N’Ast énte’l Día de les Lletres Asturianes: oficialidá yá!!

Una vegada más, nesta ocasión énte la cellebración del XXXIV Día de les Lletres Asturianes, N’Ast torna a desixir la oficialidá pa la llingua asturiana. Entendemos que ye la única manera de garantizar los drechos llingüísticos de los asturfalantes, reconocíos dende cuantayá por organismos internacionales comu la UNESCO, y que constituye’l primer pasu pa una dignificación, normalización social y caltenimientu reales de la principal seña d’identidá del Pueblu Asturianu.

Otra vuelta, esta desixencia vien acompañada d’una denuncia: la del xenocidiu cultural que tan cometiendo los partíos políticos con representación na Xunta Xeneral d’Asturies al ñega-y al Pueblu Asturianu un drechu democráticu que, por embargu, sí-y reconocen a la ciudadanía d’aquellos territorios del Estáu español onde hai una llingua propia estremada del castellán.

Esta denuncia estiéndese, como nun podía ser d’otra manera, a Izquierda Xunida, organización que, magar diz defender la oficialidá del asturianu, activa plataformes de reivindicación llingüística cuandu-y interesa pañar votos y desactívales cuandu algama’l so oxetivu de tocar poder y que, amás, caltién al PSOE nel Gobiernu’l “Principado”, principal responsable de que’l Pueblu Asturianu nun pueda disfrutar d’esti drechu fundamental.

Precisamente, queremos denunciar tamién l’escasu conteníu de la Selmana de les Lletres Asturianes entamada pol Gobiernu’l “Principado”. El pasáu mes de xunetu la Conseyera d’Educación, Cultura y Deporte anunciaba toa gayaspera un cambiu de formatu al entender que l’anterior “quedó superáu”, pero lo cierto ye que nun vemos esi cambiu per dengún llau.

Poco o nada podía esperase d’un gobiernu que va tiempu que convirtió la Selmana de les Lletres Asturianes nuna cellebración puramente testimonial, ensin oficialidá y col amestáu d’esti añu de los recortes económicos pa los Servicios de Normalización Llingüística, l’ausencia de delles llinies de subvención pa la normalización social del asturianu, etc.

Por too ello, N’Ast tamién quier facer públicu’l so determín de sofitar el manifestamientu que la Xunta pola Defensa de la Llingua Asturiana convoca pal prósimu vienres 3 de mayu, con salía de la Estación del Norte d’Uviéu a les 19’30 hores, y fae un llamamientu a los sos militantes y simpatizantes a participar nel mesmu de forma activa y crítica. Camentamos que la situación d’estrema debilidá na que s’afaya la nuesa llingua obliga a xuncir toles fuercies perriba de cualesquier diferencia, nuna espresión más de la necesaria xunidá d’aición énte’l xenocidiu cultural al que ta sometíu’l Pueblu Asturianu.