Morrió Fernando Lago, pioneru del folk asturianu

El folk asturianu ta de llutu. Esti llunes pasáu finó Fernando Largo, músicu y compositor pioneru del folk asturianu. El so llabor más conocíu ye’l d’integrante del míticu grupu “Beleño”, col que grabó dos discos en 1986 y 1987. Largo foi pioneru tamién col harpa céltica y tuvo siempres venceyáu a la música, al traviés del so trabayu como productor y hosteleru, con llocales d’ambiente folk como’l chigre Cadorna, n’Uviéu.

En 1983 fundó Beleño xunto a Xuaco Amieva, sumándose dempués Pedro Pangua y Rody Herrera. Fizo la banda sonora pal pabellón d’Asturies de la Expo 92. Nos años últimos dedicóse a la producción de música na so casa y estudiu d’El Pitu, en Cuideiru.

Largo morrió a los 50 años por mor d’un bálamu. El funeral celebróse ayeri, martes, na Ilesia uvieía de San Franciscu d’Asís, na plaza de la Xesta.