Cine

Esti sábadu, 25 de setiembre, termina nel Salón d’actos del Centru de Cultura Antiguu Institutu, la edición 2010 de l’Arribada. Y remata entamando cola presentación de la novela “La bufanda” de David Artime y con una mesa redonda titulada “Muertos vivientes na lliteratura y el so treslléu al cine”. A les 19:15 termina l’Arribada cola proyección del doblaxe al asturianu de “La nueche de los muertos vivientes”, película de xéneru que marcó una época a partir del so estrenu en 1968.

Sobre’l procesu de doblaxe, fechu por “Gonzali Producciones”, falaba’l presidente de l’Arribada, Alberto Álvarez Peña, na entrevista de la selmana d’Asturnews, que comentó que s’escoyó “La nueche de los muertos vivientes” pola mor de que “ye una película de cultu que se fizo con actores non profesionales”. Peña, que participó del doblaxe, comentó que “pa lo que ye, quedamos abondo contentos” y anque pue sentise la so voz ente los dobladores, barrunta que “nun cuento que me reconozáis”.

Clip de la película

Según informen dende la propia productora, pa principios de setiembre Gonzali Producciones tendrá acabáu un nuevu documental sobro la cultura tradicional asturiana tituláu A Bruxa de Brañavara, dirixíu por Illán Gonzali y empobináu por Alberto Álvarez Peña, y onde s’usa como llingua vehicular la fala o gallego-asturianu.

Nesti medimetraxe recuérdase que n’Asturies había homes y muyeres que teníen el don de ver a los muertos y falar con ellos. Tamién podíen ver a la Santa Compañía y nun-yos pasada nada, víen los entierros de xente prematuramente. En cuasi tolos conceyos asturianos había xente d’esa. Esti don garrábase porque fueren bautizaos con estola negra de Xoves oVienres Santo, el día la muerte de Xesucristu.

En 1925 Villalaín na so “Topografía Médica de Corvera” falaba del Martón, un home vieyu que falaba con muertos. Inda queda recuerdu de Consuelo, d’Aldín (Barcia, Valdés), de Xuan de Samboldro (Serín, Xixón), Josenónd’Arnao (Castrillón) o Ramona de Rufabar (Piloña), que teníen el mesmu don. Yá en 1898 Bernardo Acevedo y Huelves falaba d’un muyer en Sampol (Bual) a la que diben a consultar los vecinos y xente d’otros conceyos pa conocer el paecer de los sos antepasaos muertos sobro les custiones d’esta vida.

Foi nesti mesmu conceyu onde nació Amparo, más conocida como A bruxa de Brañavara. Amparo poníase en trance pa comunicase colos muertos. Muncha ye la xente que tovía s’alcuerda d’ella o tien sintío falar de los sos socedíos. La so figura inda nun la escaecieren nestos conceyos occidentales.

Según anuncia de l’Asociación L’Arribada, la so edición de 2010 va acoyer la proyección del primer llargumetraxe dobláu al asturianu. Sedrá en Xixón del 18 al 25 de setiembre y na xornada (Per Asturies) que s’entamará en Colunga, el viniente 5 de payares.

Trátase de Night of the living dead, un clásicu del cine fantásticu que dirixere George A. Romero en 1968, que ta consideráu como una obra clásica de xéneru. Con una duración de 96 minutos, esti llargumetraxe foi nomáu “significativu culturalmente” pola Biblioteca del Congresu de los Estaos Uníos y escoyida pa la so preservación nel Rexistru Nacional de Películes d’esi país. Night of the living dead doblóse al asturianu nel estudiu de grabación CMG y ye un productu de Gonzali Producciones.

El conceyu maliayu va celebra una amuesa y concursu de curtios cinematográficos pal que se pueden mandar obres hasta’l 20 d’agostu. La organización del festival cuerre a cargu de l’Asociación Cultural Mediu Güeyu entama, que-y da nome al festival: “Mediu Güeyu Festival 2010”.

El “Mediu Güeyu Festival 2010” compónenlu una amuesa y un concursu de curtiumetraxes, onde se van escoyer proyecciones d’artistes independientes, de bien diversa procedencia, estilu y conteníu, too ello, ente’l 3 y el 5 de setiembre d’esti añu.

Ente los autores yá confirmaos cunten col asturianu Gonzalo Tapia, autor de referencia nel país polos sos documentales y curtiumetraxes, que va presentar el so filme “Lena”. Tamién van cuntar cola documentalista belga Dounia Bovet le Woltèche, presentando “Les Racines du Brouillard”, mención especial nel festival de Marsella 2009. El británicu William Raban, va amosar los sos curtios esperimentales sobre la conflictividá social londinense.

