Sociedá La organización moza Darréu critica la falta de concreción del Plan Integral de Mocedá d’Avilés by asturnet 29 de payares, 2005 La organización moza Darréu d’Avilés critica’l conteníu del Plan Integral de Mocedá d’esti conceyu polo que califica de ‘falta de concreción’ y d’autonomía respective a les instituciones municipales. Los nacionalistes consideren tamién que’l Plan nun apurre innovación dala respective a iniciatives anteriores. Darréu afirma que’l proyectu ta “asentáu nuna llinea continuista de lo fecho hasta esti momentu” y descalifícalu pola poca consistencia de dellos conteníos: “Danos la impresión qu’en dalguna de les sos partes esti Plan parez más propiu d’una asociacion sociocultural que tá escomenzando a trabayar en un determináu campu en vez del plan d’una conceyalia d’un ayuntamientu como’l d’Avilés”, diz la organización moza nun comunicáu. Los nacionalistes caltienen qu’a la “falta de concrección nos oxetivos y nes medíes qu’esti plan contién” súmase-y lo que califiquen de “dependencia total que tien en dalgunes de les sos fases d’otres conceyalies o instituciones”. Nesi sen pa Darréu “resulta imposible considerar seriu un plan que pensamos dende el so aniciu tá atáu de pies y manes y nun cuenta cola autonomía bastante pa desarrollase”. 29 de payares, 2005 0 FacebookTwitterPinterestEmail
Sociedá La Xunta de Galicia va aumentar la presencia de la llingua y la cultura portugueses na enseñanza by asturnet 29 de payares, 2005 La Conseyería d’Educación del gobiernu gallegu tien previsto aumentar la presencia de la llingua y la cultura portugueses nos niveles de Secundaria de los centros públicos de la comunidá vecina. L’anunciu féxolu la titular del departamentu a los representantes del Movimento en Defesa da Lingua(MDL), colectivu cultural reintegracionista, nel cursu d’una entrevista que se celebró va unos díes sobre los planes de la Xunta nesi sen. El MDL congracióse de los planes del gobiernu autonómicu de Galicia respective al idioma portugués, una llingua qu’amás de la so xermandía común col gallegu ye la del principal colectivu d’inmigrantes na comunidá vecina, onde tamién son cada vez más numberosos los ciudadanos gallegos que desenvuelven el so trabayu en Portugal. Pa los reintegracionistes “namás la inoperância del anterior gobiernu en matéria llinguística puede desplicar qu’Extremadura fuera el referente del estudiu del português nes escueles del Estáu Español, con mas de 6.000 alunos”. Más información 29 de payares, 2005 0 FacebookTwitterPinterestEmail
Sociedá Valledor lleva lasturianu al Senáu by asturnet 28 de payares, 2005 El Conseyeru de Xusticia, Seguridá Pública y Relaciones Esteriores, Francisco Javier García Valledor, intervino’l pasáu xueves 24 de payares na Cámara del Senáu del Estáu español pa informar sobre’l Plan Integral de Llucha contra los Incendios Forestales d’España, onde escomenzó la so intervención falando n’asturianu. Un xestu col que’l conseyeru quixo impulsar l’usu y normalización de la llingua. El conseyeru entamó la so intervención na Cámara del Senáu en llingua asturiana, saludando a senadores, conseyeros y ministra y valorando mui positiva la iniciativa de la comparecencia, siendo esta la primer vez na historia que pudo sintise falar n’asturianu na Tribuna del Senáu. Por esta razón, Valledor espresó’l so enfotu pa que nel futuru l’asturianu puea ser utilizáu nel Senáu como una llingua más de les qu’esisten nel Estáu español. Al acabar la sesión, los servicios del Senáu pidíeron-y al Conseyeru la transcripción de la so intervención n’asturianu pa qu’asina conste nel Diariu de Sesiones del Senáu lo que constutúi un fechu que dende la Conseyería de Xusticia valórase como históricu. 28 de payares, 2005 0 FacebookTwitterPinterestEmail
Sociedá El Teatru Toreno de Cangas debate sobre la oficialidá del asturianu by asturnet 28 de payares, 2005 El Teatru Toreno de Cangas del Narcea va ser l’escenariu, el prósimu miercoles día 30 de payares a les ocho y media la tarde, d’una charra-coloquiu entamada pol Serviciu de Normalización Llingüística de la Conceyalía de Cultura que, embaxo’l títulu “La oficialidá: un camín necesariu hacia la normalidá llingüística”, va correr a cargu del filólogu y miembru de la Xunta pola Defensa de la Llingua, Fernando Álvarez-Balbuena. Esta charra va enmarcada dientro’l programa cultural de la seronda del Teatru Torenu, que nel mes d’avientu va llevar a escena dos obres de teatru. Per una parte, el teatru va llevar la obra infantil “El soldadito de Plomo”, mentes que la compañía de Teatru Margen va representar la so versión de “La señorita Julia” d’August Strindberg, embaxo’l títulu de “Xulia”, adaptada al asturianu por Pablo Texón Castañón. 28 de payares, 2005 0 FacebookTwitterPinterestEmail
