Comunicación

La empresa gallega Egatel va ser la encargada de poner en marcha los remisores de la Televisión Autonómica Asturiana pa la cobertura del territoriu. El gobiernu del Principáu seleccionó a esta firma, filial de Soluziona, pa diseñar, fabricar y programar los equipos analóxicos pa esparder les emisiones del Ente de Comunicación.

El contratu comprende un total de 13 equipos, diseñaos y fabricados íntegramente por Egatel, con potencies que oscilen ente los 2 kw y 20 w. Tres la so implantación, la nueva televisión asturiana va poder dar cobertura a un 70% del territoriu de la comunidá.

Según deplica José Manuel Mariño, director comercial d’Egatel, na páxina corporativa de Soluziona: “Esti contratu refuerza el posicionamientu d’Egatel como suministrador d’ equipos broadcast nel ámbitu de les televisiones autonómiques, onde ya cuenta con una destacada presencia gracies a los contratos con Retegal, l’ operador públicu de telecomunicaciones de Galicia, el proyectu pilotu de TV dixital de Canaries y los contratos nes televisiones de Estremadura ya Isles Baleares. Amás, la compañía va tar presente na práctica totalidá de les comunidaes autónomes por ser un de los proveedores habituales d’Abertis Telecom, l’operador de les canales públiques y privaes nel estáu, tanto con equipos analóxicos como digitales.

Profesionales del arte y la industria audiovisuales d’Asturies quieren potenciar el sector al través d’una Film Commission. El primer pasu del proyectu va ser una mesa redonda el prósimu llunes 10 n’Uviéu alrodiu del futuru del audiovisual na nuestra comunídá.

L’Asturies Film Commission ye un proyectu inda en fase de formalización col que diversos profesionales y creadores tenten buscar una canal común d’aprovechamientu del importante potencial que nos últimos años tien algamao la realización cinematográfica nel nuestru país y les posibilidaes del so desenvolvimientu como sector con futuru de la industria cultural.

Jose Braña, presidnete de l’Asociación de Guionistes y Realizadores d’Asturies; Javier Galán, presidente de l’Asociación de Productores Asturiano; María Salvador, xerente de la empresa d’eventos Auseger y Joaquín Morán, xerente d’ASTURNET, van debatir el prósimu llunes a les 20.00 hores nel Club Prensa Asturiana de La Nueva España los retos a los que s’enfrenta un sector que más alló de les sos posibilidaes nel terrenu artísticu ye quien a encarrilar a otros munchos sectores económicos: dende’l tecnolóxicu al turísticu.

La idea sobre la que trabayen los profesionales impulsores del proyectu Asturies Film Commission ye contribuir al afitamientu del arte audiovisual como referente de la industria de la cultura n’Asturies, siguiendo’l camín entamáu n’otros países y que tien llograo perbonos resultaos col sofitu de tolos profesionales implicaos.

A la mesa redonda del Club Prensa Aaturiana va siguir un coloquiu abiertu al públicu sobre’l proyectu presentáu.

L’Asociación Profesional de Radio y Televisiòn d’Asturies detecta’l malestar esistente nel sector pol procesu de selección pal Ente Públicu de Comunicación del Principáu. Pa esti colectivu el fechu de nun valorar nel procesu la esperiencia y sí titulaciones de nueva creación abulta-yos ‘escluyente’ pa abodnos profesionales, sobremanera de la estaya técnica.

L’asociación celebra la puesta en marcha del Ente como “axente activu de comunicación”, en cuantes supón una oportunidá llaboral pa los profesionales de la nuestra comunidá y tàmién como axente de cohesión social. Darréu amuesa’l malestar latente ente munchos profesionales pola maner d’entamar les prebes de selección.

El colectivu profesional quier puxar la creación d’un portal dixital propiu como mediu de difusión de les sos actividaes y pa que los sos socios desenvuelvan los sos llabores periodísticos. Ye un proyectu de la nueva directiva escoyida n’asamblea del pasáu 6 de xunu y que preside Joaquín Fernández Collado. Formen parte tamién de la directiva:Eladio Sirgo, Arturo Collado, Adolfo Casaprima, Chus Fernández, Leticia Herrero, Rubén Canga y Enrique Mediavilla.

