Cine

A partir del prósimu martes 20 de marzu entama la nueva edición d’El Cine de la Caxa: L’aventura. El ciclu va tener 8 películes, que se van proyectar nos Centros Culturales d’Uviéu, Xixón, Mieres y Llangréu. Toles sesiones entamen a partir de les 20 hores.

Les películes que se van proyectar a lo llargo d’esti ciclu son: La taberna del irlandés, Los dientes del diañu, Sólo los ánxeles tienen ales, Dersu Uzala, La humanidá en peligru, Fuga ensín fin, L’Expresu de Xangai, Quiero la cabeza de Alfredo García. Como ye vezu toles películes vanse proyectar en versión orixinal subtitulada.

Cine de la Caxa nº79: L’aventura

La nueva película del director americanu va facese en Barcelona anque dalgunes de les sos escenes van grabase n’Asturies, concretamente n’Uviéu. La película va tar protagonizada por Penélope Cruz y Javier Bardem si bien s’espera la incorporación de Scarlett Johansson, que yá fuera protagonista de Match Point y Scoop, y a quien se considera como la nueva musa del director de Nueva York.

La última sala de cine urbana d’Uviéu, los cines Brooklyn, echó ayeri’l peslle, depués de 28 años d’actividá, pa dar pasu a una superficie comercial de mediana supercie. A partir de güei los únicos cines d’Uviéu tán nel centru comercial Los Prados, ensin cuntar con sales non proyectaes pal cine como les de Caxastur o el teatru Filarmónica.

Uviéu tuvo, ente otros, los cines Aramo, Principado, Real Cinema, Clarín o los Minicines; la presión de les sale de los centros comerciales provoca la unión de la capital asturiana a la llarga cifra de localidaes asturianes que perdieron les sos sales urbanes.
La primer de les películes proyectaes nos cines Brooklin foi “La Luna” del director italianu Bertolluci allá pela añu 1978 y la última foi “Volver” d’Almodovar na sesión de les 22.30 d’ayeri 18 de febreru.
Los seis empleaos del cine Brooklyn, pertenciente a la cadena Clarín, pasarán a trabayar nos cines Marta d’Avilés y Centro de Xixón; últimos cines d’una cadena que llegó a tener sales en delles ciudaes del estáu.

La Filmoteca d’Asturies posiblemente seya’l destín del proyector de 35 milímetros y de la llámpara de carburo que decoren les zones comunes del espaciu.

Al traviés del nuevu programa Media 2007, la Unión Europea quier potenciar la distribución de les obres europees nel ámbitu de la unión y nel restu del mundu durante los siete años siguienes. Media sofitará l’accesu a la financiación por parte de les PYME y apostará pol usu de les tecnoloxíes dixitales para fomentar la competitividá del sector.
Según Viviane Reding, Comisaria de Sociedá de la Información y Medios de Comunicación, la industria cinematográfica europea tien qu’abrise a la dixitalización y modernizar los cines y el sistema de distribución p’algamar l’éxitu. “El Programa MEDIA 2007 ufre les ferramientes pa sofitar a la industria del cine européu a avanzar nesta dirección”, apuntó la comisaria.
Los 755 millones d’euros qu’aportará MEDIA 2007 en conceutu de financiación van repartise en cinco apartaos: un 7% va dir empobináu a formación (guiones, xestión económica y tecnoloxíes dixitales), el 20% a desarrollu (proyectos únicos, catálogos, nuevos talentos, coproducciones, otres formes de financiación), un 55% a distribución, un 9% a promoción y patrociniu, un 5% va ser p’aiciones tresversales (facilitar a les PYME l’accesu a la financiación y fomentar la presencia de películes europees nes plataformes dixitales) y un 4% pa proyectos esperimentales (nueves tecnoloxíes pal desarrollo, la producción y la distribución de películes)
El programa Media 2007 vien avaláu pol ésitu de los programes predecesores nel ámbitu de la financiación al cine: Media plus y MEDIA formación. Por cada euro que financió la Unión Europea xeneráronse seis euros d’inversión privada nel sector. L’exemplu de que’l programa funciona ye que na última edición del Festival Internacional de Cine de Berlín proyectáronse 17 películes subvencionaes polos programes MEDIA.
MEDIA sofita la industria europea del cine dende va16 años. Sólo gracies a MEDIA Plus y MEDIA Formación (2001-2006), destináronse más de quinientos millones d’euros a un total de 8 000 proyectos. Cada añu, la Comisión Europea financia 300 nueves obres y la metá de les películes europees asoleyaes nes sales de cine recibieron subvenciones comunitaries.