Sociedá Acábasel pazu papuntase a la Escuela de Seronda by asturnet 28 de payares, 2005 El plazu d’inscripción na Escuela de Seronda acaba esti xueves, día 1 d’avientu. Los foros d’esta Escuela, promovida polos Conseyos de la Mocedá d’Asturies, Uvieu, Xixón y Mieres, van desendolcase ente los díes 3 y 6 d’avientu nel Centru de Cultura Antiguu Institutu. Los foros van sirvir de puntu d’alcuentru y debate sobre diverses cuestiones que van tener que ver cola oficialidá de la llingua asturiana, el presente y el futuru del Sáhara y l’axenda feminista. Amás, van cellebrase tres alcuentros de mediadores del programa de reducción de riesgos “Zona clave”, d’ex voluntarios europeaos y d’educadores pa la evaluación del programa d’educación sexual en centros de menores d’Asturies y el País Vascu. Los interesaos n’apuntase a la Escuela de Seronda puen socilicar más información nel Conseyu la Mocedá de Xixón, na avenida Manuel Llaneza, 68; al travies del telefonu 985155072 y de la so páxina web. Conseyu de la Mocedá 28 de payares, 2005 0 FacebookTwitterPinterestEmail
Sociedá Diego Lorente y Rubén Vega nel Llar Solidariu dUviéu by asturnet 28 de payares, 2005 El Llar Solidariu entama pa esta selmana dos conferencies a cargu de Diego Lorente y Ruben Vega que tán entamaes por SOS Racismu Asturies y el Conceyu Abiertu respectivamente. La primera d’elles, que va tener llugar el xueves día 1 d’avientu, tocará la tema de “Ceuta y Melilla:les fronteres sur” y la segunda, que se va facer el vienres día 2, va repasar “La movilización social nel ocasu de la dictadura franquista”. El xueves día 1 d’avientu, a les ocho la tarde, el Llar Solidariu d’Uvieu entama a travies de SOS Racismu Asturies una conferencia a cargu de Diego Lorente, abogáu y portavoz de la Federación Estatal d’esta organización, que lleva por títulu “Ceuta y Melilla: la frontera sur”. Mentes que’l vienres día 2, a la mesma hora, va ser el Conceyu Abiertu quien convocoque una charra sobre “La movilización social nel ocasu de la dictadura franquista”, na que va intervenir Ruben Vega, profesor de la Universidá d’Uvieu y autor de los llibros “CCOO de Asturias en la transidición y en la democracia. La corriente sindical de izquierdas: un sindicalismo de movilización” y “Crisis industrial y conflicto social en Gijón. 1975-1995”. 28 de payares, 2005 0 FacebookTwitterPinterestEmail
Sociedá Xixón concéntrase nel Día Internacional de Solidaridá con Palestina by asturnet 25 de payares, 2005 El Comite de Solidaridá cola Causa Árabe y la Coordinadora Asturiana d’ONGD convoquen una concentración pa esti martes, 29 de payares, a les siete la tarde nel Paseu de Begoña de Xixón na que se va simular el “muru del apartheid” a partir d’un mural-cómic del artista Alberto Vázquez. Sobre un soporte móvil formáu por ocho paneles de madera, cadún reflexando una situación concreta que ta viviendo’l pueblu palestín, fechu pol artista Alberto Vázquez, collaborador d’Asturnews, los organizadores d’esta concentración quieren amosar les circunstancies que ta viviendo’l pueblu palestín. El llevantamientu del muru, la ocupación de los sos territorios, l’accesu a la tierra, el problema del agua, la situación de les muyeres, los presos y refuxaos, y la so llucha pola llibertá son dalgunos de los temes que se van ver reflexaos na concentración qu’entama a les siete la tarde nel Paseu de Begoña de Xixón. 25 de payares, 2005 0 FacebookTwitterPinterestEmail
