Cine

La Filmoteca d’Asturies entama, a partir del llunes 8 de xineru, el ciclu “Al Abordaje”, que se centrará nes películes de pirates. Esti ciclu de cine proyectaráse los llunes del mes de xineru nel Teatru Filarmónica d’Uviéu, a partir de les 20,30 hores. La entrada ye de baldre. La primer de les proyecciones sedrá “El cisne negro” de Henry King que ye un de los clásicos d’esti xéneru.

A esta proyección siguiran-y les proyecciones de “La mujer pirata” de Jacques Tourneur, el próximu llunes 15 de xineru; “Master and Commander: the far side of the world” de Peter Weir proyectaráse’l llunes 22 de xineru; y pa clausurar esti ciclu proyectaráse la película “Viento en las velas” del director Alexander MacKendrick”

El Conseyu de la Mocedá d’Uviéu, la Ciudá Tecnolóxica Valnalón col ptrocininiu de Telecable entamen la Cuarta Edición del Concursu de mozos y moces productores cinematográfiques ´Nun mos cuentes películes, ¡¡failes!!´. El plazu de presentación de los proyectos acaba´l 31 de mayu de 2007.

El proyeutu pretende fomentar la capacidá d´iniciativa, la creatividá, el trabayu n´equipu y l´espiritu emprendedor ente la mocedá asturiana. Siguiendo les directrices de la Unión Europea escoyóse´l cine como representante d´una industria creativa na que los y les xóvenes puen facer la transición de participar como consumidores a tresformase en profesionales del sector. La modalidá escoyida ye´l documental. Los y les participantes deberán presentar proyeutos baxo´l prisma de la realidá de los xóvenes y el so entornu. Los proyeutos ganadores tendrán como premiu la realización d´un documental.

El plazu de presentación de los proyectos acaba´l 31 de mayu de 2007.
Conseyu de la Mocedá del Principáu d’Asturies

El ciclu de cine “Los martes de la Filmoteca d’Asturies”, prosigue les proyecciones cola película “Titanic”, na traducción castellana “El hundimiento del Titanic” del director rumanu Jean Negulesco. Titanic de Negulesco algamó 5 nominaciones a los premios de l’Academia, de les qu’algamó tres Oscar.
La película cuenta la hestoria del Titanic, barcu británicu que empobinara rumbu al Atlánticu’l 12 d’abril de 1912 y que na tercer nueche de la so travesía chocó contra un iceberg, morriendo nel fundimientu alredor de 1500 persones.

Les Mocedaes Socialistes d’Uviéu van proyectar la película “El sexo de los ángeles” pa depués entamar un alderique cola collaboración de Xente Gai Astur (Xega). La película proyéctase por mor de la cellebración del 58 aniversariu de la proclamación na Asamblea Xeneral de les Naciones Xuníes de la Declaración Universal de los Derechos Humanos. La fin de MSU con esta proyección ye reivindicar los derechos mesmo de los discapacitaos como del colectivu GLBT (gais, llesbianes, bisexuales y transexuales). La proyección entamará güei miércoles 13 d’avientu a partir de les 20,30 hores na Casa del Pueblu d’Uviéu.

La película “El sexo de los ángeles” trata acerca de les persones discapacitaes que lluchen p’amuesar que nun son enfermos sinon ciudadanos diferentes coles mesmes necesidaes ya inquietues que les persones non discapacitaes. Hestóricamente, más que rechazada, la so faceta sexual d’esti colectivu foi ignorada.
Na película documental de Frank Toro dellos homes y muyeres cunten en primer persona como viven la homsexualidá dende la so perspectiva de persones con discapacidaes.

El Festival Internacional de Cine de Xixón peslló la so 44 edición dexando atrás una selmana d’intensa actividá cinematógrafica en Xixón, amás de les fiestes, exposiciones y demás actividaes relacionaes colos diferentes ciclos del Festival.
El xuráu del 44 Festival Internacional de Cine de Xixón, compuestu por Tiziana Finzi, Thomas Clay, Isaki Lacuesta, Mark Peranson y Javier Pereira, concedió’l premiu al meyor llargumetraxe a Sehsucht (Longing) de Valeska Grisebach.
El premiu del Día d’Asturies concedióse a “La Marea” un curtiumetraxe dirixíu por Jim-Box, Iván Sáinz Pardo y Dirk Sodner. El xuráu d’esti Premiu taba compuestu por José Ramón Pérez Ornia, Tino Pertierra y Manuel Lechón.

