L’estrenu n’Asturies de “Keltikhe”, la cantata compuesta por Ramón Prada pa interpretala nel Festival Intercélticu de Lorient, tien ya fecha y llugar, después de meses de preparación del proyectu. La cita va ser el prósimu 29 de xunetu nos praos del Xardín Botánicu de Xixón, dientro’l programa “Les Nueches Máxiques” que se desenvuelve a lo llargo’l veranu ufiertando velaes musicales nesti espaciu públicu. La Xoven Orquesta Sinfónica del Principáu d’Asturies, el coru Muyeres y un bon elencu de músicos tradicionales acompañarán a Prada na representación de la cantata.

La obra “Keltikhe” compúnxose especialmente pa representar en Lorient y recibió una unánime acoyida d’ésitu tanto de públicu como nel reflexu que d’ella ficieron los principales medios bretones y franceses que cubríen el festival. De magar el so autor allampiaba la idea de poder estrenar la cantata

n’Asturies, pero les dificultaes de toa mena pa un conciertu d’estes característiques, nel qu’intervienen más d’un cientu de músicos y voces foi retardando la ocasión. Agora, por fin, el públicu asturianu va tener la oportunidá d’asistir en directu a la representación de “Keltikhe” dientro de poques selmanes en Xixón.

La Xoven Orquesta Sinfónica del Principáu d’Asturies, el coru tradicional del grupu Muyeres y como solistes: Eammon Gaildubh, José Manuel y Javier Tejedor, Mari Luz Cristobal Caunedo y Marta Elola, van interpretar los seis movimientos nos que ta organizada esta pieza, y que va tar dirixida na parte musical por Guy Berrier, director musical del Festival Intercélticu de Lorient. En total más d’un cientu d’artistes enriba l’escenariu y el sofitu d’una pantalla xigante pa que’l públicu pueda siguir afayadizamente esti conciertu únicu en Xardín Botánicu de Xixón.

Dos cursos dedicaos a la improvisación musical van desenvolvese a lo llargo del mes de xunetu organizaos respectivamente pol Taller de Músicos de la Fundación Municipal de Cultura de Xixón y pola Escuela Municipal de Música de Llanera. La iniciación al llinguaxe y a les técniques del jazz, l’entamu de conciertos y jam-sessions y diverses activaes, constúin el programa d’estos talleres que van coordinar en Xixón Andreas Prittwitz y Marco Martínez en Llanera.

El cursu d’improvisación musical de Xixón va desenvolvese ente los díes 11 y 15 de xunetu y el so conteníu va xirar alrodiu de talleres instrumentales y teóricos, trabayu en grupu y clases maxistrales de los profesores invitaos a impartilu. Los encargaos de dar estos talleres van ser, como profesores residentes: Joaquín Chacón: guitarra; Joshua Kuhl: bajo y contrabaxu; Félix Morales: batería; Andy Phillips: pianu; y Andreas Prittwitz: instrumentos melódicos y coordinación didáctica. Como profesores invitados, van participar nel cursu: Carlos Carli, batería; Pablo Martín, contrabaxu; Polo Ortí, pianu y Matthew Simon, trompeta. Los talleres inclúin una serie de conciertos didácticos col siguiente calendariu: llunes11: Pablo Martín, martes 12: Carlos Carli, miércoles 13: Matthew Simon, xueves 14: Polo Ortí y viernes 15: conciertu d’alumnos.

Pel so llau, el taller de Llanera, coordináu por Marco Martínez, va impartise del 18 al 22 de xunetu na Escuela Municipal de Música del conceyu y ta orientáu esencialmente a la difusión de la música de jazz y les sos posibilidaes como llinguaxe improvisáu. Como profesores va cuntar, amás del citáu Martínez en materia de guitarra, con Alfonso Vega (baxu y clarinete), David López (trompeta y trompa), León Duarte (batería y percusión). Como profesores invitaos van participar los músicoa Xaime González Arias (pianu) y Eladio Díaz (saxos).