Patrimoniu Echa a andar la Rede de Museos Etnográficos dAsturies by asturnet 23 de payares, 2005 El presidente del Principáu firmó ayeri nel Museu del Pueblu d’Asturies el conveniu de constitución de la Rede de Museos Etnográficos d’Asturies (REDMEDA), na que participen los conceyos de Xixón, Santalla d’Ozcos, Grandas de Salime, Navia, Tineu, Somieu, Grau, Quirós, Morcín, Gozón, Nava, Casu y Llanes. Al par d’esti, alcordóse un segundu conveniu de guarda y difusión del patrimoniu oral del Principáu. Areces valoró los convenios como “un pasu defenitivu pa coordinar y revalorizar los distintos museos asturianos”,y supón el desarrollu de la llei de Patrimoniu Cultural, aprobada pola Xunta Xeneral nel añu 2001. El Museu del Pueblu d’Asturies va ser el cabezaleru d’esta rede de museos, faciendose cargu de los llabores de coordinación d’actividaes, investigaciones, publicaciones y circuitos turísticos o comerciales. Poro, de los 186000 euros colos que cunta la Rede na partida pa 2006, l’ayuntamientu de Xixón aporta la metá y la otra parte cuerre por cuenta del Principáu d’Asturies. De momentu, la Rede echa a andar con un total de trece conceyos (Xixón, Santalla d’Ozcos, Grandas de Salime, Navia, Tineu, Somieu, Grau, Quirós, Morcín, Gozón, Nava, Casu y Llanes), pero les puertes queden abiertes pa que se sumen más alantre otros municipios, como pue ser el casu de Mieres, col so Museu de la Tonada. Per otra parte, tamien s’alcordó la custodia y difusión del patrimoniu oral asturianu. Sigún Areces, «l’oxetivu ye poner a disposición de los ciudadanos un material documental dispersu, pero valiosu; que nos va facer comprender meyor y aprender la tradición oral y les costumes d’Asturies. El Principáu va disponer en 2006 una partida de 32000 euros pa esta iniciativa, que va faciliar a investigadores y especialistes un fondu de vital importancia qu’abarca distintes disciplines. Rede de Museos Etnográficos d’Asturies (REDMEDA) 23 de payares, 2005 0 FacebookTwitterPinterestEmail
Sociedá La Mancomunidá del Nalón crea una fundación pa dirixir la ufierta cultural y deportiva del valle by asturnet 23 de payares, 2005 La Mancomunidá del Valle’l Nalón tien daos los primeros pasos en busca de financiación y sofitu políticu pa la constitución d’una fundación cultural y deportiva que coordine toles actividaes lúdiques y d’ociu que se desendolquen a lo llargo de los cinco conceyos de la comarca. Marcia Barreñada, presidente de la Mancomunidá, esplicó ayeri que yá se tien contactao cola conseyería de Cultura y cola obra social Cajastur pa llogar l’ayuda financiera necesaria pa fundar una asociación que coordine tolos actos entamaos nel valle, ensin perxuiciu de que cada ayuntamientu siga faciendo la so propia programación, “siguiendo’l modelu de la fundación municipal de Xixón”. Esta fundación permitiría, sigún Barreñada, dar una mayor difusión de toles actividaes organizaes nel valle. Dientro de la fundación integraríase la futura Escuela de Lletres, que dende hai unos meses vienen promoviendo l’Asociación Cauce Nalón y la Fundación Emilio Barbón. 23 de payares, 2005 0 FacebookTwitterPinterestEmail
Sociedá Memoria de los Grandes entama una serie dactos paralelos per toa Asturies by asturnet 23 de payares, 2005 La Fundación Príncipe d’Asturies, con motivu de la cellebración del homenaxe a destacaes personalidaes del sieglu XX, embaxo’l títulu de “Memoria de los Grandes”, que va tener llugar mañana a les siete y media la tarde nel Auditoriu Príncipe Felipe d’Uvieu, tien preparaos otros actos paralelos que se van desendolcar dende esta tarde hasta’l sábadu, día 26. Esta tarde, a les cinco, Isabel Falla y Yvan Nommick, director del Archivu Musical de la Fundación Manuel de Falla, van dar una conferencia nel Conservatoriu d’Uvieu titulada “Manuel de Falla en París: los sos vínculos cola vanguardia artística y musical de primeros del sieglo XX”. El vienres, 25, a les once y media la mañana, Marco Roncalli va dar una conferencia nel Seminariu Metropolitanu d’Uvieu, que lleva por títulu “Angelo Giuseppe Roncalli – Juan XXIII. De la so familia al mundu”. Nel actu participará tamien Privato Roncalli. A la una la tarde, Arun Gandhi y Tatiana Yankelevich, van tener un alcuentru nel que participarán les ONGs del Principáu, nel patiu del Museu Casa Natal de Xovellanos en Xixón. El Salón d’Actos del RIDEA acueye a les siete y media la tarde una conferencia de Duncan Sandys y Anthony Kennedy Shriver. Mentes que’l Nuevu Teatru de La Felguera va sirvir d’escenariu pal reestrenu pa nenos de la película “Luces en la Ciudad” de Charles Chaplin, en presencia de Jane Chaplin. L’últimu de los actos previstos alredor del homenaxe “Memoria de los Grandes” va tener llugar nel salón d’actos del Real Grupu Cultura Covadonga de Xixón, que consistirá nun alcuentru ente Gloria Owens y los neños. 23 de payares, 2005 0 FacebookTwitterPinterestEmail