Los centros Culturales de Cajastur n’Uvieu y Xixón siguen coles proyecciones cinematográfiques del ciclu de cine “De la caja número 78”. “Grbavica” de Jasmila Zbanic y la coproducción asiática “Time” entamarán a les 8 de la tarde con entrada llibre y gratuita hasta completar l’aforu.

La película que’l centru d´’Uvieu va ufrir güei ye “Grbavica” (El secreto de Esma), una coproducción europea dirixía pola direutora Jasmila Zbanic, que narra los problemes una madre nel Sarajevo actual. Ente otros galardones obtuvo l’Osu d’Oru nel Festival de Cine de Berlín.

En Xixón va proyectase tamien a les 8 ,”Time”, una coproducción ente Xapón y Corea del Sur que muestra la naturaleza humana al travies de les rellaciones d’una parexa d’enamoraos. El direutor y guionista de la cinta ye’l surcoreanu Kim Ki-duk, un de los más firmes representantes de la vanguardia d’esti país.

La direutora mierense de cine Ángeles Muñiz Cachón quedó a les puertes d’algamar el Goya al Meyor Curiumetraxe por “Propiedad Privada” na XXI edición de los premios del cine español, que celebró la gala d’entrega na nueche d’esti domingu 28 de Xineru. El Goya al Meyor Curiumetraxe algamólu la cinta “A ciegas” de Salvador Gómez Cuenca, nuna nueche na que triunfó dafechu Pedro Almodovar cola so película “Volver”.

“Propiedad Privada” ye una hestoria potagonizada por Natalia Dicenta y Eduardo Velasco que, con un presupuestu de 24000 euros, rodóse en 2006 n’Asturies. La cinta tien como referente los malos tratos y vien a culminar una carrera que ya diere a la lluz trabayos bien interesantes.

La nota positiva pa Asturies tuvo nel premiu al Meyor actor que foi a parar a Juan Diego pola película “Vete de mí”, producida pol asturianu Juan Gona y dirixida por Victor García León.

Ganadores de los Goya 2007

El Teatru Filarmónica d’Uviéu va proyectar los curtios finalistes del Festival de Curtios Cinematográficos de Ribedeva. Los díes 23 y 25 de xineru el teatru uvieín acoyerá la proyección de los trabayos finalistes. La realizadora asturiana Amanda Castro algamó’l premiu al meyor curtiu asturianu con Tierra de Guerrilleros. El trabayu ganador “Papeles” d’Eliazar Arroyo cuenta los trámites de los emigrantes de cara a la so regularización. La edición de 2006 d’esti festival recibió 180 curtios a concursu, cien más que na edición de 2005. La medra de trabayos presentaos nun repercutió na calidá de les cintes qu’en pallabres del xuráu aumentó abondo. Ente les cintes presentaes desataquen dalgunes de les que depués se preseleccionaríen pa los premios Oscar o otres nes que participen actores como Fernando Tejero.

El premiu al meyor curtiu asturianu foi pa Tierra de Guerrilleros la primera obra d’Amanda Castro. El curtiu cuenta l’alcuentru, imaxinariu, ente Gaspar García Laviana y Mata, un guerrilleru republicanu asturianu, nos tiempos de la posguerra. La cinta presentóse en 2005 nel Festival Internacional de Cine de Xixón algamando un bon éxitu.

