Cine

Entamáu pola Universidá Popular de Gijón/Xixón con Gonzali Producciones, el llunes viniente 6 d’abril comienza’l primer Cursu Prácticu de Doblaxe nel Centru de Cultura Antiguu Institutu con una duración de 40 hores. Les clases fadránse hasta’l 17 d’esti mes, de llunes a vienres, ente les 10 y les 14:30. El temariu tendrá los conteníos siguientes: Respiración, Espresión Verbal, Dicción, Interpretación, Proyección de la voz ante’l micru, Sincronización, Sonorización ante’l micru, Técnica de doblaxe, Llectura expresivo y Mímesis. Van realizase exercicios de doblaxe sobre fragmentos de series y películes en toles sesiones. El cursu va impartilu l’actriz Ana Blanco Rozada, encargándose del apoyu técnicu Illán Gonzali.

Ana Blanco Rozada ye titulada nel ITAE de Xixón. Actuó en series televisives bien conocíes, como “Amar en tiempos revueltos”, “7 Vidas”, “Mis Adorables Vecinos”, “Compañeros” y “Policías”, ente otres, amás d’en trabayos cinematográficos y numberoses representaciones teatrales. Como actriz de doblaxe formóse con Salvador Arias, trabayando nesta faceta en bien de títulos audiuvisuales de toa triba. Con Gonzali Producciones tien participao en dellos versionaos cinematográficos en llingua asturiana, siendo’l más recién Harry el suciu.

Gonzali Producciones ye la única empresa que fai doblaxe profesional n’Asturies y agora entama nesta estaya’l llabor formativu. Dende 2010 esta productora vien doblando clásicos de la cinematografía mundial, ente ellos, amás del mentáu Harry el suciu, El rostru impenetrable, Les aventures de Superman (serie d’animación), La nueche de los muertos vivientes, McLintock, El tercer home y Los viaxes de Gulliver.

Esti Miercoles día a les 20 hores nel Centru Social La Semiente de L’Entregu, l’autor Alberto Vázquez García va presentar el so documental “Poca Ropa. La lucha contra la dictadura franquista en Mieres” (Vol. 1). L’autor y dibuxante mierense, que yá lleva unos años faciendo trabayu d’investigación y arquivu de la memoria hístorica mas recién de la llucha antifranquista n’Asturies, yá presentó con anterioridá en La semiente el so anterior trabayu “34.45. DIEZ ASTURNIANOS NEL EXILIU FRANCÉS”, publicáu en 2010.

Alberto vuelve agora a L’Entregu col so trabayu “Poca Ropa. La llucha contra la dictadura franquista en Mieres” (Vol. 1) que trata de ser un percorríu poles lluches sociales y polítiques de la cuenca minera asturiana al traviés de les voces de los sos protagonistes y que toma’l periodu 1934-1962 y que cunta con capítulos dedicaos a la Revolución de 1934, la guerra de 1936, la represión, la guerrilla, los neños de la guerra y les fuelgues mineres de 1962. Dempués de la proyección va haber un alderique onde van poder tratase los aspeutos históricos, o mesmamente sobre’l mesmu proyectu o los trabayos d’escoyeta ya investigación sobre la memoria histórica.

Esti Miercoles La Semiente cambia la habitual rutina de los ciclos de cine temáticos, ya qu’esti 4 de Febreru van tar presentes dos directores asturianos, presentandonos 2 cortos recientemente estrenaos. Ún d’ellos ye Marino Franco, vecín de L’Entregu y ún de los organizadores del Certamen Nacional de Cortos Aula 18 y mui vinculau al cine, con varios documentales),y al teatru. Nesta ocasión presentará “Al Llau del Pozu” que además de tar rodau nel conceyu, presenta a mucha xente d’equí. El segundu curtiumetraxe que va proyectase va ser “El 5º Mandamiento”.

Tamién nesti casu vamos cuntar colos sos director, Julio De Lafuente y Kiko Solis. Nesti casu esti documental narra la hestoria de Juan Alonso que torna pa casa seis años dempués de que pasara una gran desgracia.