Los cinco finalistes del concursu de maquetes entamáu pola cadena 40 Principales y l’Institutu Asturianu de la Mocedá van decidir la so eleminatoria el prósimu domingu 3 nun conciertu que va celebrase nel recintu del festival Derrame Rock en Pravia. El xuráu del certame decidió seleccionar como finalistes a los grupos Stro y Mysterio de Xixón, Dogfight d’Uviéu, Pez Payaso de Mieres y Hermitaños del Río de Cangas del Narcea.

El xuráu del concursu de maquetes formábenlu Alberto Toyos y Miguel Angel García- 40 Principales Asturias -, Yolanda Lobo -Productora Musical – y Paula Súarez Fdez- Periodista, embaxo la presidencia de la Directora del Institutu Asturianu de la Mocedá. Los ganadores de la eliminatoria que va entamase el prósimu domingu dientro’l Derrame Rock de Pravia tienen como premiu la grabación d’un CD y una minixira de promoción del so trabayu.

El concursu de maquetes del Principáu ye un de los más clásicos d’Asturies y ta empobináu a solistes o grupos de pop-rock de xente mozo hasta los 35 años y que nunca grabaran enantes nengún discu. La cadena de radiofórmula 40 Principales y l’Institutu Asturianu de la Mocedá son los responsables de la convocatoria d’esti certame pa grupos noveles.

El I Congresu Internacional de la Gaita escomienza esti viernes 24 nel Muséu de la Sidra de Nava y va valir a lo llargo de dos díes como puntu d’alcuentru de gaiteros y especialistes del país y d’otros países como Galicia, Bretaña ya Irlanda. Nél amás del debate de les ponencies del congresu y de les respectives meses redondes, va haber amueses práctiques y en vivo de música tradicional, nes que la gaita va ser l’instrumentu protagonista. La Banda de Gaites “La Raitana” de Nava, que dirixe Flavio de Benito, ye la organizadora d’esti congresu.

La primer xornada del alcuentu va debatir na tarde d’esti viernes 24, dende les 17.00 hores, alrodiu del presente y el futuru de les bandes de gaites d’Asturies y alrodiu de los concursos destinao a esti tipu d’agrupaciones musicales. Nesti primer debate, moderáu pol director del Muséu de la Gaita de Xixón, Alfonso Fernández van intervenir Flavio Rodríguez Benito; Cándido García, director de la Banda de Gaitas Zuncurrundullo de Galicia; Luis Carlos Vecino, espertu n’actividaes turísticu-culturales; Michael Murphy, director de la banda irlandesa Carrigaline Pipe Band; y un representante de la bretona Bagad de la Kevreen-Arlé.

A les 19.30 nel mesmu Muséu la Sidra, va haber una amuesa de gaiteros mayores cola participación de los maestros Luis Montes, Eduardo “El Gaiteru Miyares” y Pepe “El Gaiteru Veriña”. Pela nueche, a les 22.00 hores na Plaza de Manuel Uría entama una nueche folk coles actuaciones del irlandés Michael Murphy, la Banda de Gaites La Raitana, la banda gallega Zuncurrundullo, la Bagad Kevreen-Arlé, La Bandina y Felpeyu.

El sábadu 25 a les 10 de la mañana sigue’l congresu internacional cola presentación y debate de ponencies de los músicos Santi Caleya, Manuel Cordero, Manuel Durán, Gustavo Eguren, Alberto Fernández, Pedro Pangua, Martín Poladura, José Manuel Tejedor, Javier Tejedor, Xuan Rodríguez y Flavio Rodríguez. Pela tarde les bandes de gaites participantes nestes xornaes desfilen peles cais de Nava y a les 20.15 na Plaza Manuel Uría ufierten un conciertu nel “Memorial Jairo García Iglesias”.

El cantante Toli Morilla lleva esta tarde al Teatru Campoamor d’Uviéu el so espectáculu “Nueche d’insomniu”, una celebración íntima coles voces de la poesía asturiana contemporánea y la música del rockeru piloñetu, que tien algamao una acoyida unánime d’ésitu en toles sos representaciones anteriores. Va ser tamién la primer vez na que la voz del poeta Mánfer de la Llera nun se sume en vivo a les de los otros autores participantes nel espectáculu. En recordanza y homenaxe al poeta de la mina la so voz sí va tar presente nuna grabación que va sonar nel so recuerdu nel escenariu del Campoamor.

