Comunicación

El diputáu del grupu popular Fernando Goñi dio ayer a conocer a los medios la cantidá que cobraríen los miembros del Conseyu d’Administración del ente de radiotelevisión autonónica: 1000 euros por cada aconceyamientu, una cantidá que’l PP considera “un auténticu escándalu que demuestra cómo les gasten los socialistes con una televisión que prometíen austera”. Pela so parte el Gobiernu del Principáu, al través de la Conseyería de Cultura, Turismu y Comunicación Social, fizo públicu un comunicáu nel que retruca les acusaciones de los populares afirmando que TV4 ye “independiente” del executivu y que poro ésti “nun valora les decisiones que son responsabilidá esclusiva del Ente Públicu de Comunicación”.

Pal Partíu Popular la cantidá cobrada por cada miembru del órganu executivu de TV4 en conceptu de dieta por asistencia a les reuniones “ye escandalosa, de les más altes de toles televisiones autonómiques”. Según los cálculos difundíos pol diputáu Goñi, dende la so constitución los conseyeros del Ente Públicu de Comunicación enbolsaríen un total de 36.000 euros por asistir a los aconceyamientos.

Saliendo al pasu d’estes acusaciones la Conseyería de Cultura, Turismu y Comunicación, remítese a la Llei de Medios de Comunicación Social aprebada pol parlamentu asturianu na que “desarróllase un modelu de televisión absolutamente independiente del gobiernu”, polo que l’executivu considera “responsabilidá esclusiva” del propiu Conseyu l’asignación de dietes, talo señala l’artículu 6 de dicha llei, qu’atribúi a esti órganu la fixación de dietes “dientro los límites presupuestarios”. La soberanía del Conseyu d’Administración ye’l principal argumentu del gobiernu del Principáu pa refugar pronunciase sobre l’asuntu.

El PP na so denuncia compara la cantidá fixada pa les dietes de los conseyeros de la radiotelevisión autonómica, 1000 euros, coles d’otros órganos asemeyaos de les distintos entes públicos y ufierta los datos de que namás TeleMadrid la supera con 1265 euros, a la que siguen Baleares con 900 euros, el País Vascu con 360 o la casi simbólica dieta de la radiotelevisión canaria: malpenes 59 euros.

Los trabayadores de Telemadrid denunciaron esti martes 15 de marzu “la manipulación ifnormativa” que supunxo la emisión del reportaxe especial “11-M: un año después” que conduxo l’ex-director del Centru Territorial de TVE n’Asturies José Antonio Ovies. El periodista asturianu ye anguañu subdirector d’informativos y entamaba’l reportaxe nun planu mediu entrugando ente otres coses “Quién foi’l primer periodista que dixo qu’ETA yera la culpable del atentáu, qué políticu entamó a falar d’Al Qaeda, o quién planificó los SMS y a qué hora exactamente”. Los Comités d’Empresa del Ente Públicu de Telemadrid y Onda Madrid asoleyaron un comunicáu nel que rechazaben esta “manipulación informativa”, porla “nidia intencionalidá del caberu reportaxe: ufrir sospeches de que los resultaos ellectorales foron influenciaos intencionadamente pola SER”.

Amás de participar na cobertura en directu del incendiu na Torre Windsor -quince hores siguíes d’emisión con puntes d’audiencia del 65 por cientu en Madrid-, José Antonio Ovies presenta’l programa selmanal d’actualidá ‘Madrid 7 días’, según informa la web de la cadena madrilana, y ocupa’l cargu de subdirector d’informativos, lo que lu pon a la tiesta de munchos de los trabayos especiales d’informativos de la canal pública.

Ovies salió de la delegación asturiana de TVE en xunu pasáu con mala prensa al llombu. Nun informe ellaboráu por trabayadores del centru de Televisión Española en San Esteban de les Cruces, atribuíense-y al periodista, ente otres manipulaciones, la grabación previa d’un informativu ficticiu sobro la fuelga xeneral del 20 de xunu de 2002 y la emisión d’un falsu asaltu con destrozos a la sé’l PP n’Uviéu tres d’una manifestación contra la guerra d’Iraq, con plena conocencia previa de la falsedá de la noticia.