Dempues de les proyecciones empecipiara l’alderique sobre dellos aspectos de les produciones. La programción completa pa esti mes ye la siguiente:

Miércoles 4 a les 20.00H Proyeción de cortos a cargu de los sos autores: “El Quinto Mandamiento” de Julio De Lafuente y Kiko Solis “Al llau de pozu” de Marino Franco González. Miércoles 11 a les 20:00H. Proyeción documental: “Home”. ( Documental | Naturaleza. Documental científicu) Xueves 12 a les 19:30H Presentación del llibru “485,2 kilómetros en las Marchas de la Dignidad” – Miguel Ángel Fernández (Autor del llibru, Roberto González, “Esteva” (Integrantes Marches de la Dignidá), y representante de la editorial Sangar. Miérocles 18 a les 20:00H. Proyeción cine: “Hacia rutas salvajes”. (Into the Wild). Xueves 19 les 19:30H Charra-alderique: Situación actual del Sahara y el casu de Hassanna Aalia. Con Aby Athman de COSARA. Miércoles 25 a les 20:00 H Presentación Documental: “Poca ropa, la lucha antifranquista en Mieres (1934-1962)”. A cargu del so autor, Alberto Vazquez. Tolos xueves de 17:30H a 19:00H taller de baille de salón. De baldre.

El Teatru Municipal acueye’l sábadu 20 d’avientu l’estrenu en Samartín del Rei Aurelio del curtiumetraxe ‘Al llau del pozu’, al cargu de la Asociación Cultural Avientu, dirixíu por Marín Franco González, sobre la dramática hestoria d’un mineru asesináu nos años 60, que’l so cuerpu ye refundiáu a una cuneta.

La proyección del curtiumetraxe va llevase a cabu nel marcu d’una gala nel Teatru Municipal, a partir de los ocho de la tarde, na que va actuar el grupu Stukas y el Coru San Andrés Sergio Domingo.

El curtiumetraxe, de nueve minutos de duración, grabóse na cuenca del Nalón, con localizaciones nel Pozu Sotón, el barriu d’El Bravial, en Blimea, o la redolada del Pozu Carrio, y cuntó cola participación d’un trenta de persones, ente actores y técnicos.

El guión y la dirección del curtiu foi obra de Marín Franco González; con música de Cesar Blanco y la participación de los intérpretes Ángel Héctor Sánchez, Nubia Baré y David Blanka.

Dientro del ciclu monográficu sobre la obra de Sam Peckinpah, programáu pol Aula de Cine de la Facultá de Filosofía y Lletres, güei martes, y mañana miércoles, van poder trate les películes Pat Garret y Billy El Neñu y La cruz de fierro, respectivamente. Va Ser a les 16 hores nel salón d’actos de la Biblioteca d’Humanidaes (Campus del Milán).

El Conceyu Samartín del Rei Aurelio va abellugar el pieslle esti sábadu 15 de payares del XVII Certame Nacional de Cortometraje Aula 18 nel intre d’una gala que se va celebrase nel Teatru Municipal, en L’Entregu. Mientres la ceremonia, que va escurrir envolubrada nun espectáculu musical inspiráu nel llargumetraxe “Billy Heliot”, van dase a conocer los galardonaos y van apurrise les correspondientes distinciones.

La gala va entamar cola proyección de los curtiumetraxes que más votos del públicu recibieron demientres la so proyección nel Teatru Municipal y distintes sales públiques na segunda quincena del pasáu mes d’ochobre. El votu del espectador, qu’exerze como xuráu, volvió bater record de participación, degolando la barrera de los 6.000 y superando la participación d’años anteriores.

El primer, segundu y tercer premiu, según el galardón al meyor curtiumetraxe empobináu o rodáu n’Asturies va salir d’ente los diez trabayos más votaos: Sájara, de Juanan Martínez (Madrid); Democracia, de Borja Cobeaga (San Sebastián);Cuerdes, de Pedro Solís (Madrid); El mio primer besu, d’Albert Manich (Barcelona); Sequence, de Josep Prim (Barcelona); Tupper, de Javier Pumar (Vigo);Eladio y la puerta interdimensional, de María Giraldez y Miguel Provencio (Madrid); Porsiemprejamón, de Ruth Díaz (Cantabria); El cascu de Xúpiter, de Diego Pérez y Chechu Llión (La Rioxa); y Bikini, d’Óscar Bernacer (Valencia).

Pela so parte, los nomaos a la Meyor Interpretación Masculina y Femenina son: Karra Elejalde y Ruth Díaz por El cascu de Xúpiter’; Beatriz Olivares por ‘Sajara’; Asier Etxaendía en ‘Porsiemprejamón’; Oscar Ladoire, por Democracia’; y Marta Larralde por Los Güesos del fríu’.

Na Sección Asturiana, los favoritos al premiu a la meyor dirección o producción na comunidá son: Hala la mio neña hala, de Pablo A. Quiroga (Candás); Safari, de Gerardo Herrero (Madrid); y ¿Quién ye Llibertá Lionetti?, de Juan Carlos Álvarez (Uviéu).

