La radio pública asturiana va empezar a emitir dende esti xueves, de 12:30 a 13:00 hores., un programa nuevu en llingua asturiana de nome “Qué facer: Informativu d’ociu y tiempu llibre n’Asturies”. L’espaciu, que tien previstu tar n’antena nun principiu nesta temporada de primavera-branu, va desenvolvese en directo con unos conteníos rellacionaos colo que s’entiende como ociu en xeneral, asina va dase tola información necesaria pa enllenar el tiempu llibre de cara al fin de selmana. Nesti sen, nun van faltar referencies a fiestes, mercaos, conciertos, representaciones teatrales, xornaes gastronómiques, lliteraries… “y too aquello que faiga más prestosu un vienres, un sábadu o un domingu”.

Asina espublicita’l programa Goxe Producciones nuna nota de prensa na que desplicaba tamién esti día que “va tar dirixíu y presentáu por Xune Elipe, contando con collaboradores como’l comentarista deportivu Miguel Fernandi o’l cocineru y asesor gastronómicu Lluis Nel Estrada, ente otros”.

La intención de “Qué facer” ye ufiertar la información de manera clara y seria, intentando dir más allá de la mera enumberación de datos, afondando nos protagonistes del ociu n’Asturies y creando afición a disfrutar d’esta tierra y del fechu cultural asturianu nel sentíu más ampliu.

La radio autonómica va retresmitir esti sábadu’l Compostela-Uviéu nel nuestru idioma y si hai díes la Xunta pola Defensa de la Llingua Asturiana (XDLA) calificaba d’un pasu alantre la puesta en marcha en RPA del primer informativu nel nuestru idioma na historia de la radio autonómica, güei la organización vuelve a felicitar a la emisora por otru pasín más: esti sábadu 5 d’abril, la radio pública va retresmitir el so primer partíu de fútbol n’asturianu. Va ser el Compostela-Real Uviéu, que se va emitir en directo a les 17:30 hores colos comentarios de Miguel Fernandi.

La Xunta pola Defensa de la Llingua Asturiana (XDLA) da la norabona a la dirección de RPA por esti pasu dau y espera qu’esta iniciativa nun quede nun casu aisláu y sía’l primeru pasu pa que vaigan faciéndose más retresmisiones.

Na organización esperen tamién, que bien llueu podamos ver partíos de fútbol, vueltes ciclistes o competiciones bolístiques nel nuestru idioma na televisión. Hai que reseñar que dende qu’empezó les emisiones, los medios de comunicación autonómicos usaron estes retremisiones pa fidelizar l’audiencia y pa consiguir la máxima difusión del idioma propiu. Otra manera, nun se pue dexar de llau qu’hasta la fecha hubo emisores como Radio Sele y Radio Vetusta que radiaron partíos de fútbol n’asturianu y que cuntaron cola bona acoyida d’audiencia y aficionaos, dalgo qu’asegura’l mesmu éxitu pa esta emisión tan esperada de RPA.

“Un avance pal asturianu en RTPA, anque con matices”, asina titula la Xunta Pola Defensa de la Llingua una nota de prensa que vieno acabante d’asoleyar esti día pa da-y la bienvenía na radio pública al estrenau del so primer informativu n’asturianu esti llunes 17 de marzu a les 13 hores. Sigún la XDLA “va dase un reblagu importante pa la presencia del asturianu nos medios de comunicación públicos”.

La Xunta diz que “nesi momentu, va empezar un boletín de noticies de diez minutos n’asturianu. Va ser el primer informativu nel nuestru idioma de la historia de RTPA, qu’amás va ufrir una visión del mundu en clave asturiana. Ye un avance pol fechu de la so importancia simbólica: que l’informativu sía nel idioma propiu ayuda a fomentar la sensación de normalidá, porque la noticia yá nun ye’l fechu d’usar la llingua asturiana sinón la información en sí”.

La Xunta pola Defensa de la Llingua Asturiana (XDLA) felicita a la dirección de RTPA por esti pasu dau, “anque tien mieu de qu’esta iniciativa tuviere muncho más que ver col interés de los mesmos trabayadores que col los encargaos de xestionar los medios públicos. La prueba ta en qu’esi mesmu día TPA estrena’l so primer informativu matinal, con dos hores de duración y dafechu en castellanu. Ehí queda una seña clara de la importancia que se da a cada idioma en tiempos, medios y promoción”.