Amás, trabayadores de TVE n’Asturies denunciaron en so día el so ablucamientu al comprobar cómo’l so superior decidía abrir l’informativu territorial asturianu del 27 d’ochobre de 2003 cola noticia -d’ámbitu madrilanu- de la victoria de la candidata’l Partíu Popular, Esperanza Aguirre, nes elecciones de Madrid.

Destituyíu del so cargu nel Principáu tres de la llegada’l PSOE al Gobiernu central -cuando lu sucedió Pedro Alberto Marcos- Ovies pasó a trabayar a la cadena pública Telemadrid, cuyes directrices básiques marca’l PP, fuercia política mayoritaria tanto nel Ayuntamientu como na Comunidá autónoma de Madrid.

Informe íntegru sobro la xestión d’Ovies en TVE-Asturies (orixinal en castellán)

El director del ente públicu de comunicación del Principáu José Ramón Pérez Ornia compareció ayer na Xunta Xeneral pa informar del desarrollu del proyectu y les característiques que va tener la radiotelevisión autonómica. Ornia afirmó que diba ser el mediu públicu más baratu d’Europa con un coste de malpenes 1,17 euros al mes por ciudadanu. Tamién informó del volume de la plantilla llaboral, qu’asitió nunos cien trabayadores y dixo que TV4-Asturies va tar emitiendo a finales de 2007 la so programación diaria de 18 hores.

Cuatro d’eses dieciocho hores van ser pa programes de conteníu informativu, desplicó el director del ente qu’anunció la primer emisión de la radiotelevisión asturiana pal prósimu 8 de setiembre, con motivu de la fiesta de la nuestra comunidá. José Ramón Pérez Ornia aprovechó la so comparecencia na comisión de control del ente públicu de la Xunta Xeneral pa facer una defensa del proyectu informativu del Principáu argumentada alrodiu de los dos exes sobro los que va funcionar el mediu públicu, según el so director: la calidá de conteníos y el baxu coste, “el más baxu d’Europa, malpenes 1,17 euros por habitante”, especificó Ornia.

Tocante a la plantiella del ente de comunicación Pérez Ornia cuantificóla nunos cien trabayadores, ente técnicos, periodistes y personal directivu. De los 15 millones d’euros añales que van destinar los presupuestos del Principáu a la radiotelevisión asturiana unos 3 millones van empobinase a los costes salariales de la plantilla.

El director del ente, qu’engloba una radio, una televisión y un portal dixital, refirióse a los planes que se contemplen no referente a los conteníos de programación, onde lo informativo y la produción propio van primar sobro otros conteníos. Ornia faló d’algamar un 50 por cientu de produción propio cuando s’emita la parriella de dieciocho hores diaries a finales de 2007.

El científicu Stephen Hawking va inaugurar los actos de celebración del venti aniversariu de los Premios Príncipe d’Asturies el prósimu 12 d’abril con una conferencia nel Auditoriu d’Uviéu. La Fundación que dirixe Graciano García confirmó la presencia del astrofísicu británicu nel actu d’apertura del aniversariu que va tar presidíu polos príncipes d’Asturies. Hawking pronunciará la so conferencia con delles de les personalidaes que comparten col autor de la teoría del Big-bang los galardones que concede añalmente la institución asturiana.

La cita d’esti importante eventu ye’l día 12 d’abril a les 19.00 hores nel Auditoriu Príncipe Felipe d’Uviéu. L’astrofísicu británicu pronunciará la conferencia inaugural de los actos de comemoración del XXV aniversariu de los premios concedíos pola Fundación que lleva’l nome del heriede de la corona española.

Hawking recibió el Premiu a la Concordia en 1989 “pol so trescendental llabor investigador sobre los fundamentos del tiempu y del espaciu, allegando al conocimientu de los homes les últimes aportaciones científiques sobre l’orixen y destín del universu, y pol exemplu de la so respuesta a les dificultaes que l’adversidá puede oponer a la condición humana, contribuyendo asina a la llucha en favor del progresu y contra la ignorancia”, tal como reflexó l’acta del xuráu, presidíu por Pedro de Silva.