El premiu Nuevos Realizadores del Principáu d’Asturies concedióse a “Tenemos que hablar”, presentáu por Alberto Rodríguez de la Fuente y el Segundu Premiu d’esta categoría concedióse a “Único” presentáu por Carmen Rico Cabrera

Festival Internacional de Cine de Xixón

El Congresu de los Diputaos insta a desenvolver la distribución y amuesa de les obres cinematógrafiques nes llingües oficiales. El Congresu instó al Gobiernu a que nel prósimu periodu de sesiones se presente’l Proyectu de Llei del Cine, cola fin de dinamizar el sector. La Cámara Baxa española aprobó, con 239 votos a favor, dos abstenciones y nengún votu en contra, una moción sobre la situación de la industria cinematográfica.
El testu alcordáu pide l’establecimientu de midíes de sofitu y fomentu a la producción independiente pa desenvolver una actividá creativa propia en base a la diversidá cultural y llingüística del Estáu y que se faigan les midíes afayadices pa garantizar la distribución de les obres cinematográfiques nes diferentes llingües oficiales nel territoriu español.

El proyectu de llei habrá establecer programes de difusión y promoción publicitaria de les obres cinematográfiques españoles y promocionar los mecanismos de cooperación de la futura axencia estatal de la cinematografía coles entidaes correspondientes de les Comonidaes autónomes. Tamién s’habrá de garantizar la suficiencia d’un fondu específicu empobináu al fomentu de la cinematografía dende los presupuestos xenerales del estáu y facilitar l’accesu al créditu oficial y al créditu priváu a les productores independientes.

La producción cinematográfica en llingua asturiana, por nun ser llingua oficial, nun va tar afectada pola midía

La directora asturiana Lucinda Torre presentó la película documental “Resistencia” sobre la llucha de los trabayadores de Duro Felguera pol so puestu de trabayu. El domingu 26 de payares el Teatru Xovellanos de Xixón abellugó la presentación del primer llargumetraxe de la directora llangreana.
La hestoria de llucha de los trabayadores de la Duro Felguera na defensa del so puestu de trabayu, la implicación de les sos families como parte activa na movilización, la movilización social que fizo posible parar el despidu de los 232 trabayadores afectaos, centren el llagumetraxe de Lucinda Torre.

Resistencia ye un documental que cuenta’l conflictu llaboral más llargu de la historia d’Europa, afondando na esperiencia del Colectivu de Despedíos de Duro Felguera.
La so llucha algamó los sos oxetivos, recuperar los sos trabayos y poner a funcionar, otra vegada, una fábrica que dende mediaos del sieglu XIX configuró un paisaxe industrial nel conceyu de Llangréu.
El relatu de sobrevivencia, la dignidá de la llucha pol futuru del país son aspectos nos que Lucinda Torre afonda nel llargu del documental, al tiempu que val de reflexón colectiva sobre les consecuencies de les polítiques neolliberales nel mundu actual.

La banda sonora, compuesta pol compositor asturianu Ramón Prada, sumerxe al espectador dientro de la película, faciendo de complementu a les imáxenes ya intervenciones de los actores principales del conflictu llaboral de la Duro.

Lucinda Torre ye autora del curtiumetraxe “El beso de la tierra” qu’algamara’l Premiu del Xuráu xoven del Festival de Cine de Xixón nel añu 1999, el Premiu de l’Audiencia del Créteil International Women’s Film Festival de 2000 y algamara una nominación al meyor curtiumetraxe de ficción de los Premios Goya nel añu 2001

Resistencia va volver proyectase güei llunes 27 de payares a les 22,30 nel Centru Xixón Sur y el miércoles nel Teatru Prendes de Candas a partir de les 20,00 hores.

web de la película

Nel marcu del Festival Internacional de Cine de Xixón, el día 25 de payares a partir de les 17,00 hores, la sala 4 de los Cines Centro proyectará una riestra documentales realizaos por Film Popular durante la Guerra Civil. Esta proyección, organizada pol Atenéu Obreru de Xixón, tará presentada pol historiador Rubén Vega.
En 1937 créase Film Popular, productora-distribuidora empobinada a ser la voz del PCE-PSUC y organizacones averaes. En pocu tiempu, la so importancia foi perdestacada pol so llabor informativu y propagandísticu. Nel añu 2004 la Filmoteca Español reconoció que Film Popular yera una productora dependiente del Partíu Comunista d’España, polo que los derechos sobre los títulos y documentación xeneraos por esta productora pertenecíen al PCE. Nuna primer entrega, l’Archivu Históricu del PCE recuperó dalgunos de los títulos más significativos producíos por Film Popular, como son los que mañana se van exhibir na 44 edición del Festival Internacional de Cine de Xixón.
Los documentales que se van proyectar son “Juventud”, “La mujer en la guerra”, “La mujer y la guerra”, “Conferencia Nacional de Juventudes”, “Traición”, “Defensa de Madrid”, “Norteamérica en España” y “Celestino García Montero”.

El certame cinematográficu presentará n’Asturies los documentales “Resistencia” de Lucinda Torre, sobre la llucha de los trabayadores de Duro Felguera, “En el hoyo” del mexicanu Juan Carlos Rulfo, y el llargumetraxe de ficción “La Línea recta” de José María Orbe, cola precariedá llaboral como fondu.

