Cine

La Direutora Xeneral de Turismu del Principáu, Elisa Llaneza Álvarez, acompañada pol actor y guionista Enrique Pérez Vergara “Flipy”, presentaron na Sala de Prensa de la Conseyería de Cultura y Turismu (Edificiu Calatrava) la nueva película que va ser rodada n’Asturies esti branu.

El llargometraxe “Campamento Flipy”, ta dirixíu por Rafa Parbus (Xefe de Realización del programa de televisión española “Muchachada Nui”). Del mesmu mou, Enrique Pérez Vergara, más conocíu como ‘Flipy’, va debutar nel cine como productor, actor y co-guionista d’esta nueva comedia familiar ambientada nel Principáu d’Asturies. El restu del elencu va tar encabezáu por actores como Ernesto Sevilla, Pablo Carbonell, Pedro Reyes o Rosario Pardo.

Esti tipu de proyeutos ratifiquen, según la conseyería de cultura “l’interés del Gobiernu del Principáu d’Asturies pola cultura y el cine, que yá se manifestara cola creación de la unidá de trabayu “Film Comission” pa promover y facilitar los rodaxes n’Asturies”.

Entama en Xixón, un ciclu de cine al aire llibre. El cerru santacatalina ye’l llugar escoyíu pa esta iniciativa qu’entama cola película “Bienvenidos al Norte”, una comedia francesa dirixida y protagonizada por Dany Boon y que cuenta la vida de Phillipe Abrams, el director d’una oficina de correos del sur de Francia que ye treslladáu al norte del estáu, a un pueblu pequeñín na frontera con Bélxica. Ellí descubre que los natibles de la zona son xente afayadizo y bonal. La sesisón va entamar a les 22:30 hores.

El festival CinegailesAST 2009, dirixíu por Xaviel Vilareyo, va celebrase nel Vieyu Institutu Xovellanos de Xixón, del 6 al 8 d’agostu, cola proyección d’obres de tol mundu sobre temática gai y lésbica. El xueves 6, a les seis de la tarde entama l’amuesa de los curtios finalistes del festival, “Gústame ser divina”, de Diego Torres, “K”, de Juan Simons, “Salvemos el teatru” y “La vocación”, de Xavi Vilareyo, y “Pablo ¿pusisti la llavadora?” de Javier Haba.

A les 19:30 hores va proyectase’l curtiu noruegu “Habita conmigo”, onde Eva llega pa pintar l’altar de la ilesia y Sara va alcontrar un amor. Darréu, va proyectase un curtiu d’Alemaña “L’amor mata”, onde un mozu paez que nun sabe llevar mui bien la so vida afectiva.

El vienres 17 van proyectase dos documentales, a les 18 y 18:30 hores. “Homo baby boom”, d’Anna Boluda; onde se cuenta la vida cotidiana de families gais y lesbianes en Cataluña y Valencia; y “Ensin xéneru de duldes” de Xavi Vilareyo, un testimoniu sobre la transexualidá n’Asturies.

A les 19:30 CinegailesAST presenta “Hollywood de casualidá”, comedia francesa sobre un neñu al que confunden con una neña, que llega a ser actriz.

A les ocho la tarde “Asesinaron a unu” del alemán Tor Iben. Nel curtiometraxe Tom ye atacáu nel parque, namórandose esti del so agresor.

El sábadu 8 van entregase los premios y va facese un homenaxe a Gus Van Sant, Premiu d’Honor 2009. Amás van proyectase trailers del Festival y el curtiometraxe y la película ganadores. La entrada ye de baldre a toles sesiones.

Desde güei, unu de xunetu y hasta’l 21, va poder vese nel teatru Riera de Villaviciosa la esposición de fotografíes de carteleres de cine recreaes pola comunidá educativa del IES de Villaviciosa. Un llamativu proyectu gráficu y educativu de los profesores Bernardo Busto y Paco Ayala, qu’axunta a la calidá técnica de lo fecho la capacidá de mover y incorporar al proyectu a estudiantes, docentes y personal. La esposición representa una oportunidá curiosa pa conocer esta guapa iniciativa, asina como les posibilidaes didáctiques de los medios audiovisuales na docencia y nel trabayu con mozos y adolescentes.