La revista d’información local Llangreucultura acaba de publicar un nuevu númberu nel que s’ufierten les principales actividaes culturales del conceyu del Nalón. Les XXXII Xornaes de Teatru, la programación cinematográfica municipal o les actuaciones musicales previstes son dellos de los conteníos de la publicación.

Ente la programación referida a les artes escéniques destaca nes veteranes Xornaes de Teatru la presencia de Xulia, el montaxe n’asturianu de la compañía Margen. Tocante al cine, amás de les estrenes de recientes producciones españoles y estranxeres, apúrrese’l menú de películes del ciclu “Enfants Terribles” del prósimu Festival de Xixón, que va proyectase tamién en Llangréu. Nel capítulu de les actuaciones musicales resalta la presencia de Llan de Cubel y el cantautor Héctor Braga.

Llangreucultura ye una publicación del Ärea de Cultura y Mocedá del Ayuntamientu de Llangréu y presenta parte de los sos conteníos en billingüe o n’asturianu.

Una conferencia del diputáu socialista Ramón Jáuregui abre esti llunes 26 los XXIII Alcuentros de Mocedá de Cabueñes. Tres exes temáticos articulen los discutinios de la edición d’esti añu: los derechos ciudadanos de los inmigrantes, la participación xuvenil y el retu de la emancipación familiar de la xente mozo.

A lo llargo de los prósimos díes y hasta’l prósimu 30 d’ochobre van entamase nel Centru de Cultura Antigu Institutu de Xixón los Alcuentros de Cabueñes que cumplen esti añu la so ventitrés edición. En paralelo a les xornaes de debate va celebrase l’espaciu Arenas Movedizas, dos obres de teatru: “Quijotadas” y “El privilegio de ser perro” y un musical: “We will rock you”, formen el programa d’estes actividaes complementaries.

Les relaciones ente periodismu y política son nestos años caberos más nidies y polémiques nel Estáu Español, pero nun son tema sobro’l que s’alderique muncho n’Asturies. El Distritu Oeste de l’Agrupación Socialista de Xixón quier iguar eso con una charra coloquiu que va cuntar cola participación de nomaos periodistes que desendolquen la so activdá na villa de Xovellanos.

El prósimu martes, 27 de setiembre de 2005 a les 19,30 hores, nel Ateneu de La Calzada, tendrá llugar una nueva charra coloquiu dientro’l ciclu de conferencien qu’entama el Distritu Oeste de l’Agrupación Socialista de Xixón, nesta ocasión la tema va ser “Periodismu y Política ¿Comu s’influyen?”, pa ello va cuntase cola presencia de Fernando Canellada (Redactor Xefe de La Nueva España de Xixón), Guillermina Caso (Jefa d’Informativos de Radio SER Xixón), Nacho Poncela (Gabinete de Prensa de la Conseyería de Cultura), Juan Carlos Cuesta (Xefe de Gabinete de la Radiotelevisión del Principau d’Asturies), Flor Pavón (Secretaria de Comunicación de l’Agrupación Socialista de Xixón) y Serxu Solares (Coordinador del Distritu Oeste de l’Agrupación Socialista de Xixón). La entrada ye llibre y gratuita.

Les actividaes del Distritu Oeste de l’Agrupación Socialista de Xixón van siguir el martes que vien, 4 d’ochobre, tamién nel Ateneu de La Calzada, a la mesma hora, con una nueva charra coloquiu sobre la tema “Mozos, Moces y Vivienda”.

Porrúa fue’l llugar escoyíu a la fin pol xuráu encargáu de conceder el premiu Pueblu Exemplar de la Fundación Príncipe d’Asturies. Otres venti candidatures optaben a esta distinción empobinada a reconocer el sentimientu de solidaridá nes comunidaes pequeñes y el valor de lo local.

El premiu distingue’l llabor desenvueltu pola asociación Llacín, un colectivu cultural y vecinal autor de diverses iniciatives de promociòn de Porrúa y en favor de la xente del llugar.

L’ Asociación “Llacín”, creada en 1994 col oxetivu de desarrollar edificaciones y terrenos d’una finca donada por una familia emigrante de México, distintos espacios recreativos y culturales pa disfrute de tol pueblu. Otres acciones que lleva a cabu son la edición anual del Mercáu Astur, la Escuela de Música Tradicional y la Banda de Gaites Llacín.

