Paz de Andrés promete iguar la especialidá de Filoloxía y l’emplegu alministrativu de la llingua si llega al Rectoráu

La candidata al Rectoráu de la Universidá d’Uviéu Paz de Andrés comunicó esti día les sos propuestes nel ámbitu de la llingua y la cultura asturianes afitando facilitar, acordies col marcu llegal, la tramitación oral y escrita n’asturianu d’asuntos que cinquen al ámbitu universitariu; promoviendo, si fuere necesario, el reciclax en llingua asturiana d’aquellos funcionarios que, ocupando puestos claves, acueyan llibremente tal posibilidá. La candidata tamién promete emplegar l’asturianu, xunto col castellán, n’ámbitos simbólicos del espaciu universitariu como la rotulación, imaxe corporativa, estructura básica de la páxina web, elementos de merchandising, publicidá, programes y folletos, espublización de libros, etc.

“El venceyamientu de la Universidá d’Uviéu col rodiu social y cultural asturianu tien una llarga hestoria y entama a lo cabero del sieglu XIX, dómina na que se fai la “Estensión Universitaria”, gracies al enfotu d’un grupu de profesores lliberales (Fermín Canella, Félix Aramburu, Aniceto Sela…) qu’aspiraben, xustamente, a conxugar l’espíritu d’universalidá propiu de la institución col respetu de les formes más xenuines de la cultura tradicional asturiana. Pues bien, la candidatura de nueso siéntese heriede d’aquellos hestóricos enfotos y quier contribuyir programáticamente a afitar la llingua y la cultura asturianes nel ámbitu universitariu”. Con estes esperanzadores pallabres entama l’apartáu que-y dedica a la llingua y a la cultura asturianes el programa ellectoral de Paz de Andrés al Rectoráu de la Universidá d’Uviéu.

Los que conformen l’equipu de Paz de Andrés dicen ser sabedores, nesti sen, que’l procesu de reforma deriváu de les direutrices que fixa l’Espaciu Européu d’Educación Superior (EEES) “ye una oportunidá inmeyorable pa encadarmar académicamente los estudios de la llingua y la filoloxía asturianes” y camienten, amás, qu’ello ye “una esixencia ineludible del actual marcu xurídicu”.

Depués de referise al Estatutu d’Autonomía d’Asturies, que nel so artículu 4 fala de promover l’usu del asturianu, el so espardimientu nos medios de comunicación y la so enseñanza; a la Llei d’Usu del Asturianu; y a los Estatutos de la propia Universidá d’Uviéu, la propuesta ellecatoral plantega les siguientes alternatives académiques en rellación cola Llingua Asturiana:

1. Los estudios de Llingua Asturiana empobinaos a la formación del futuru profesoráu qu’ha impartir esa enseñanza na estaya d’Educación Primaria inxeriránse dientro la estructura del Grau de Maestru d’Educación Primaria, n’igualdá de condiciones que’l restu de “menciones” que se contemplen.

2. Los estudios de Llingua Asturiana empobinaos a la formación del futuru profesoráu qu’ha impartir esa enseñanza na estaya d’Educación Secundaria y Bachilleratu inxeriránse dientro la estructura del títulu de Grau de la Facultá de Filoloxía que correspuenda, de mou paralelu a les posibilidaes contempladas pa otres llingües y filoloxíes de la tradición universitaria.

Y no que cinca al usu y dignificación de la llingua asturiana nel contestu universitariu camiéntase necesario llevar allante les siguientes propuestes:

1. Facilitar, acordies col marcu llegal, la tramitación oral y escrita n’asturianu d’asuntos que cinquen al ámbitu universitariu; promoviendo, si fuere necesario, el reciclax en llingua asturiana d’aquellos funcionarios que, ocupando puestos claves, acueyan llibremente tal posibilidá.

2. Anovar y afondar nos actuales alcuerdos de collaboración ente la Universidá d’Uviéu y l’Academia de la Llingua Asturiana (práutiques del alumnáu, cursos d’estensión universitaria, programes formativos pal personal universitariu, asesoramientu llingüísticu, etc.).

3. Emplegar l’asturianu, xunto col castellán, n’ámbitos simbólicos del espaciu universitariu: rotulación, imaxe corporativa, estructura básica de la páxina web, elementos de merchandising, publicidá, programes y folletos, espublización de libros, etc.

Cultura, música, teatru y lliteratura

Finalmente, en rellación a la cultura asturiana, amuésase’l compromisu por llevar darréu iniciatives como la planificación de xornaes, alcuentros y congresos que tomen como referencia aspeutos básicos de l’antropoloxía social y cultural asturiana, asina como’ l fomentu de la investigación al rodiu d’estes temátiques y el so espardimientu al traviés de coleiciones específiques, preferentemente n’asturianu, dependientes de la universidá.

Tamién se plantega la dignificación del teatru asturianu, afitando calces pa que formaciones de teatru universitariu representen obres d’autores asturianos de güei, tanto n’asturianu como en castellán. Y de la mesma forma, l’estudiu y espardimientu de les dixebraes formes de la música tradicional asturiana (xéneros musicales, instrumentos, bailles tradicionales), asina como la convocatoria d’enventos y actividaes al rodiu d’elles: esposiciones, recitales, concursos, grabaciones, etc.

Too ello ensin escaecer la dignificación de la lliteratura en llingua asturiana (poesía y narrativa, sobre too) al traviés del so estudiu, del establecimientu de concursos lliterarios, de la espublización de llibros monográficos y antoloxíes.