Reciella recibe esti sábadu’l Pegollu de los Premios Andrés Solar

Esti sábadu 20 d’avientu, a les 19,30 hores, nel patiu central del Antiguu Institutu de Xixón, va procedese a la entrega del Pegollu y del Madreñazu 2014 con un actu que va cuntar cola actuación de Xulio Ramos y Emilio Ribera y que van presentar Naciu Varillas y Ana Vanessa Gutiérrez. El Pegollu d’esti añu foi pala Asociación Reciella y el Madreñazu foi pala Concapa polos sos ataques a la implantación de l’asignatura d’Asturianu na enseñanza concertada.

La Xunta pola Defensa la Llingua Asturiana anunciaba hai una selmana los ganadores de los Premios Andrés Solar na so XXX edición, yendo nesta ocasión el Pegollu pa l’Asociación Reciella (Families pol asturianu) y el Madreñazu pala CONCAPA (Confederación Católica Nacional de Padres d’Alumnos) na persona de Sandra Ruíz, representante de la organización.

Los Premios Andrés Solar algamen nesti 2014 la XXX edición y nos sos trenta años de trayectoria, los premios siguen teniendo una vertiente doble: per un llau, la Xunta premia a una entidá o persona que rescamplara pol so llabor en defensa o promoción del asturianu: esti reconocimientu materialízase nel Pegollu. Pero los Premios Andrés Solar tienen tamién una versión negativa, que reconoz a la persona o entidá que rescamplara pol so llabor negativu pa cola llingua asturiana. Esti dudosu honor represéntase con un “Madreñazu”.

El Pegollu d’esti añu 2014 quier reconocer el llabor fundamental de l’Asociación Reciella (Families pol asturianu) que vien llevando alantre un proyectu intensu d’actividaes, talleres, cursos, conciertos, xuegos, materiales… too ello pa favorecer la tresmisión interxeneracional del asturianu nes edaes más tempranes.

El “Madreñazu” nesta edición va pa la CONCAPA (Confederación Católica Nacional de Padres d’Alumnos) na persona de Sandra Ruiz, representante d’esta organización n’Asturies, qu’a lo llargo d’esti añu vien atacando sistemáticamente la presencia de la llingua asturiana nel sistema educativu, y avalando y defendiendo les práctiques de determinaos centros educativos pa burllar la llei y nun ufiertar l’asignatura. Por too esto, la Xunta pola Defensa de la Llingua Asturiana considéralos bonos merecedores del antipremiu.

Como tolos años, depués del actu va haber una espicha. Esti añu va ser nel chigre xixonés El Museo (Av. del Llano), y la entrada val 20 euros. Pa dir, hai qu’acutar sitiu, y pa eso pue llamase al 985229553 o mandar un corréu a info@exunta.org .