Con too, esperen qu’esti pasu tan importante “sía’l primeru pa que vaiga medrando la duración del espaciu radiofónicu nuevu y pa que tamién, bien ceo, podamos ver informativos nel nuestru idioma na televisión”.

La Xunta pola Defensa de la Llingua Asturiana (XDLA) unvió recién a la Dirección Xeneral de Política Llingüística y de RTPA’l documentu Protocolu pa la visibilidá de la Selmana de les Lletres en RTPA, onde la organización propón diez idegues pal tratamientu d’esta xornada d’homenaxe públicu y institucional a la lliteratura escrita en llingua asturiana y gallego-asturianu nos medios públicos. Yá nel Informe sobre l’usu del asturianu en RTPA 2013, onde se facía repasu a la presencia del idioma y la cultura del país nos medios públicos y s’ufríen propuestes de meyora, la XDLA recordaba la presencia medíatica tan escasa de la Selmana na programación de la canal y la radio públiques. Sicasí, selmanes depués de dar a conocer esti documentu, la XDLA tuvo que volver a denunciar que la mesma situación se repitiera na xornada del 2013.

Por eso, la organización quier adelantase a la edición del 2014 y ufrir unes propuestes qu’ayudaríen a visibilizar les actividaes y la llingua propia na emisora. Hai que recordar que, como afita la Xunta nel comunicáu asoleyáu esti día, “RTPA ye un mediu públicu que, d’alcuerdu cola llexislación vixente, tien qu’usar y fomentar l’usu del idioma, amás d’atender al interés xeneral de la sociedá asturiana. Naide pue negar que la llingua y la cultura propia tienen interés dientro de la nuestra sociedá —na TPA sábenlo bien al ver les audiencies de los sos programes n’asturianu-. Una televisión autonómica tien que valir como mediu de tresmisión d’información y conteníos, y, al empar, como instrumentu d’integración social, de refuerciu identitariu y de normalización llingüística, amás de buscar sinerxes promoviendo la integración de les fuercies sociales, dende la iniciativa popular a la de carácter más institucional. Por eso, la Selmana de les Lletres ye un bon momentu pa que RTPA muestre’l so compromisu social”.

Darréu recuéyese’l documentu Protocolu pa la visibilidá de la Selmana de les Lletres en RTPA.:

PROTOCOLU PA LA VISIBILIDÁ DE LA SELMANA DE LES LLETRES EN RTPA

Como cada añu na primer selmana de mayu, el Gobiernu d’Asturies entama la Selmana de les Lletres Asturianes, xornada d’homenaxe públicu y institucional a la lliteratura escrita en llingua asturiana y gallego-asturianu. Sicasí, dende hai tiempu, la Xunta pola Defensa de la Llingua Asturiana (XDLA) vien criticando la falta de visibilidá de los actos nos informativos y nel restu de programación de los medios de comunicación públicos, cuando estos tendríen qu’exercer un papel fundamental en concienciar a la población sobre’l futuru del idioma d’esta tierra. Por eso, esta organización propón estes suxerencies pal tratamientu de la XXXV Selmana de les Lletres Asturianes en RTPA.

1. Los actos de la XXV Selmana de les Lletres Asturianes, tanto los entamaos poles instituciones como pola sociedá civil, han tener un bon tratamientu nos informativos de RTPA. Nun pue pasar lo que se pudo ver nel TPA Noticias del mediudía del 3 de mayu del 2013, onde nun hubo nenguna noticia que recordara a l’audiencia que yera’l Día de les Lletres Asturianes o que’l mesmu Gobiernu entamaba’l Día del Llibru y el Discu n’Asturianu. Sicasí, sí foi noticia un concursu de corte de xamón na Feria d’Abril de Piloña. Otra manera, na edición del informativu pela nueche, la manifestación pola oficialidá del asturianu —a la qu’acudieron unes 3.000 persones— y la Xunta Estraordinaria de l’Academia de la Llingua namás ocuparon un minutu al final del espaciu. Los actos qu’entamó la sociedá civil y la máxima institución llingüística del país recibieron mesmamente peor tratamientu qu’un certame gastronómicu o un accidente de coche en Burgos, por poner unos exemplos.