Más información

La mesa de contratación del concursu pa l’adxudicación de los servicios avanzaos de telecomunicaciones de l’administración autonómica asturiana decidió proponer les ufiertes presentaes por Telefónica pal lote de telefonía fixa y tresporte de datos, por Aúna Grandes Clientes pa la telefonía móvil y por Telecable pal lote d’accesu a Intenet.

La mesa técnica de l’adminstración del Principáu resolvió la contratación de los nuevos servicios de telecomunicaciones ente les ufiertes presentaes, optando poles que amosaben una meyor relación ente coste económicu y calidá de la prestación. Asina pa los dos lotes de telefonía fixa y tresporte de datos, el primeru pa les zones d’Avilés, Xixón, oriental y occidental; y el segundu pa Uviéu, centru d’Asturies, Madrid y Brueleses, l’adxudicataria ye Telefónica, que ya se tien comprometío a facer les inversiones necesaries p’adecuar los sos servicios a les necesidaes d’estos lotes y que se calculen nunos nueve millones d’euros pa los prósimos dieciocho meses. La empresa a la que se va contratar los servicios de telefonía móvil, Aúna, tamién se tienc comprometío a realizar la inversión necesaria pa esparder la so rede per Asturies, nesti casu cifrada en diez millones d’euros.

Los servicios d’accesu a Internet queden a cargu de la empresa asturiana Telecable en xunto con BT-Aúna. Esti serviciu ufierta dos accesos a la rede de 34 Mb cadaún al través d’operadores diferentes col fin d’aumentar la capacidá y calidá del serviciu.

El vienres 25 de febreru entamaba’l cursu d’especialización pa periodistes en situación de minorización llingüística que va cellebrase ente’l 25 de febreru y el 9 d’abril con 42 profesionales inscritos que van recibir formación especializada cada vienres n’Uviéu y cada sábadu en Xixón. El Xefe de la Oficina de Política Llingüística, xunta’l profesor y direutor d’Asturnews Próspero Morán foron los encargaos d’abrir el cursu.

En términos xenerales, el cursu desendolcaráse como taba previsto nun principiu: Les clases impartiránse vienres y sábados na Facultá de Filoloxía, N’Uviéu, y nel Antiguu Institutu Xovellanos de Xixón, y la nómina de profesores ta encabezada por Xuan Busto en calidá de director ya inclúi, ente otros docentes como’l especialista asturianu en Ortoloxía Fernando Álvarez Balbuena, el profesor de l’Autónoma de Barcelona Emilio F. Peña y la profesora de la Universidá del País Vascu María José Cantalapiedra, al director d’Asturnews y profesor na Universidá Carlos III de Madrid, Próspero Morán.

Asinamesmo, el monográficu formativu d’Estensión Universitaria, que nun proporciona créitos de llibre configuración y, poro, nun tien valor académicu pa superar una carrera, ta empobináu de forma preferente a periodistes titulaos o profesionales con esperiencia nos medios de comunicación.

El pasáu mes de payares, la Universidá completó un primer cursu especializáu d’asturianu pa periodistes que se desendolcó baxo la dirección de Xulio Viejo y en cuya presentación la conseyera de Cultura, Ana Rosa Migoya, aseguró que “ye una obviedá” que la llingua asturiana tará presente na nueva radiotelevisión autonómica.

Un cientu d’imáxenes que suelen quedar descartaes nel vertixinosu ritmu’l llabor diariu. L’Asociación Profesional de Fotoperiodistes Asturianos, qu’axunta a trabayadores gráficos de los medios de comunicación, estrena güei n’Uviéu la esposición ‘Miraes’, integrada por 115 semeyes que retraten la cara non siempre visible de l’actualidá asturiana. Los fotógrafos quieren da-y periodicidá añal a la iniciativa, que visitará otres quince llocalidaes asturianes y viaxará en setiembre al edificiu institucional del Principáu en Bruseles.

