

Sandra respuende perfectamente al perfil de la mocedá asturiana: gayolera, galana y coles idegues mui nidies: “Nun trabayé nunca… Consiguiéronme siempre tolos mis caprichos… porque soi mui caprichosa”.

La programación televisiva de la seronda va tener una bona riestra de protagonistes asturianos, depués de qu’esti domingu entrara tamién Nicky na casa de Gran Hermano y de qu’ún de los más afamaos cocineros asturianos, Jose, s’anunciare como’l nuevu Arguiñano de la televisión pública. Dende esti domingu día 5 de setiembre pela nueche, Nicky sedrá l’otru protagonista asturianu y darréu d’ello de l’actualidá del corazón n’Asturies por mor de la so participación en “Gran Hermano” . Nicky ye un rapaz de Xixón qu’enantes foi rapaza y que gracies a la melecina y a munches operaciones ye agora un home, sigún desplicó elli mesmu nun vídiu de presentación.

La entrada de Nicky na casa de Gran Hermano garantiza la presencia constante d’esti xixonés y de Sandra, l’asturiana de fala y de corazón, anque viva en Benidorm, nos medios audiovisuales y na prensa a lo llargo d’esti mes de setiembre.

Artículu d’opinión: “Tiémblenme les pates”

Les emisores radiofóniques de cálter llibre qu’ufierten programación n’asturianu davezu tan faciendo llamamientos a tolos interesaos pa que propongan proyectos de programes qu’incluir na nueva programación d’esti añu. Tanto Radio Sele n’Uviéu como Onda Peñes en conceyu Gozón faen abierta esa convocatoria, que tien a la llingua de nueso como referente cimeru.

“Onda Peñes. Facer Radio” ye una emisora que punxera en marcha hai tiempu la Asociación Cultural El Gaxarte y tolos años llama a los interesaos en facer radio a presenta-yos proyectos de programes pa preparar la so programación de seronda, inviernu y primavera. Esti añu, como ya asocediera nel anterior van tener preferencia los que tean n’asturianu y los que nun seyan exclusivamene musicales y dan de plazu hasta’l 15 de setiembre. Los interesaos puen unviar los proyectos al Apartáu de correos 94, 33440-Lluanco o al corréu elletrónicu ondes@gaxarte.com. Les consultes puen facese tamién al teléfonu 985882626.

Y lo mesmo ta faciendo Radio Sele, que fai un brinde a tolos interesaos en facer radio n’asturianu a ponese en contactu con ellos cola fin de preparar la parrilla d’esta temporada que vien. Nel casu de la única emisora llibre dafechamente n’asturianu qu’entamara a emitir n’Asturies, ye requisitu que’l proyectu de programa tea empobináu a la normalización del asturianu. Pue llamase al so teléfonu, 984211684 y dexar una forma de contactu si nun tan. Tamién se pue unviar un fax al mesmu númberu o un corréu elletrónicu a radiosele@asturies.org . La so páxina web ye www.radiosele.net.

Xiru na estratexa’l Partíu Popular sobro la futura radiotelevisión pública asturiana. El PP, que llevó la so oposición firme a la creación del ente hasta’l Tribunal Constitucional, considera agora “inevitable” la puesta en marcha de la tv autonómica y estudia desbloquear la constitución del conseyu d’alministración del ente nomando a los sos representantes, según fontes citaes por Radio Nacional d’España.

Acordies cola información emitida pola rede d’emisores de la cadena pública n’Asturies, los conservadores prevén dar un xiru p’hacia el pragmatismu y, yá que la radiotelevisión pública va ser un fechu -les emisiones regulares entamarán a mediaos de 2005-, estudien tener presencia nel muérganu que tomará les principales decisiones sobro’l funcionamientu de la tv.

Hasta agora, el PP negábase dafechu a nomar a los sos representantes nel conseyu d’alministración pa torgar asina la creación d’una empresa pública que se-y abulta cara ya innecesaria. Esa negativa sistemática llevó al Gobiernu autonómicu PSOE-Izquierda Xunida-Bloque por Asturies a llevar alantre una modificación na llei que rixe la composición y el llabor del conseyu, llei qu’impugnó énte’l Constitucional el Gobiernu de José María Aznar y que postergó por enésima vegada la creación de l’autonómica hasta que’l nuevu Executivu socialista de José Luis Rodríguez Zapatero retiró esi recursu al llegar a La Moncloa.

El Gobiernu autonómicu ultima’l proyectu d’habilitación del vieyu conventu de la Universidá Llaboral de Xixón como sé de la futura tv autonómica, que llanzará una señal en prebes a finales d’esti añu pero que nun podrá tener una programación estable hasta mediaos de 2005, depués que se nome al equipu xestor y s’esbille a la plantiella.

Según les previsiones del Executivu, l’ente públicu asturianu -integráu por televisión, radio y un portal públicu d’información n’internet- emitirá a lo menos hasta 2010 dende esi primer allugamientu en Xixón, qu’inclúi unes instalaciones dixebraes en dos plantes y un plató de 200 metros cuadraos.