Tres la proyección de los curtiumetraxes premiaos y antes de la entrega de los galardones, la escuela de baille Dancia Asturies, de Llangréu, va poner n’escena una reinterpretación musical del llargumetraxe Billy Heliot, Stephen Daldry, que va concluyir cola representación de ‘El Baille de los cisnes’.

Sigue en marcha l’actividá cultural pal mes de payares na Casa de los Alberti de Ciañ y dientro la programación de “Los xueves de castilletes y carbón” que vien desenvolviéndose nel mes de payares, esti xueves día 13 visita Ciañu Pablo Casanueva, director del primer llargometraxe n’asturianu “Bernabé”. Pablo Casanueva va lleer la ponencia El procesu creativu na producción cinematográfica.

Esta charra enmárcase dientru les xornaes culturales De Castilletes y carbón que per quintu añu consecutivu, organicen la Fundación Nuberu y l’Ayuntamientu de Llangréu. Trátase d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles y xiren alredor de les interrellaciones ente cine, mina, música, lliteratura, economía, política, etc.

Los xueves de castilletes y carbón van siguir esti mes de payares en Ciañu cola intervención de la Conseyera d’Educación Cultura y Deporte del Principáu d’Asturies, Ana González Rodríguez, que va participar el miércoles 19 dando llectura a la ponencia Política cultural n’Asturies y col recital lliterariu Compañeru dame tira nel que, cola coordinación de Chechu García, van intervenir Miguel Allende, Milio Rodríguez Cueto y Solinca Turbón. L’actividá de De castilletes y carbón se complementa cola esposición La Mina y la Mar que pue visitase demientres esti mes de payares na Casa los Alberti de Ciañu y pa poner el ramu, el 4 d’avientu día de Sta. Bárbara, va tener llugar un conciertu del grupu Nuberu en Sobrescobiu.

El Festival Internacional de Cine de Xixón vieno acabante de facer l’anuncia esti día de que reconoz al actor Imanol Arias col Premiu Nacional de Cine Nacho Martínez. L’intérprete va tar presente na gala de clausura de la 52ª edición del certame, onde va recoyer el galardón qu’homenaxa tola so trayectoria profesional y humana. Un premiu con un venceyu especial una y bones Imanol Arias y Nachu Martínez coincidieron en 1990 na película A soles contigo, d’Eduardo Campoy. La presentación del FICX sirvió tamién pa adelantar tamién que Richard Lester visitará Xixón pa entregar el premiu Muyer de Cine a Yvonne Blake y conocer actuaciones como la de Marlango.

El Festival destaca los casi 40 años de carrera d’Imanol Arias, nomáu en cuatro vegaes a los premios Goya, ganador de la Concha de Plata al meyor actor y reconocíu cola Medaya d’Oru al Méritu nes Belles Artes, con una filmografía onde podríen destacar Llaberintu de pasiones, El Lute o Territoriu Comanche, ente munchos otros. Anguaño tien por estrenar dellos proyectos como l’adaptación del cómic Anacleto: Axente Secretu o la nueva temporada de Cúntame, una serie que-y valió innumberables reconocencies, ente ellos la fidelidá de millones d’espectadores cada selmana frente a les pantalles de televisión.

El Premiu Nacional de Cine Nachu Martínez nació nel añu 2002 pa homenaxar al sumíu actor asturianu y coles mires de reconocer una destacada trayectoria artística y humana nel cine. Dende esi añu otorgóse a referentes del cine español como Marisa Parés, Gonzalo Suárez, Maribel Verdú, Ángela Molina, Charo López, Juan Echanove o más apocayá, Carmelo Gómez.

Na presentación del festival que tivo llugar esti miércoles anuncióse tamién l’asistencia de Richard Lester a la gala d’inauguración. El director de cine va tornar a Xixón p’apurrir, xunta anteriores galardonaes, el premiu Muyer de Cine a Yvonne Blake. Lester tamién va acompañar la proyección del clásicu Robin y Marian, nel que dambos participaron.

El FICX, na so presentación oficial, tamién dio a conocer los xuraos de la 52ª edición. El xuráu de la Sección Oficial va tar compuestu polos directores Santiago Zannou y Cristóbal Arteaga, los actores Alberto Ammann y Natalia Verbeke y la programadora de los festivales de Palm Springs y Los Ánxeles Hebe Tabachnik.

El xuráu de la Sección Oficial de Curtiumetraxes va cuntar col productor cinematográficu José Esteban Alenda, la directora Beatriz Sanchís y l’actor William Miller. Na sección AnimaFICX, los miembros del xuráu van ser el consultor de programación y coordinador de la sección d’animación del Festival de Sitges Jordi Sánchez-Navarro y el directores Tomás Lunak y Ricardo Ramón.