L’escenariu ye’l patiu central del palaciu uvieín del Conde de Toreno, sé del Real Institutu d’Estudios Asturianos (RIDEA), onde’l públicu asturianu podrá acercase a parte’l trabayu cotidianu de 25 profesionales del fotoperiodismu en toles estayes, ente elles la política, los deportes, la economía y l’ámbitu informativu de sociedá y cultura.

L’Asociación de Fotoperiodistes Asturianos, qu’edita un catálogu de semeyes con ocasión de la esposición inagurada güei y aprovecha l’apertura de l’amuesa pa presentase en sociedá, creóse alitada polos propios profesionales p’afitar una ferramienta de defensa, dignificación y promoción n’andecha de la profesión de fotógrafu de prensa.

El collectivu -integráu por trabayadores gráficos de los principales periódicos en papel d’Asturies- rexenta una páxina web na que s’amuesen, ente otros reportaxes gráficos, series de semeyes sobro’l conflictu llaboral del astilleru Naval Xixón, l’Iraq previu a la guerra, la marea negra orixinada pol petroleru ‘Prestige’ y la etnografía y les fiestes populares asturianes.

Web de l’Asociación de Fotoperiodistes Asturianos

L’únicu cursu presencial de postgráu en Periodismu Dixital que se desendolca nes Universidaes españoles tien abiertu namái qu’hasta’l 25 de febreru’l plazu d’inscripción. El títulu d’espertu en periodismu dixital de la Universidá d’Uviéu va entamar el día 10 de Marzu nes aules del IUDE n’Uviéu y desendolcaráse de llunes a xueves, de 16 a 22 hores nos meses de marzu, abril y mayu. Pa facer la inscripción tien de visitase la páxina web del IUDE o la páxina del propiu “Títulu d’espertu en periodismu dixital”.

El títulu anunciase como una oportunidáu única pa formase nesta estaya del periodismu dixital que tien abondes posibilidaes de desendolcu nos prósimos años n’Asturies al abellugu del espaldarazu que va suponer la puesta en marcha nel cursu 2005-2006 del portal dixital de la televisión asturiana, que tien d’arrancar a la vera de la televisión autonómica y que necesitará d’especialistes en una materia qu’entá nun tien una presencia granible na formación universitaria nin de grau nin de postgrau.

Al tratase d’un títulu d’Espertu dexísese cuntar al menos con una titulación universitaria previa de primer ciclu y empobínase preferentemente a diplomaos o llicenciaos de les rames d’humanidaes, dende mayestros o licenciaos en filoloxía, hestoria o filosofía, pasando dende lluéu por llicenciaos en periodismu o comunicación audiovisual.a las ramas de humanidades.

Los destinatarios obxetivos de los Cursos serían polo tanto diplomaos o llicenciados interesaos n’especializase dientro de la so rama profesional na información o la comunicación y especialmente empobinaríase a los que partiendo del exerciciu de profesiones relacionaes direuta o indireutamente colos medios de comunicación (periodistes, publicistes, filólogos, escritores, correctores, traductores, mayestros y profesores de primaria o secundaria, historiadores, documentalistas, etc…) quieren empobinase a trabayar en portales informativos de toa mena.

El títulu tien como oxetivos cimeros “facilitar una visión global del periodismo digital y su impacto tanto sobre los nuevos modelos de negocio como sobre la empresa tradicional” y “proporcionar los conocimientos técnicos y profesionales necesarios para la adecuación de profesionales en ejercicio y la preparación de licenciados de ramas de humanidades en un ámbito profesional de esperado crecimiento en los próximos años” y ufierta práctiques en empreses periodístiques y tecnolóxiques asturianes que desedolquen proyeutos nel ámbitu de la información y el periodismu dixital. Les práctiques n’empresas compondríense de dellos meses de programación y sedríen a lo llargo de los meses de abril, mayu, xunu, xunetu y/o agostu.

El títulu, que tien un costu de 2.200 euros y cunta con equipamientu informáticu d’ultima xeneración pa cada alumnu, ye l’unicu presencia d’estes calterístiques que se fai n’España y namái compite col Master en Periodismu Dixital que fai a distancia el UIP y que tien un costu penrriba los 6.000 euros.

