Nené Losada ye la ganadora de la primer edición del Premiu Timón, otorgáu por L’Arribada

Esta tarde va entregase’l Premiu Timón 2007, un galardón col que l’Asocación Cultural l’Arribada quier reconocer la figura y la obra d’un autor asturianu, mayor de cincuenta años, que tenga detrás una carrera lliteraria importante. Esta tarde a les 18,30 va llegar unu de los momentos más esperaos de l’Arribada 2007, la entrega del Premiu Timón y la premiada va ser Nené Losada Rico.

El premiu va entregalu’l conceyal de cultura de Xixón, Justo Vilabrille y los miembros del xuráu: Milio Rodríguez Cueto, Humberto Gonzali, Aurora García Rivas, David M. Rivas, Frichu Yustas y como secretariu ensin votu Inaciu Galán y González. Ta confirmada la presencia de l’autora y la so familia nesta entrega que va ser al mesmu tiempu un momentu d’homenaxe pa la decana de les lletres asturianes.

Nené Losada, alcuñu lliterariu de la poeta popular valdesana Carmen Losada Rico, nacida en Lluarca el 10 de payares de 1921. Tres años depués, al morrer la madre, llévenla a Sanfliz de Trevías, pa con la güela. Ellí diba vivir hasta que, con diecinueve años, casa y torna pa Lluarca, onde sigue viviendo. De formación autodidacta, amuésase como una temprana escritora de relatos y poemes en castellano. Tiempu más tarde, empezará a facelo na llingua del so llugar, utilizando formes poétiques mui cercanes a les de la poesía oral popular. La so obra tien como modelu al Padre Galo, al que conoció de neña, y emparenta, non sólo por tar escrito tamién en dialectu occidental, cola de la poeta Eva González de Llaciana; amuesa a una bona recoyedora de la lliteratura oral y capacitada asgaya pa componer con estos materiales tradicionales una obra de fondu caláu líricu y d’una prestosa eufonía. En 1992 recoyó bona parte de la so obra en versu nel volume Cantares valdesanos, n’edición de Consuelo Vega, que se completa col nuevu llibru poéticu apaecíu en 1997 col títulu de Entre apigarcios.