Tamién s’anunciaron güei los nomes de los padrinos” del Festival. L’actor Javier Ríos va encargar de presentar les películes de Sección Oficial y l’actriz María Cotiello amadrinará los filmes de Gran Angular Asturies.

Irene Visedo y Aura Garrido, maestres de ceremonies

Pa finar, el certame va cuntar tamién cola presencia de les actrices Irene Visedo y Aura Garrido como conductores de la Gala d’Inauguración que va tener llugar el 21 de payares nel Teatru Xovellanos. Irene Visedo cunta nel so currículum títulos como Cascabel, Los pasos perdíos o L’espinazu del diañu. Pela so parte, Aura Garrido ye una de les actrices más prometedores del cine español, nomada al Goya a la Meyor Actriz Revelación nel 2011 por Planes pa mañana y a Meyor Actriz Principal en 2014 por Stockholm.

Amás, Irene va impartir una serie de talleres mientres la selmana del Festival titulaos “L’actor frente a la cámara”, dirixíos a actores que deseyen formase na interpretación en cine y televisión. Los talleres van tener llugar dende’l llunes 24 hasta’l vienres 28 de payares nel teatru de la Escuela Cimera d’Arte Dramático de Xixón (ESAD) n’horariu de 10:00 a 13:00 hores, y les inscripciones yá tán abiertes na páxina web del festival. A lo último, tamién Irene Visedo va ser la encargada de conducir los programes de televisión del propiu Festival, onde toles tardes va charrar colos equipos protagonistes de les películes presentes nel FICX.

El Festival Internacional de Cine de Xixón (21-29 payares) ta entamáu pol Conceyu de Xixón, al traviés de Divertia, patrocináu pol Gobiernu del Principáu d’Asturies, l’Institutu de la Cinematografía y les Artes Audiovisuales del Ministeriu d’Educación, Cultura y Deporte y Liberbank-Cajastur y amás collabora la Televisión del Principáu d’Asturies.

El Festival de Cine de Xixón ye’l llugar escoyíu pa estrenar los primeros minutos del documental Cantábricu. Esi adelantu podrá vese nuna proyección que va tener llugar el domingu 23 de payares y que se va acompañar del anterior ésitu de los sos responsables, el documental nomáu al Goya Guadalquivir.

El director del Festival de Cine, Nacho Carballo, anunció nesti día tamién na presentación una serie d’actividaes que van tener llugar nos díes del festival. Per un sitiu, van instalase dos pantalles xigantes – na plaza del Parchís y nel paséu de Begoña- que van retresmitir les ruedes de prensa, los Cafés con…” y el programa d’Irene Visedo, amás d’otru material audiovisual, incluyendo una esposición inédita de trabayos fechos por fotógrafos del FICX que nunca antes fueron publicaos.

Tamién s’anunció la clase maxistral que va tener llugar el vienres 28 de payares y va ser impartida pol director y miembru del xuráu Santiago Zannou. La entrada, como nel casu de les enantes anunciaes, ye llibre y yá ta abiertu’l plazu d’inscripción a la mesma.

Bande de filles, una de les películes escoyíes en Gran Angular, ye tamién una de les finalistes al premiu LUX del Parlamentu Européu. La so actriz, Karidja Touré, va visitar Xixón pa participar nun alcuentru con responsables de les instituciones europees de cultura.

Amás, Javier Tolentino, reputáu periodista de Radiu 3 y unu de los críticos de cine qu’escueyen películes de la sección Converxencies, va presentar el so llibru El cine que m’importa, de recién publicación, nel marcu del festival.

El Festival Internacional de Cine de Xixón consolidóse nel panorama nacional ya internacional como un festival de referencia con personalidá propia nel que podrán esfrutase más de 280 títulos, ente los que s’atopa’l meyor cine independiente y d’autor. Les entraes van costar 3,50 euros y los abonos de 10 películes, 30 euros. Coles mesmes, el preciu de les entraes pa los más pequenos caltener en 1,50 euros y el pase de públicu, pa esfrutar de tola programación, va ser de 50 euros.

El Festival Internacional de Cine de Xixón (21-29 payares) ta entamáu pol Conceyu de Xixón, al traviés de Divertia, patrocináu pol Gobiernu del Principáu d’Asturies, l’Institutu de la Cinematografía y les Artes Audiovisuales del Ministeriu d’Educación, Cultura y Deporte y Liberbank-Cajastur. Collabora la Televisión del Principáu d’Asturies.