José Antonio Quirós, director de “Pídele cuentas al Rey”, va entamar esta primavera el rodaxe de la so segunda cinta “Cenizas del Cielo”. La película tendrá la Central Térmica de Soto como paisaxe de fondu, y va ser grabada na so totalidá énte los conceyos d’Uviéu, La Ribera, Morcín y Mieres. Nes prósimes selmanes entamarán les sesiones de casting n’Uviéu. L’argumentu de la película centrase na relación d’un escritor de guíes de viaxe y un paisano que vive xunta la central térmica

Ramón Lluís Bande presenta la película “El Paisano. Un reatratu colectivu”. La película ye un averamientu a la vida d’Horacio Fernández Inguanzo “El Paisano”. La película trescurre al traviés de 14 rostros dende los que se cuenta la historia del históricu militante comunista asturianu. La película presentaráse nel Forum de la FNAC el xueves 11 de xineru a partir de les 20,00 hores.
“El Paisano. Un retratu colectivu” tuvo la so presentación oficial nel marcu del Festival de Cine de Xixón de 2005.
El DVD de la última película de Bande inclúi les otres dos películes sobre la memoria histórica del director: “Estratexa” y “De la Fuente”

El prósimu llunes, día 8 de xineru, entamará una nueva edición del Ciclu de Cine “Ateneo de Película”, entamáu pol Atenéu Obreru de Xixón, que nesta vegada fae un homenaxe al director de cine Fernando León de Aranoa. Esti ciclu faese cola collaboración del Teatru Xovellanos y la Fundación muncipal de Cultura de Xixón. Nesti ciclu proyectaránse Barrio, Caminantes y Princesas.

Les proyecciones que se van facer los díes 8, 9 y 10 de xineru, a partir de les 20,30 hores.

• Llunes, 8 de xineru de 2007
  Barrio (España, 1998) 98 min., Color, 35mm
  Ye branu y anque Rai, Javi y Manu quixeren tar n’otra parte vense obligaos a pasar les vacances coles sos families en Madrid, nel so barriu de tola vida. Comparten problemes y sueños, aburrimientu y diversión. Hai dalgo perenriba de too: l’amistá.
• Martes, 9 de xineru de 2007
  Caminantes (España, 2001) 57 min., Color, 35mm
  La vida nuna pequeña población indíxena nel corazón de la meseta Purépecha vese alterada col anunciu de que la caravana zapatista va recorrer les sos cais camín a México D.F. Les autoridaes del llugar encamienten al mayestru de l escuela la redacción d’un discursu de bienvenida, la banda local entama a ensayar cantares, toles cases adórnense con flores… Mientes, dende dalgún puntu del camín, el subcomandante Marcos fala d’esti viaxe y del que l’Exercitu Zapatista entamó hai casi venti años na selva Lacandona.
• Miércoles, 10 de xineru de 2007
  Princesas (España, 2005) 117 min., Color, 35mm
  Ésta ye la historia de dos muyeres, de dos putes, de dos princeses. Una d’elles llámasde Caye, tien casi trenta años, el flequillu de peluquería y un atyractivu discutible, de barriu. Zulema ye una princesa desterrada, dulce y oscura, que vive a diriu l’esiliu forzosu de la desesperación. Cuando se conocen tán en sitios diferentes, casi enfrentaos: son munches les moces equí que ven con mieu la llegada d’inmigrantes a la prostitución. Caye y Zulema nun tarden en comprender que, anque a cierta distantcia, les dos caminen pela mesma cuerda. De la so complicidá naz esta historia.

Fernando León nació en Madrid en mayu de 1968 y ye llicenciáu en Ciencies de la Imaxe na Universidá Complutense de Madrid. La so obra cinematográfica comprende les más diverses xeres de la profesión dende la producción, Princesas; guiones, Los Lunes al Sol; documentales como Caminantes o Izbieglize. Como director de cine entamó cola galardonada Familia, pa siguir con Barrio, Los lunes al sol y Princesas.