2. La Radio del Principáu d’Asturies (RPA) tien que ser el máximu elementu visibilizador de la música fecha na nuestra llingua, industria que mueve un bon númberu de puestos de trabayu directos y indirectos y qu’ayuda a visibilizar Asturies nel mundu –Festival intercélticu de Lorient, Festival Liet International…-. Por eso, el 9 de mayu, Día de les Lletres Asturianes, RPA tenía que facer l’actu simbólicu d’emitir namás música n’asturianu y gallego-asturianu de tolos estilos. Otra manera, habría contemplar la posibilidá d’emitir a lo llargo de la Selmana dellos conciertos de los grupos y interpretes más conocíos de la nuestra música.

3. Los actos entamaos pol Gobiernu d’Asturies y pola Academia de la Llingua como homenaxe institucional y colectivu a les lletres van celebrase ente’l 2 y el 11 de mayu con bayura d’actos (presentaciones de llibros, llectures públiques, coloquios, certámenes escolares o conciertos musicales). Por eso, TPA tien qu’emitir estes actividaes pa da-y la mayor visibilidá, yá sía en directo al traviés d’A7 o A8 o en diferío n’hores de más audiencia per A7. Nun pue pasar como los años anteriores, cuando la mayoría d’actos nin siquiera foron noticia nos informativos, dalgo que contradiz los postulaos colos que naz cualquier mediu de comunicación públicu y que pon en dulda la visibilidá que l’Alministración diz querer da-y al nuestru idioma, porque nun lu promociona nos sos propios medios de comunicación.

4. La revista d’información cultural Pieces, ún de los espacios más emblemáticos de TPA, podría dedicar dellos especiales monográficos a la Selmana de les Lletres. Ún d’ellos podía centrase en falar de la situación y la historia del cómic n’asturianu –exe central de la Selmana-, mentes qu’otru podía valir como resume de toles actividaes institucionales pa visibilizar les nuestres lletres. Tamién podría contemplase facer un monográficu pa falar de toles novedaes lliteraries y músicales publicaes por cuenta d’esta celebración.

5. Sones, ún de los programes de más audiencia de TPA, podría emitir una gala especial centrada n’actuaciones musicales de grupos y interpretes que versionaron testos d’escritores asturianos. Mesmamente, Llorienzu Novo Mier, a quien-y dedicaron la Selmana de les Lletres en 1991, dedicó una parte bien importante de la so carreta lliteraria a facer lletres de tonada. Otra manera, escritores a los que tamién se-y dedicó esta xornada, como Fernán Coronas, Andrés Solar, Manfer de la Llera o Marcos del Torniello, tamién valieron como fonte d’inspiración pa cantares de munchos grupos asturianos.

6. TPA tenía que pensar en volver a emitir nel Día de les Lletres “El rostru impenetrable”, primer película doblada al asturianu pa TPA y que xubió la media d’audiencia -tien nel so visionáu on-line cerca de 45.000 visites-. Nel so casu, tamién se podría contemplar la emisión d’otra película yá doblada al nuestru idioma. Hai que reseñar que’l 17 de mayu, Día das Letras Galegas, ye un clásicu de TVG la emisión de la película Sempre Xonxa, primer película de la historia rodada en gallegu. Otra manera, cada 11 de setiembre, Día de Cataluña, la televisión pública catalana programa Despertaferro, una de les primeres películes d’animación producíes en catalán. Ensin dulda, la emisión de cine dobláu al asturianu podría convertise nun clásicu del Día de les Lletres igual que ¡Qué prestoso ye vivir! ye un clásicu de la nuechebona televisiva.

7. Como yá solicitó la XDLA hai díes, como añadíu a la programación de la Selmana, la Dirección Xeneral de Política Llingüística y TPA teníen que collaborar nel doblaxe al asturianu de dalguna película d’animación protagonizada por un personaxe de cómic o manga (Astérix, Dragon Ball, Doraemon, Tintín, Shin-Chan…). La emisión podría enmarcase dientro de la programación d’actos de la Selmana, dedicada al cómic n’asturianu.

8. Otra manera, pa llevar la llingua asturiana a les xeneraciones más moces y al recordar que la nuestra televisión ye la única cadena europea d’una comunidá billingüe que nun emite programación pa los más pequeños na llingua propia, la TPA tien qu’emitir programación infantil de producción propia. Como propuestes, la XDLA recomienda la grabación de dalguna de les actividaes inxertes na Axenda Didáctica Escolar qu’entama’l mesmu Gobiernu asturianu y qu’incluyen teatru, títeres, monólogos, cuentacuentos y ópera. Dalguna d’estes actividaes podríen emitese n’horariu infantil y en fin de selmana.