Euskal Telebista adelántase al proyectu asturianu de portal dixital públicu

Asturies entra nel circuitu de los diarios gratuitos de gran tirada. El grupu de comunicación Recoletos, que xestiona ente otres cabeceres Marca, Expansión, Diario Médico y Gaceta Universitaria, prevé editar n’Uviéu antes de fin d’añu un nuevu periódicu gratuitu, dientro d’un proyectu estatal qu’inclúi la publicación de los conteníos d’esi diariu n’otres 14 capitales.

La cabecera uvieína sedrá xeneralista y enmárcase nuna iniciativa que tendrá una tirada conxunta d’un millón d’exemplares, con presencia -amás d’Asturies- en Madrid, Barcelona, Alicante, Sevilla, Zaragoza, Mallorca, Bilbao, San Sebastián, Málaga, Valladolid, Pamplona, A Coruña, Murcia y Valencia. El procesu de selección de periodistes yá ta abiertu.

La irrupción del grupu Recoletos na prensa de papel gratuita supondrá, si a la fin se confirma’l proyectu nos términos nos que ta plantegáu, nel fin del predominiu de los dos grandes grupos del sector, los editores de les publicaciones ’20 minutos’ y ‘Metro’, presentes en siete ciudaes del Estáu.

Orixináu en 1977 y presidíu por Jaime Castellanos, el grupu Recoletos emplega a 1.200 trabayadores y edita les publicaciones periódiques Marca, Expansión, Actualidad Económica, Telva, Diario Médico y Gaceta Universitaria.

Web oficial del grupu Recoletos

El periodista francoarxelín Jean Daniel, veteranu director del selmanariu ‘Le Nouvel Observateur’, renomáu ensayista y collaciu de los pensadores Albert Camus y Michel Foucault, ye’l nuevu ganador del Premiu ‘Príncipe de Asturias’ de Comunicación y Humanidaes, falláu esti mediudía n’Uviéu, pol so “compromisu cola verdá” y la so independencia respecto al poder políticu.

Nesos términos xustifica’l xuráu el so veredictu, que distingue a Daniel por edificar un llabor “fondamente reflexivu y críticu que recueye l’heriedu intelectual, el coraxe y el rigor éticu d’autores como Albert Camus o George Orwell”. Por too ello, el xuráu eloxa al comunicador francés como un ilustre representante del meyor periodismu humanista.

Nacíu en 1920 na llocalidá arxelina de Blida -al norte’l país- y titular de la ciudadanía francesa, Jean Daniel ye llicenciáu en Filosofía pola Universidá de La Sorbona y trabayó na Presidencia’l Conseyu de Ministros, collaboró nel diariu Le Monde, y foi miembru’l Conseyu de l’Axencia France-Presse.

Autor d’abondes y premiaes obres lliteraries -ente elles ‘L’error’, ‘Diariu d’un periodista’, ‘El tiempu que queda’ y la más reciente ‘L’amigu inglés’-, dirixe dende 1978 ‘Le Nouvel Observateur’ y ta consideráu ún de los intelectuales franceses más influyentes ya insobornables n’asuntos centrales como’l fin de la utopía marxista, la guerra d’Arxelia, la engarradiella ente Palestina ya Israel, la descolonización d’África, les dictadures n’Europa ya Hispanoamérica y más recientemente el terrorismu y les nueves guerres.

Amás de la candidatura de Daniel, presentada pola editora Beatriz de Moura, fundadora de la casa Tusquets, a les votaciones finales llegaron tamién los nomes del tamién periodista norteamericanu Bob Woodward, clave nel asoleyamientu del escándalu ‘Watergate’ que valtió’l gobiernu’l presidente norteamericanu Richard Nixon; el críticu lliterariu alemán Marcel Reich-Ranicki, y l’hestoriador y sociólogu australianu Robert Hughes.

El Premiu ‘Príncipe de Asturias’ de Comunicación y Humanidaes 2004, al qu’optaben 19 aspirantes y que l’añu pasáu recayó ‘ex-aequo’ nel comunicador polacu Ryszard Kapuscinski y nel teólogu peruanu Gustavo Gutiérrez Merino, ye’l cuartu de los ocho galardones que la Fundación ‘Príncipe’ concede na XXIV edición de los premios, correspondiente a esti añu.

El nome de Jean Daniel completa l’ecuador d’un palmarés nel que yá figuren l’escritor y xermanista italianu Claudio Magris, ganador del ‘Príncipe’ de les Lletres; un quintetu plurinacional d’oncólogos, distinguíos na estaya d’Investigación Científica y Técnica; y l’economista norteamericanu Paul Krugman, premiáu en Ciencies Sociales.

Según establez la normativa interna de la Fundación ‘Príncipe’, el premiu ‘Príncipe de Asturias’ de Comunicación y Humanidaes reconoz el llabor de relieve internacional de persones o collectivos destacaos na creación o la investigación de les dos estayes que-y dan nome al galardón.

Últimu númberu de ‘Le Nouvel Observateur’ n’internet