Portada Lorient 2007 Recueyen nun mapa toles pumaraes d’Asturies

Recueyen nun mapa toles pumaraes d’Asturies

by asturnet

El Conseyeru de Mediu Rural y Pesca, Aurelio Martín, y el Direutor del Institutu de Recursos Naturales y Ordenación del Territoriu de la Universidá d’Uviéu (INDUROT), Miguel Ángel Álvarez, presentaron la cartografía del pumar n’Asturies. Tamién asistieron al actu representantes de l’Asociación de Llagareros d’Asturies (ALA) y de l’Asociación de Collecheros de Mazana de Sidra (Acomasi), que felicitaron a la Conseyería y al INDUROT pol estudiu presentáu.

Na presentación, el Conseyeru recordó que la ellaboración d’un censu de pumaraes yera una reivindicación hestórica del sector “que plantegaba la oportunidá de conocer el potencial productivu d’esti cultivu” y señaló qu’esti estudiu “ufierta un análisis real de les pumaraes n’Asturies, tanto en términos cualitativos como cuantitativos”.

Nesti sen, esplicó que dende hai bastantes años esiste una normativa que regula’l rexistru de les esplotaciones ganaderes que permite’l conocimientu detalláu de les condiciones en que se críen los animales productores d’alimentos. “No que cinca a les esplotaciones agrícoles, ta plantegándose a nivel nacional desendolcar un sistema asemeyáu de rexistru d’ordenación de les producciones vexetales que permita optimizar los controles sobre estes producciones, asina como dar información sobre los potenciales productivos de los distintos cultivos”, añadió’l Conseyeru.

Col envís d’avanzar na ellaboración d’esti rexistru, agregó Martín, surde la iniciativa d’ellaborar un censu de plantaciones de pumar “por ser el cultivu más emblemáticu de la nuesa Comunidá Autónoma”.

Cartografía del Pumar

Con estos antecedentes, la Conseyería de Mediu Rural y Pesca, en collaboración col Área d’Información y Xestión Cartográfica del Centru de Cartografía, encargó a finales del añu pasáu al Institutu de Recursos Naturales y Ordenación del Territoriu de la Universidá d’Uviéu (INDUROT) la ellaboración d’una cartografía del pumar nel Principáu d’Asturies que permitiera conocer la superficie empobinada a esti cultivu, asina como la so distribución xeográfica.

El trabayu que se presentó güei ye la cartografía dixital, a escala 1:25.000, cola distribución de les plantaciones de pumar nel Principáu d’Asturies emplegando les últimes fontes cartográfiques disponibles. Ye un inventariu materializáu al traviés d’una sólida base de datos que pue emplegase como una ferramienta actualizada, permitiendo analizar en detalle datos sobre la distribución en superficie de les plantaciones de pumar pa estremaos ámbitos xeográficos, físicos, alministrativos y de xestión.

Les posibilidaes d’aprovechamientu de la información recoyida son múltiples, yá qu’ufierta la posibilidá de conocer la situación de les plantaciones no tocante a edá, grau de dañu o d’abandonu, densidá de plantación, destín de la producción o detectar variedaes llocales d’interés. Toos estos son parámetros qu’hai que recoyer con un llabor de campu dirixíu, que permita determinar el potencial productivu y conocer la so realidá actual.

La Conseyería de Mediu Rural y Pesca vien faciendo nos últimos años campañes d’afalamientu de les plantaciones de pumar, plantándose 1.100 hectárees dende que se punxo en marcha esta llinia d’ayudes.

La presente cartografía va permitir funciones d’un Sistema d’Información Xeográfica, una y bona se desendolquen los distintos trabayos, tanto de gabinete (d’identificación de propietarios de finques con plantaciones de pumar) como de campu (carauterización de les plantaciones según parámetros de variedá, densidá, capacidá productiva, estáu fitosanitariu…). Esta cartografía tien qu’actualizase siempre que se disponga de nueves ortofotografíes aérees, col envís de dir evaluando la distribución de la especie.

Tamién te podria gustar