9. Per otru llau, a lo llargo d’estos años foron munches les producciones audiovisuales que recibieron una subvención del Gobiernu d’Asturies pa fomentar l’audiovisual nel nuestru idioma. Hubo curtiumetraxes, documentales y, mesmamente, conciertos musicales. Sicasí, a pesar d’esa inversión del Executivu, estes producciones tovía nun llegaron a emitise en TPA. Por eso, la XDLA piensa qu’esta xornada sería la cuenta pa que la canal pública valiera como ferramienta pa visibilizar estes producciones.

10. Los demás espacios de RTPA, yá sían d’actualidá o d’entretenimientu, tamién tienen que valir como ferramientes pa la visibilidá de la industria cultural n’asturianu. Asina, del 2 al 11 de mayu los programes de la radio y la televisión pública teníen qu’entrevistar a escritores y músicos qu’utilicen el nuestru idioma como manera de dar a conocer los sos productos a la población. Tamién pue contemplase la emisión de reportaxes o debates sobre la situación del nuestru idioma. En definitiva, RTPA tien que convertise nuna ferramienta pa la promoción de los nuestros creadores, única manera na que nel sieglu XXI se pue mantener viva una cultura.

La XDLA pide a TPA y a Política Llingüística que se festexe la Selmana de les Lletres emitiendo una película d’animación n’asturianu. Esti añu, la xornada va tar dedicada al cómic, xéneru nel que nacieron personaxes como Astérix, Shin-Chan, Son Goku o Doraemon.

Hai díes, el Gobiernu d’Asturies anunciaba que la XXXV Selmana de les Lletres Asturianes diba tar dedicada al cómic n’asturianu. A la Xunta pola Defensa de la Llingua Asturiana (XDLA) paez-y una bona decisión: el cómic ye un xéneru que val p’averar la llingua propia a les xeneraciones más moces. Por eso, como añadíu a la programación de la Selmana, la XDLA propón a la Dirección Xeneral de Política Llingüística y a TPA que collaboren nel doblaxe al asturianu de dalguna película d’animación protagonizada por un personaxe de cómic.

Por exemplu, les televisiones agrupaes na organización FORTA, ente les que ta TPA, tienen los derechos d’emisión de les siete películes d’animación que protagonizó Ásterix y que se reponen cada poco con bien bona acoyida ente los neños y los non tan neños. Hai que recordar l’éxitu ensin precedentes que tuvo la publicación n’asturianu d’Astérix na tierra de los pictos, que vendió en pocos meses más de 2.000 exemplares. Sicasí, nun ye l’únicu personaxe de cómic, o de manga –versión xaponesa d’esti xéneru-, ente los que podría escoyer la cadena asturiana. Asina, como muestra, hai doce películes de Shin-Chan doblaes al gallegu, vascu o catalán; quince de Dragon Ball; diecisiete de Doraemón –mesmamente, TVG estrenó Doraemon e o mundo perdido’l 6 de xineru del 2014-; y ocho d’El detective Conan –la última emitida en gallegu’l 3 de xineru del 2013-.

La XDLA destaca estos personaxes pol éxitu d’audiencia de les versiones de TVG, TV3 y ETB, que siempre tuvieron perriba del 20%. La organización, como ya señaló nel Informe sobre la necesidá d’una programación infantil en TPA, vuelve a recordar que la nuestra televisión ye la única cadena europea d’una comunidá billingüe que nun emite programación pa los más pequeños na llingua propia, polo qu’actualmente nun ta cumpliendo colos sos mandaos llegales”.

Pala Xunta pola Defensa de la Llingua “nun se pue poner de sida que la emisión d’un productu asina supondría un gastu mayor pa TPA, porque la FORTA tien los derechos d’emisión d’estos productos –yá emitió delles películes infantiles nes navidaes pasaes- y porque la nuestra televisión ta dedicando una partida del so presupuestu (unos 100.000 euros) en doblaxes al castellanu fechos en Madrid. Sicasí, doblar una película d’animación de 75 minutos al asturianu podría facese con 5.000 euros. Otra manera, de facer la traducción podría encargase la mesma Dirección Xeneral de Política Llingüística o l’Academia de la Llingua Asturiana, polo que nun supondría nengún costu añadíu. Tamién hai que tener en cuenta que la emisión d’una película asina valdría pa poner los pegollos d’una industria del doblaxe. Por exemplu, l’aparición de TVG en Galicia xeneró una industria que mantién a 300 persones y a seis empreses. Nun se pue dexar de llau l’importante’l papel que podría xugar esta emisión como material pa les clases d’asturianu. P’acabar, la Xunta pola Defensa de la Llingua Asturiana recuerda qu’esti apueste pola emisión d’una película d’animación n’asturianu supondría defender la tresmisión xeneracional, dalgo pa lo que cuadra mui bien una xornada como la Selmana de les Lletres, onde la Dirección Xeneral de Política Llingüística y la TPA tienen que collaborar pa da-y la mayor visibilidá posible”.