El títulu d’espertu tien una web empobinada a informar sobre los sos conteníos

L’Asociación profesional ‘Periodistes pol Asturianu’ presentó esti sábadu n’Uviéu un documentu entituláu “Bases pal tratamientu de la llingua asturiana nel ente de comunicación del Principáu”, nel qu’a lo llargo 15 puntos l’asociación propón una riestra principios qu’atalanten tendríen de rixir la presencia del asturianu na futura radiotelevisión asturiana. L’asociación ta acabante constituyise como tala depués de 10 años de trabayar como coleutivu , calteniéndose abierta a la “participación de los profesionales preocupaos por la presencia curiosa del asturianu nos medios de comunicación”.

El documentu presentáu esti sábadu 19 fai referencia a la “presencia inexcusable de la llingua nel Ente de Comunicación del Principáu”. Sicasí, tal y como destacó la presidenta de ‘Periodistes pol Asturianu’, Beatriz Viado, “nun falamos de porcentaxes respeuto del castellano, sinón que preferimos establecer una serie de principios que tienen que se mantener nos tres medios del nuevu Ente: televisión, radio y periódicu dixital,pero tamién nes sos comunicaciones internes, esternes y na so promoción pública”.

D’esta miente, ‘Periodistes pol Asturianu’ diz apostar, en pallabres del so vicepresidente Naciu Varillas, por caltener un “principiu de discriminación positiva”, sobremanera no que cinca a programes informativos, deportivos ya infantiles, decatándose de que la ufierta comunicativa asturiana “ufrez una desproporción descomanada del llau del castellanu”.

El documentu presentáu esti sábadu 19 de febreru tamién reclama la “non especialización de la programación” onde l’asturianu tea presente, de forma tala que se atalanta necesariu “l’emplegu normal de la llingua en cualesquier mena de programación y de franxa horaria col mesmu nivel de calidá xeneral”.

‘Periodistes pol Asturianu’ propón tamién la creación d’un Conseyu Llingüísticu permanente onde intervengan la Oficina de Política Llingüística, l’Academia de la Llingua Asturiana y la Universidá d’Uviéu, amás d’una representación profesional de los periodistes.

Yá hai sentencia firme y definitiva. Los responsables de Radio Sele recibieron ayeri la notificación de que la decisión del Tribunal Superior de Xusticia d’Asturies qu’obliga al Principáu a devolve-y la llicencia a la emisora nun almite yá recursu, depués que l’altu tribunal resolviere les notes aclaratories a la sentencia que permanecíen pendientes d’análisis xudicial.

Eses notes referíense esencialmente a cuestiones técniques menores, ente elles errates nun apellíu de la parte demandante, y torgaben que la sentencia fora dafechu firme. Agora, el Principáu nun podrá retrucar a la decisión xudicial nin nel conteníu -yá pasó’l plazu establecíu pa ello- nin pola so forma.

Lo qu’inda nun se sabe con precisión ye cuándo s’aplicará la sentencia. Responsables de Radio Sele aconceyarán nos prósimos díes con representantes xurídicos de l’Alministración autonómica pa reclamar la devolución de la llicencia lo más darréu posible pa que la emisora puea funcionar con normalidá y ampliar el so horizonte de conteníos, audiencia ya ingresos publicitarios. Si nun hai alcuerdu, avanzó güei Xuan Xosé Mariño, responsable de Radio Sele, la emisora nun duldará n’urxir formalmente énte’l xuez la execución de la sentencia.

El fallu del Tribunal Superior de Xusticia d’Asturies anula dafechu la revocación de la llicencia concedida a Radio Sele pol Gobiernu en funciones de Sergio Marqués, qu’en 2001 anuló’l primer Executivu de Vicente Álvarez Areces en beneficiu d’otru de los candidatos nel concursu.

Radio Sele empezó a emitir en febreru de 1986 y dende entós convirtióse na única entidá radiofónica durable que mantuvo una programación estable dafechu en llingua asturiana. La retirada, hai agora cuatro años, de la llicencia concedida en 1999 truncó l’espoxigue de la emisora, con capacidá p’algamar a una audiencia potencial d’unes 800.000 persones.