Después de les sos representaciones en Xixón, Avilés y Llangréu, l’espectáculu “Nueche d’insomniu” de Toli Morilla tien esta tarde a les 20.30 la so cita col públicu uvieín nel Teatru Campoamor. Morilla pon voz y música a un garrapiellu de poemes d’otros tantos autores contemporáneos en llingua asturiana mientres una narrador va filvanando les solombres y les lluces de la so particular nueche d’insomniu. Poemes de Taresa Lorences, Xulio Vixil, Lourdes Álvarez, Mánfer de la Llera y otros nomes de la nuestra lliteratura algamen nel pulsu y la emocionada voz del cantautor piloñetu una intensidá que tien llegao al corazón del públicu en toles sos anteriores actuaciones. L’espectáculu, dirixíu y empobináu na so parte artística, pol actor Luis Lobato, va tener nesta ocasión una alcordanza especial al que foi ún de los sos más enfotaos integrantes, el poeta Mánfer de la Llera, que va tar presente nuna grabación del poema que da títulu al espectáculu y al discu homónimu de Toli Morilla: “Nueche d’insomniu”. Una nueche nel Campoamor na que s’esperen inda más sorpreses por descubrir ente la velea y l’insomniu d’ún de los montaxe más prestosos de la escena musical asturiana recién.

El conservatoriu municipal de música “Julián Orbón” d’Avilés cumple esti añu venticinco d’esistencia y con nuevos planes de futuru. Esti miércoles 21 la Casa Cultura de la villa fue escenariu d’un conciertu de conmemoranza del aniversariu nel que la orquesta del conservatoriu estrenó una obra del compositor asturianu Juan Carlos Casimiro. Ente los nuevos planes del centru municipal ta el d’entamar un cursu de postgrau d’interpretación musical en colaboración cola Universidá d’Uviéu.

El cursu de postgrau tien previsto escomenzar esti añu n’Avilés y amás de la colaboración cola institución académica asturiana, el conservatoriu municipal va cuntar col apoyu de la Orquesta Sinfónica del Principáu d’Asturies (OSPA). Dende la so fundación en 1980 esti centru docente d’estudios musicales tien desarrollao un importante llabor y ye dende l’añu 2000 conservatoriu de grau mediu y elemental. Ente los sos profesores cuéntense músicos de la OSPA y de “Los Virtuosos de Moscú”. Una de les sos actividaes más destacaes ye la celebración añal de la Selmana de Música Relixosa d’Avilés, coincidiendo cola Selmana Santa. Anguaño el centru imparte enseñanza a unos 244 alumnos y ente les sos aspiraciones ta la d’ampliar la so sé pa dar acoyida a les sos actividaes docentes nun espaciu más afayaízu.

L’auditoriu del Parque Xovellanos de Mieres acueye esti martes 21 a les 20.00 hores una gala d’homenaxe al míticu cantador Juanín. El que fuera la voz más representativa y estimada de la xeneración de los clásicos de la canción asturiana va recibir l’alcordanza de dalgunos de los intérpretes actuales de tonada na so villa natal nun actu públicu nel que la xente de Mieres quier remembrar al Almirante en plena celebración de les sos tradicionales fiestes de San Xuan.

Los cantadores José Manuel Collado, Jorge Tuya, Mª del Rosario González, José Manuel Robledo y María Sánchez (La Pastorina del Cares), van xuntase nel escenariu del auditoriu del Parque Xovellanos a participar nel homenaxe a Juanín de Mieres. Xunta ellos, acompañándolos, el gaiteru Óscar Fernandez. L’Ochote La Unión, dirixíu por Juan Rionda, grupos de baile tradicional y la Banda de Gaites Villa de Mieres van tar tamién nesta gala de recordanza al mitu de la canción asturiana.