RNE rindía güei homenaxe a Juan José Plans y recupera unu de los postreros radioteatros que protagonizó el periodista y escritor xixonés, que finó’l pasáu día 24, tuvo una dilatada trayectoria en RTVE.

Esti llunes 3 de marzu a les 02.00, en Radio Nacional RNE rendía homenaxe a Juan José Plans. Pa ello, recuperaba un radioteatro de ‘La Bella y la Bestia’ nel que l’asturianu exercía de protagonista masculín. y q’3emitise esti llunes 3 de marzu de 02.00 a 03.00, en Radio Nacional.

RNE recordaba esti llunes al periodista y escritor Juan José Plans al traviés de la emisión d’unu de los últimos programes nos que participó. Tratar d’un radioteatro de ‘La Bella y la Bestia’, realizáu nel Teatru Xovellanos de Xixón, nel que Plans interpretaba’l papel del protagonista.

Juan José Plans empezó la so carrera faciendo reportaxes nel so Xixón natal. En 1965 treslladase a Madrid, ónde empezó la so llarga trayectoria en RTVE. Darréu dirixió’l Centru Territorial de TVE n’Asturies, antes de volver definitivamente a la radio con programes históricos como ‘Sobrenatural’ y ‘Hestories’. Llogró diversos galardones per espacios realizaos pa RNE: el Premiu Nacional de Guión Radiofónicu per Ventana al futuru’ en 1972 y diez años dempués, el Premiu Ondes per España y el Españoles’. Amás, llogró’l Premiu de les Lletres d’Asturies en 2010 en roblando cuatro decenes de llibros: biografíes, relatos curtios y adaptaciones pa radiu y televisión. Finó’l pasáu 24 de febreru con 70 años.

El próximu miércoles 5 de marzu va finar el plazu pa presentar candidatures al X Premio José Couso de Liberdade de Prensa, organizado pol Colexio Profesional de Xornalistas de Galicia (CPXG), el Club de Prensa de Ferrol y la Obra Social ‘la Caixa’. Cualaquier colexáu del Colexu periodistas gallegu pue presentar candidatures a esti premiu que lleva’l nome del cámara fináu na guerra d’irak que trabayó dellos años n’Asturies.

Sigún se diz na convocatoria del Premiu, “calquera colexiado ou colexiada do CPXG ou socia ou socio do Club de Prensa de Ferrol pode entregar unha proposta. Igualmente, calquera persoa ou organización vinculada ó xornalismo está facultada para facer chegar a súa candidatura. O envío de candidaturas, con argumentación e currículum vitae, realizarase ao seguinte correo electrónico: premiocouso@xornalistas.com”.

La retirada de les subvenciones de les alministraciones públiques, cola esculpia de la cris, foi la razón esgrimida esti día pola direcición de l’Asociación cultural Parpayuela a finar con 29 años de xera nes ondes de la cuenca del Caudal, al cesar les emisiones de la radio que yeva’l so nome y que se convirtiere nuna institución nes cuenques mineres y exemplu de radio llibre n’Asturies. Parpayuela Radio, la conocía emisora de la cuenca del caudal, anunciaba con un vídiu que s’asoleya equí al llau, el cese de les sos emisiones pal prósimu 25 d’abril.

La emisora de la asociación cultural Parpayuela diz vese nesta situación tres la retirada esti añu de les ayudes que recibía de les alministraciones públiques, los conceyos del consorciu de la Montaña Central, el Conceyu Mieres y la Conseyería d’Educación y Cultura.

L’anunciu del cese d’emisiones de Parpayuela Radio fízose al traviés d’un vidiu en YouTube, onde intervienen el direutor de la radio y el presidente de l’asociación cultural desplicando la situación.

Esti xueves, dientro de la so programación tien previsto pela tarde emitir un alderique sobre la situación de los medios de comunicación.

Parpayuela Radio lleva emitiendo 29 años y bien siendo dende hai años una referencia nos conceyos de Mieres, Riosa, Morcín, Ayer, La Ribera y L.lena.