Pela so parte, el concursu de curtios ta abiertu a tou aquel que quiera participar y ye de temática llibre. va realizase una primera pre-selección de toles obres recibíes hasta’l 20 d’agostu, que se van esibir mientres el festival. Al términu d’ésti, un xuráu, compuestu por destacaos miembros del mundu audiovisual va escoyer a el ganadores, que tán dotaos con premios d’hasta 300 euros.

Ficha d’inscripción

Los indíxenes celebraben la llegada del añu nuevu en coincidencia col solsticiu de branu hasta que cola llegada de los castellanos a tierres americanes, esta fiesta foi sustituyida poles venceyaes al cristianismu. Anguaño vuelve a celebrase como una ceremonia, ritual, venceyada cola naturaleza, como un tiempu de renovación de les esperances. Pa sumase a esta celebración, la de la entrada nel añu 5126 de los mayes, “l’añu del venáu”, delles organizaciones celebren n’Asturies un ciclu de cine indíxena, en Xixón, Salinas, Uviéu y Mieres.

Les proyecciones entamen en Xixón, güei, llunes 14 de xunu, con una “Tarde de curtiumetraxes” qu’inclúi “La Tierra es Nuestra” , “Caminar la palabra: Minga Indígena social y comunitaria” y “La mina: historia de una montaña sagrada” .

El xueves 17, la proyección treslládase a la Biblioteca de Salinas, onde va poder vese, a partir de les 19:30 hores, “Memorias de una hija de Oshun ” (75min), dirixida pola directora asturiana, afitada n’Uruguai, María Torrellas, Premiu Las cámaras de la diversidá, de la Oficina Rexonal de Cultura p’América Llatina y el Caribe de la UNESCO, en Cuba.

Amás, el 21, a les 18:30, nel Club de Prensa de La Nueva España, n’Uviéu, Soldepaz Pachakuti proyecta “América tiene alma” del venezolanu Carlos Azpurúa.

Les xornaes terminen el 22 de xunu, a les 19 hores, nel Salon d’actos de la casa cultura, colos curtios “Cortometraje Betti Cariño” y “La Rebelión de las Oaxaqueñas”.

Reseñes de les películes

El Teatru Filarmónica acueye un ciclu de “Nuevu Cine Mexicanu”. Güei, llunes 14 de xunu, a partir de les 20:30 hores, va proyectase “Nesio”, una película d’Alan Coton que narra una hestoria d’amor ente una lluchadora y un vendedor de droga.

Güei vienres, a les 20:00 hores , nel Casinu d’Asturies fadráse un pase del llargumetraxe documental “Convergentes. El laberinto creativo”, dirixíu por Oscar Fernández y Noemí Camblor y producíu por Épica Films.

El llargumetraxe documental céntrase nel procesu creativu d’una ventena d’artistes cola fin de ser presentaos énte’l públicu, como asocedió’l 19 d’avientu de 2009 nel Teatru Campoamor d’Uviéu, últimu día de rodaxe d’esta cinta.

Los artistes protagonistes del llargu documental son Jorge Martínez, Natalia Menéndez, Los Ministros, Pepe Colubi, Ricardo Menéndez Salmón, Tejedor, Julio Rodríguez, Anabel Santiago, Carlos García, Helena Gil, Manolo Villarroel, Isaac Turienzo, David González, Dark la Eme, Xuan Bello y Juan Castanedo.

Esti proyectu foi posible gracies al sofitu de la Fundación de la Caxa Rural d’Asturies, el Conceyu d’Uviéu, el Film Comisión del Principáu d’Asturies, Feve y el Centru Niemeyer.

Con motivu de la Selmana de les Lletres Asturianes, l’Ayuntamientu de Colunga, al traviés del Serviciu de Normalización Llingüistica de la Comarca de la Sidra, organiza na Sala Loreto, de Colunga, y a partir de les 19:30, un alcuentru cinematográficu col realizador Pablo A. Quiroga Prendes. Nel actu van proyectase cuatro curtiumetraxes y habrá una charra-alderique col director.

Pablo A. Quiroga Prendes ye cineasta, xestor cultural y dirixe Algamar Producciones, una productora que trabaya d’una manera amplia nel campu de la cultura. Nos últimos meses Algamar presentóse como una de les productores musicales que más crez, mientres Quiroga sigue faciendo cine y ganando premios colos sos trabayos, faciendo hasta dalguna incursión na lliteratura.