Paquita Suárez Coalla protagonizó’l pieslle de les XXXVI Xornaes Internacionales d’Estudiu

Paquita Suárez Coalla protagonizó’l pieslle de les XXXVI Xornaes Internacionales d’Estudiu cola ponencia cola qu’averó a los participantes a la obra d’Antón García y cola conferencia que sobre’l so llibru “La mio vida ye una novela» ufrió la profesora Marta Fernández Morales.

L’Academia de la Llingua Asturiana peslló ayeri día 9, nel salón d’actos del edificiu alministrativu (1ª planta) de la Facultá de Filosofía y Lletres de la Universidá d’Uviéu, les XXXVI Xornaes Internacionales d’Estudiu, que vinieron desenvolviéndose dende’l martes día 7.

Les sesiones entamaron a les 16 hores cola ponencia de la profesora del Borouugh of Manhattan Community College de New York (USA) Paquita Suárez Coalla titulada «Averamientu a Crónica de la lluz y la solombra, d’Antón García, dende una perspectiva biocultural». Darréu, siguieron les comunicaciones de Xulio Llaneza, Xurde Fernández, Lluis Antón González Fernández, Pablo A. Quiroga Prendes y Próspero Morán López.

Mentantu Xulio Llaneza averó a la audiencia al pallabreru de Caliao, Xurde Fernández desplicó’l modelu qu¡emplega pa trabayar por proyeutos na clas de llingua asturiana na ESO. Darréu Lluis Antón González Fernández pasó a remembrar la hestoria del teatru asturianu de la man de Telón de Fondo y les crítiques que sobro la so producción en llingua asturiana facía la prensa de la transición.

L’investigador Pablo Quiroga presentó un estudiu nel que s’afirma que’l 99% los maestros d’asturianu utiliza les Tecnoloxíes de la Comunicación y la Información para favorecer el procesu d’enseñanza de la llingua, yá sía de forma esporádica o selmanalmente. L’estudiu tamién afita qu’un 82% tien dificultá pa topar recursos online qu’utilizar na clase d’asturianu.

Les comunicaciones del día finaron cola que presentó’l profesor de la Universidá d’uviéu Próspero Morán alrodiu de la implementación de l’aplicación Menextra.com a la normalización del emplegu de llingües minoritaries nos gabinetes de comunicáción. Menextra.com ye una ferramienta con forma de Sala de Prensa Virtual (SPV) desenvuelta por un grupu d’investigación de la Universidá del País Vascu.

Les Xornaes pesllaronse cola conferencia «“Poucu, pero algu séi”. Saberes femeninos y conciencia de xéneru en La mio vida ye una novela» de la profesora Marta Fernández Morales (Universidá d’Uviéu).