Más de 10 mil persones piden nes cais d’Uviéu la oficialidá

Más de 10 mil persones, sigún los convocantes, y 6 mil persones, sigún la policía local, axuntárones esti sábadu 18 de payares n’Uviéu respondiendo a la convocatoria del Conceyu Abiertu Pola Oficialidá pa reclamar la Oficialidá de la Llingua Asturiana nel Estatutu d’Autonomía d’Asturies. Una improvisada banda de gaites protagonizó la xornada nuna manifestación nocherniega, qu’entamó a les 18:30 de la tardi dende la Estación del Norte de Renfe.

El Conceyu Abiertu pola Oficialidá convocó’l sábdu a la ciudadanía asturiana baxo’l lema “Na reforma del estatutu l’asturianu llingua oficial” y llogró una importante presencia de manifestantes nuna xornada qu’amenazó cola lluvia tol día, anque a lo postrero desendolcóse nuna tarde típica de la seronda más bona. La primbera pancarta de la manifestación llevaronla representantes de la sociedá civil asturiana como José Ramón Sariego, de l’Asociación de vecinos de Pumarín, Uviéu; Santi Caleya, músicu; Ana Maria Cano, Decana de la Faculta de Filoloxía y Presidenta de l’Academia de la Llingua; Xosé Nel Riesgo, xeógrafu y miembru de la Fundación Belenos; Celia González, del Coleutivu Muyeres; Fructuoso Pontigo Concha, Coordinadora Ecoloxísta; Maria Jesús Rodríguez, escultora, o l’escritor Xuan Bello.

La segunda pancarta del cortexu portábenla representantes de los diferentes partíos, sindicales y organizaciones que componen el Conceyu Abiertu pola Oficialidá, colos representantes d’Izquierda Xunida, Francisco Javier García Valledor y Jesús Iglesias, y el representante del Bloque por Asturies, Rafael Palacios, no cimero de la mesma. Per delantre de les pancartes del Conceyu Abiertu pola Oficialidá más de venti bandes de gaites y 200 gaiteros daben pasu al cortexu cívicu que percorrió les cais de la capital del país esixendo los sos derechos llingüísticos. La manifestación concluyó na plaza de la Catedral cola intervención, en nome de les 170 organizaciones que componen el CAO, d’Ana Vanessa Gutiérrez que lleía’l manifiestu del CAO pa dar pasu a un conciertu final nel que tocaben Santi Caleya, Carlos Rubiera y Los Gatos del Fornu.