“Resistencia” el documental de la llangreana Lucinda Torre sobre la llucha de la plantiya de Duro Felguera contra’l peslle de la fábrica metalúrxica asturiana, estrenaráse nel certame xixonés dientro de la sección oficial fuera de competición. El llargumetraxe desenvuelve la historia d’estos trabayadores de la cuenca del Nalón despedíos nos momentos más duros de la crisis asturiana, que decidieron nun quedar paraos y lluchar pola readmisión y el mantenimientu de l’actividá indistrial en Llangréu. Una historia de trabayadores a contracorriente, qu’a base de llucha y movilización algamaron lo que queríen, que nengún compañeru fuere echáu al paru y qu’una fábrica centenaria nel país nun se fugase a los paraísos fiscales y medioambientales del Tercer Mundu (anguaño les empreses tienen ruedes diz un de los porotagonistes de la película). Lucinda Torre vuelve encerrase colos trabaydores nel Ayuntamientu de Llangréu, vuelve a viri la so fuelga de fame, visita con ellos la catdral d’Uviéu y sobre too, como na yá llexendaria película de H.erbert Biberman “La Sal de la Tierra”, da la pallabra a les muyeres, sofitu indispensable pa que la movilización llegase a bon puertu. BAC films y Televisión ESpañol producen esti saludable recordatoriu de ñla nuesa memoria histórica más reciente, que s’estrenará’l domingu 26 a les 17,00 nel Teatru Xovellanos de Xixón.

Como la vida de bien de persones nesti país, “La línea recta” tien la precariedá como telón de fondu. José María Orbe, director de la cinta, y productor d’una de les meyores películes del últimu cine español “Las horas del día”, escueye pal so debú la dura historia d’esta moza que vive nuna pensión y trabaya buzoneando. Los responsables del film escoeyeron Xixón pal estrenu mundial de la película. Fadráse’l llunes 27 nel Teatru Xovellanos de Xixón a les 20,00.

Nel apartáu de la sección oficial a concursu estranráse nel Estáu Español el documental “El hoyo”, cinta ganadora nos festivales de Sundace y Buenos Aires, y que relata la historia d’un grupu d’obreros que llevanta una autovía nel Departamentu Federal con “sangre, sudor y lárimes”. La película dirixida pol mexicanos Juan Carlos Rulfo, fiu del novelista Juan Rulfo, autor de “Pedro Páramo” y “El llano en llamas”. El llunes 27 de payares podremos vela nel Teatru Xovellanos.

L’Asocición Asturianos en Bruseles “dalcuerdu col so oxetivu de promocionar la cultura asturiana nes sos diferentes manifestaciones y vertientes, presentará en collaboración col Festival de Cine de Xixón, una amuesa de curtiometraxes asturianos los díes 23 y 24 de payares na Casa d’Asturies de la capital belga. Los actos tendrán un programa doble nel que se va proyectar una selección de les meyores obres integraes nos últimos años nel denomináu Día D’Asturies del certame xixonés.

Ente los curtiometraxes escoyíos -once en total- pol Festival de Cine de Xixón pa ser proyectaos en Bruseles alcuéntense dalgunos de los más premiaos nos últimos años mesmo a nivel estatal como internacional como por exemplu Último tren a Tahití de Carlos Navarro, Tierra de Guerrilleros, d’Amanda Castro, Entaína, d’Alberto Pardo, y 7337, de Sergio G. Sánchez, realizador esti últimu que va tar presente na Clausura del Ciclu pa debatir col públicu sobre la situación actual de la producción audiovisual n’Asturies y la so proyección nel esterior. 7337, rodáu en 2000 n’asturianu y qu’algamó, ente otros, el premiu al Meyor Guión nel Festival Internacional de Cine Fantásticu de Bruseles (2001), el premiu Día d’Asturies nel Festival Internacional de Cine de Xixón (2000) y el premiu del públicu al Meyor Curtiumetraxe nel Festival de Cine Español de Málaga (2001), narra la hestoria d’una mayestra moza que en 1973 marcha pa un llugar separtáu nos montes d’Asturies pa facese cargu d’una escuela rural ensin usar dende la Guerra Civil. Estes selmanes el director y guionista ta acabando en Barcelona la preparación del que va ser el so primer llargumetraxe “From the grave to the cadle” que va rodar l’añu qu’entra. El peslle del ciclu cuntará tamién cola participación de José Braña, director de “Lo que el ojo no ve”, curtiumetraxe rodáu en 2003 que cuenta la tráxica deriva d’un partíu de fútbol de dos equipos rivales nuna división rexonal.

Con esta actividá ASBRU pretende siguir na llinia, entamada l’añu pasáu, de divulgar los diferentes aspectos de la cultura asturiana en Bruseles y d’ufrir la posibilidá de conocer los sos aspectos más innovadores a un públicu ampliu ya internacional. No que va d’añu, l’asociación xoven promovió bien d’esistoses iniciatives como les xornaes dedicaes a la nueva cocina asturiana que se ficieron nel mes de xunu o’l I Concursu de Fotografía ASBRU-ASMA, fechu en xunetu en collaboración cola asociación Asturianos en Madrid (ASMA).