Nel añu 2000, na finca de Llacín, inauguróse el Muséu Etnográficu del Oriente d’Asturies. En 2001 el Museo executó los llabores de recuperación del antigu llavaderu y de la canal d’agua xunto al ríu Vallina, con cerca de un sieglu d’antigüedá.

L’asociación Llacín de Porrúa participa nel programa Pueblu Cultural d’Europa, una iniciativa de la que formen parte once pequeños pueblos d’otros tantos países europeos y que tien por filosofía el destacar la importancia de les pequeñes comunidaes y reflexonar sobre la so economía y la so cultura. Porrúa va organizar nel año 2008 los alcuentros que habrán xuntar a les once delegaciones d’estos Pueblos Culturales de Europa.

Radio Sele va emitir esta nueche a les 23.00 la entrevista que-y fizo n’abril d’esti añu al sindicalista colombianu Luciano Romero Molina, asesináu va unos díes nel so país por paramilitares. La conversa cola emisora asturiana foi una de les últimes que caltuvo Romero con medios del estáu enantes de volver a Colombia.

El sindicalista asesináu yera ún de los refuxaos políticos acoyíos al programa de l’Axencia Asturiana de Cooperación pa militantes de movimientos sociales amenazaos nos sos países d’orixen por motivos políticos. Na so estancia n’Asturies, Luciano Romero participó en numberoses actividaes públiques y sofitó a diversos colectivos. El so asesinatu, va unos díes, causó una fonda conmoción nos movimientos sociales asturianos.

La congregación de les Hermanes de la Caridá de San Vicente Paúl algamaron el Premiu Príncipe d’Asturies de la Concordia concedíu esta mañana n’Uviéu. Les monxes d’esta orde faen una importante llabor humanitaria en tol mundu a favor de los más desfavorecíos.

La candidatura ganadora del Premiu a la Concordia impúnxose nes votaciones finales del xuráu a les otres finalistes: la Organización Nacional de Tresplantes y la Organización Internacional del Trabayu.

El xuráu del premiu taba compuestu por Vicente Álvarez Areces, José Ramón Álvarez Rendueles, José María Arias Mosquera, Adolfo Barthe Aza, Antonio Basagoiti, Javier Benjunea, Miguel Blesa, Claudio Boada, José Celma Prieto,Ramón Colao, José Cosmen Adelaida, Fernando de Almansa, Juan Manuel Desvalls, José Esteve, Felipe Fernández, José Ramón Fernández Cueva, Paz Fernández Felgueroso, Francisco de la Fuente, Martín González del Valle, Juan Luis Iglesias Prada, José Luis Mëndez, Fernando Menéndez Rexach, José María Ramírez, Helena Revoredo y Matías Rodríguez Inciart.

Nos prósimos díes la Fundación Príncipe d’Asturies va dar a conocer l’últimu de los premios concedíos, el de Pueblu Exemplar d’Asturies 2005.

La caderalga de Filosofía Moral y Política de la Universidá Autónoma de Barcelona y presidenta miembra del Consell del Audiovisual de Cataluña Victoria Camps defendió ayer n’Avilés la presencia de la llingua asturiana nel Ente Públicu de Comunicación como una de les razones de ser de la nueva Televisión Autonómica.

La filósofa faló del papel “formativu y de serviciu” de les televisiones públiques na Escuela Internacional de Veranu d’UXT y caltuvo que nel casu de l’asturiana la presencia de la nuestra llingua “nun puede ser la única llingua na qu’emita la autonómica pero ye bono que tenga presencia na programación por cuestión de prosimidá. Camps afondó nel papel del asturianu nel Ente del Principáu remembrando a les otres televisiones autonómiques: “la televisión autonómica catalana o la gallega nun tendríen mayor xustificación si nun fuera por contar con una programación íntegramente en catalán o gallego”, afirmó.

Pa la representante del comité d’espertos qu’asesoren en Cataluña sobre los conteníos éticos de les televisiones públiques les característiques del nuevu Ente de Comunicación d’Asturies han ser “la cercanía, la prosimidá de les sos informaciones y la so especificidá».