Los Trabayadores de la Normalización avisen del peligru de que se piesllen servicios en dellos Ayuntamientos

L’Asociación de Trabayadores de la Normalización Llingüística denunció al traviés d’un comunicáu, que d’equí a final d’añu “hai peligru de que dellos servicios de normalización interrumpan la so actividá por nun llegar la sovención del Gobiernu asturianu”. El problema vien arrastrándose dende hai tiempu, porque “añu tres añu vémonos na obligación de denunciar la inestabilidá y precariedá nel funcionamientu de los servicios, por la dexadez de la Conseyería de Cultura y poles poques ganes que tienen d’estabilizar la normalización llingüística nos conceyos”.

Según l’asociación, col añu casi acabáu “la Conseyería nun especificó a los conceyos cuálos son los planes de sovención pal añu qu’entra, polo que cada añu la situación ye más abegosa, nun hai seguranza de nada y yá nin siqueir faen promeses”.

El comunicáu afonda tamién nel fechu de que “ta faciéndose un intentu por dexar al idioma fuera de xuegu, puesto que l’asturianu perdió la poca presencia institucional qu’algamare, nun hai un Plan de Normalización, nun hai campañes de sensibilización social y nun se cumple la toponimia oficial”.