Asturnews ufre dende esta selmana una nueva seición audiovisual cola que quier amosar l’axenda cinematográfica d’estrenos n’Asturies con un nuevu formatu nel que se van ufrrir los trailers de les películes que s’estrenen na so llingua orixinal con subtítulos n’asturianu.

Xunta esta ufierta que va traer los trailers de les películes más taquilleres y destacaes a la portada d’Asturnews tamién se van ufrir resúmenes selmanales de l’actualidá y reportaxes sobre les esposiciones que s’alcuentren abiertes en delles ciudaes d’Asturies.

Pa dir afalagando’l güeyu esta selmana ufrimos el trailer de “Terminator 4: Salvation” que s’estrena esti vienres 5 de Xunu en tolos cines d’Asturies.

Trailer de la cuarta entrega, primera de la nueva triloxía, que cunta la hestoria de John Connor (hristian Bale), nun post-apocalípticu añu 2018, Connor ye, como ya persaben los siguidores de la saga, l’home destináu a ser el cabezaleru de la resistencia humana escontra Skynet y el so exército de Terminators. Pero’l futuro pal que Connor se preparara alterase pola apaición de Marcus Wright (Sam Worthington), un extranxeru que tiene como l’últimu recuerdu qu’estuviere nel corredor de la muerte. Connor tien de decidir si Marcus fuera unviáu dende’l futuru o foi rescatáu dende’l pasáu. Y al mesmu tiempu…Skynet prepara’l so ataque final…

Web oficial de la película Terminator 4 n’España

Nel mes d’agostu del añu pasáu, acabó de grabase’l curtiometraxe “Nel Reinu”, un película n’asturiana dirixida pol norteamericanu d’orixe asturianu Víctor Suarez. La película va vese nos Estaos Xuníos en versión orixinal con sotítulos n’inglés y yá puen vese les primeres imáxenes.

Víctor Suárez (California, 1989) quixo amosar na película “Asturies tal como ye” nun hestoria intimista que muestra’l viaxe d’un padre cola so fía (Xulia) al entierru del güelu d’esta. Por delles razones llegen trés díes tarde al funeral. Neses dos xornaes vese’l realcuentru col pasáu que construye una hestoria inacabada enllena d’interrogantes (posiblemente cola vida mesma) na que l’espectador compondrá la suya mesma.

Nel curtiu apaecen actores como Lluis Antón González, que fai de padre; Adriano Prieto, que fai d’hermanu; Mari Carmen Mendez, que fai de güela y l’actriz norteamericana Nessa Norich, que fai de fia.

“Nel Reinu” ye una coprodución astur-norteamericana na que participen el proyectu Bluelight de la Universidá de Columbia (Nueva York) y la empresa asturiana Médula Producciones.

Güei vienres 15, de magar les siete y media la tarde, va proyectase la segunda película del ciclu de cine llibertariu qu’entamó la CGT-Uviéu la selmana pasada. La película esbillada nesta ocasión ye “La Sal de la Tierra”, de Herbert J. Biberman (1954).

La entrada ye de baldre. El Conceyu Abiertu ta asitiáu na cai La Gascona 12, baxu-A.

L’asociación d’estudiantes AEGEE Uviéu, convoca, en collaboración cola Cámara de Comerciu del conceyu y la Universidá d’Uviéu, Primer Concursu de Curtios Erasmus, nel que puen participar tolos menores de 35 años con curtios d’un máximu de 3 minutos de duración.

La pieza ha responder a la entrugar ¿Qué significa pa ti Erasmus? y el plazu llendáu pa presentala ye’l 4 de mayu, fallándose’l premiu dos díes más tarde, demientres la celebración del Día d’Europa.

Los vidios, un máximu d’unu por persona, pue presentase en soporte dixital nes oficines de l’asociación, asitiaes na cai Victor Chavarri númb. 19 oficina 17, en persona o per corréu.

El meyor curtiu, a xuiciu del xuráu, va llevar un premiu de 150 euros.

