Presentóse la campaña de normalización “El Mio Primer Vocabulariu” en Llangréu

La Casa Conceyu de Llangréu acoyó na mañana de güei xueves 2 d’abril, a les 13:00 hores, la presentación de la campaña de normalización social del asturianu: El Mio Primer Vocabulariu, vocabulariu básicu de la Llingua Asturiana n’imáxenes. L’actu presidiólu l’Alcaldesa de Llangréu, Dª. Mª Esther Díaz García; y contó cola presencia de la Conceyala Delegada de Política Llingüística, Ana Oliva Rodríguez García; el diseñador de la campaña, Alfonso Zapico y el responsable del Serviciu de Normalización Llingüística del Ayuntamientu de Llangréu, Eloy Antuña.

El Mio Primer Vocabulariu, vocabulariu básicu n’imáxenes de la Llingua Asturiana ye una campaña que busca afalar l’usu del asturianu ente los neños y neñes más mozos del conceyu y concienciar al profesoráu y a les families de la importancia d’usar l’asturianu nos primeros años de vida.

Esta nueva iniciativa del Ayuntamientu de Llangréu va empobinada a les escueles de 0 a 3 años y a los primeros cursos d’educación infantil, y consiste nun vocabulariu básicu n’imáxenes pa que los más pequeños y pequeñes vayan conociendo y familiarizándose con términos y pallabres venceyaes a la so rodiada más cercana: el so cuerpu, la ciudá, la escuela, el parque, el bañu, los colores y les formes xeométriques, y la so casa.

Esta campaña desarróllase al traviés de siete modelos diferentes de cartelos a tou color con dibuxos del prestixosu diseñador Alfonso Zapico, estos cartelos presenten un vocabulariu básicu n’imáxenes d’unos 200 términos d’usu frecuente y cercanu a lo más mozo de la casa. Los cartelos compleméntense con fiches en blancu y negru pa pintar que permiten trabayar de forma entretenida esti proyectu.

La campaña El Mio Primer Vocabulariu, vocabulariu básicu n’imáxenes de la Llingua Asturiana ponla en marcha l’Ayuntamientu de Llangréu en collaboración cola Rede de Normalización Llingüística nos Conceyos y contó con una ayuda económica de la Conseyería de Cultura y Turismu del Principáu d’Asturies.