Profesores de Maxisteriu proponen una especialidá d’asturianu asemeyada al minor de Filoloxía aprobáu apocayá

Xulio Viejo y Roberto González Quevedo tán acabante facer una propuesta a la directora de la Escuela de Maxisteriu de la Universidá d’Uviéu, Gloria López Téllez, pa que proponga la creación d’unos estudios reglaos d’asturianu, asemeyáu al títulu acabante aprobar en Filoloxía.

Los estudiantes de Maxisteriu van poder cursar unos estudios de cualificación que van denomase “cualificadores”, y que van constar d’ente 30 y 60 créitos. La idea de los profesores que ficieron la propuesta ye l’asturianu se sume a les titulaciones de Llingua Estranxera, Educación Física o Musical, a mou d’especialización.

Téllez nun quixo pronunciase sobre’l tema, pero delles organizaciones yá se mostraron a favor. Ye’l casu del Conceyu Universitariu pol Asturianu y la Xunta Moza.

El Conceyu Universitariu pol Asturianu (CUPA), amosó nun comunicáu que vuelve “a mostrar el so apoyu a la creación de los títulos y especialidaes d’asturianu necesaries en Maxisteriu”, como yá lo espresare la organización nel puntu 4.4 del Programa Electoral al Claustru de la Universidá d’Uviéu, en mayu de 2008. Pal CUPA “dempués del pasu hestóricu de l’aprobación del Minor d’asturianu en Filoloxía ye’l momentu de siguir dando pasos na normalización del asturianu y la creación d’esti pernecesariu títulu en Maxisteriu, ye una de les prioridaes nesti campu”.

El CUPA confia amás en que la propuesta de solución pal asturianu en Maxisteriu “va volver a tener l’apoyu del Rector, Vicente Gotor”, que pal Conceyu “dende l’entamu del so mandatu vien amosando’l so apoyu a los estudios de llingua asturiana y a la normalización del asturianu na Universidá”.

La Xunta pola Defensa de la Llingua Asturiana anunció que prepara yá una campaña a favor de la creación d’una mención d’asturianu en Maxisteriu. Dellos representantes de la XPDLA aconceyaron cola directora de Maxisteriu “ensin que llegaren a nengún compromisu”.