El miércoles pasáu celebróse nel teatru Filarmónica d’Uviéu la gala de pieslle del V Festival de Cine Asturianu, presentada por María Xesús Rodríguez y Jesús Menéndez. Na mesma, resultaron ganadores, los curtios “Dos sabios” y “Polillas”, n’asturianu y castellán respectivamente.

La gala entamaba cola música de l’artista Celia González, qu’ufiertó un recital de temes del so últimu discu “Cantoras ya bordones” xunto al tañedor de dulcimer Hervé Perrochon. El protagonismu túvolu darréu l’actriz y cantante Lilián de Celis Collía, mitu del cine los años cincuenta y rival de Sara Montiel, que recibía’l Premiu d’Honor del Festival.

Pa la entrega, taben nel escenariu, Xaviel Vilareyo, director del Festival y Emilio García Longo, conceyal de cultura del Ayuntamientu de Parres, d’onde ye y vive anguaño l’artista.

De Celis charró con Vilareyo cuntándo-y al públicu les sos esperiencies vitales dende la so infancia en Parres, Santander y Madrid, hasta la cume de la so carrera en México, intercalando’l castellán y l’asturianu na so intervención. Precisamente n’asturianu espera sacar l’artísta un discu con cantares del país, que tien en mente dende va años, según anunció nel trescursu de la gala.

Como homenaxe a la cupletista asturiana, la tresformista DiCarlo, bailló y fizo playback al son d’ún de los cantares más conocíos de Lilián de Celis; El Ballet Baidán, que dirixe Amparo Villafruela, realizó una coreografía sobre un tema de Tomás Bretón n’homenaxe a una de les películes de Lilián de Celis y el gaiteru Pelayu Cuaya ufiertó también un recital de gaita.

Darréu, y como ye tradición nel festival, la Premiu d’Honor foi quien desveló la mayor parte de los premios:

Premiu al Meyor Curtiometraxe n’Asturianu: “Dos sabios” ye un curtiometraxe de Rocío García Campelo, nel que participen Pepe Santovenia, Lluis Antón González, Inaciu Galán y Humberto Gonzali, como narrador, ente otros. El curtiu supón l’adaptación al cine del cuentu de Clarín col mesmu nome y rodóse a finales de 2009 nel Balneariu de Les Caldes, n’Uviéu.

Premiu al Meyor Curtiometraxe en Castellán: “Polillas”, del asturianu Pedro Touceda; Ye un monólogu irónicu, una reflexón poética de ónde venimos y aú vamos. Andéi Ivanov ye un rusu que vive n’España qu’hai tiempu qu’entamó un personal viaxe n’automóbil. Pedro Touceda, fíu d’asturianos, ye director de curtiumetraxes, periodista y director del “Festival Iberoamericano de Cortometrajes ABC.es”.

Amás, el xuráu formáu por Illán Gonzali, Ana Cárdenas y Sara López, otorgó los premios siguientes:

-Premiu al Meyor Documental al realizador Alfonso Suárez, por Voces en imágenes.

-Premiu a la Meyor Película a La torre de Suso, de Tom Fernández.

-Premiu a la Meyor Actriz: Belén Rueda por El Orfanato.

-Premiu al Meyor Actor: Gonzalo de Castro por La Torre de Suso.

-Premiu al Meyor Guión: Sergio G. Sánchez por El horfanato.

Premiu a la Meyor Dirección: José Antonio Bayona por El horfanato.

El festival pesllóse darréu col estrenu, per parte del grupu de Teatru de Güeñu, de la obra “El misteriu del pelu roxu” orixinal de Xaviel Vilareyo, colos actores Elena García, Moisés Díaz y Álvaro Santovenia.

Asturnews ufre dos galeríes coles semeyes del V Festival de Cine Asturianu

Asturnews ufre dos galeríes de la Gala de Pieslle del V Festival de Cine Asturiana, celebrada esti miercoles pasáu nel Teatru Filarmónica d’Uvieu. La primer galeria ye una esbilla de semeyes del homenaxe a Llilián de Celis, mientres que la segunda escoyeta recueye los momentos de la entrega de premios ya imáxenes de los curtios ganadores.