Asturies nun va presentase definitivamente como candidata a Ciudá Cultural Europea 2016

Munchos yá lo víen venir dende un entamu. La propuesta inicial del Gobiernu d’Asturies, de presentar una candidatura conxunta a la Ciudá Cultural Europea 2016 ente Xixón, Uviéu y Avilés, diba a la escontra de la normativa afitada pa esti eventu, que designa a una sola ciudá con esti títulu. Cuando se quixo correxir y qu’Uviéu tomara la iniciativa, l’alcalde Gabino de Lorenzo nun paecía mui pol llabor, y güei acaba confirmalo’l Viceconseyeru de Promoción Cultural y Política Llingüística, Jorge Fernández León: “Nun tien nengún sentíu trabayar un minutu más nun proyectu que nun esiste”.

Con estes declaraciones el Gobiernu d’Asturies refuga definitivamente la posibilidá de convertir a dalguna de les trés grandes ciudaes asturianes en capital europea de la cultura pa 2016. Fernández Leon acusa a De Lorenzo d’esta decisión y diz que l’alcalde “tomó’l pelo a los ciudadanos”.

El Viceconseyeru comentó que dempués de falar con Xixón y Avilés, tuvieron claro “que nun se dan nenguna de les condiciones pa siguir col nuesu papel de coordinación”. León considera que l’alcalde d’Uviéu ta dedicándose a “dinamitar” el proyectu y “fai imposible que siga adelantre”.

Fernánde z León arremetió contra De Lorenzo hasta’l puntu de declarar que “tiró pela borda la meyor oportunidá cultural d’Uviéu na so hestoria recién”.

El plazu pa presentar candidatures pa 2016 remata’l 12 de xunetu, anque la mala xestión conxunta de la cuestión y el llocalismu imperante nes alministraciones asturianes paez poner demasiaes torgues pa sacar alantre una candidatura en tan poco tiempu.