Los Premios Príncipe ufren delles conferencies na Universidá

Como vien faciéndose dende va dellos años y coincidiendo cola entrega de los Premios Príncipe d’Asturies , la Universidá d’Uviéu collabora cola Fundación na organización de diversos actos que tienen como marcu la Universidá. La primer de les charres va dala l’equipu d’arqueólogos del xacimientu de los guerreros de Xián. La presentación va correr al cargu d’Avelino Gutiérrez, director del Departamentu d’Hestoria de la Universidá d’Uviéu y va actuar de moderadora Taciana Fisac, directora del Centru d’Estudios d’Asia Oriental de la Universidá Autónoma de Madrid. L’actu va tener llugar a les ocho la tarde nel Salón d’Actos de Caxastur (cai Mendizábal, 3. Uviéu).

La segunda sedrá la de Zygmunt Bauman y Alain Touraine, Premiu de Comunicación y Humanidaes, embaxo’l títulu “Vides paraleles. Retos comunes”. Sedrá’l miércoles 20 d’ochobre, a les ocho la tarde, nel Paraninfu del Edificiu Hestóricu de la Universidá, moderando la mesa Daniel Innerarity, filósofu y ensayista.

D’otra banda, el Premiu de Les Lletres, Amin Maalouf, va tar el xueves 21 a les 12 hores nel Aulariu A del Campus d’Humanidaes d'”El Milán”. L’autor va tener un alcuentru con estudiantes cola moderación de José María Fernández Cardo, Director del Departamentu de Filoloxía Angloxermánica y Francesa.

L’actividá cabera va ser la protagonizada polos Premiu d’Investigación Científica y Técnica, David Julius, LindaWatkins y Baruch Minke, que’l mesmu xueves, a les 19 hores nel Paraninfu del Edificiu Hestóricu de la Universidá van dar una charra sobre los retos de les sos investigaciones titulada “El dolor como retu pa la Humanidá”. Pal alderique va cuntase cola moderación del neurocientíficu Carlos Belmonte Martínez.

Les actividaes son de baldre y hasta enllenar l’aforu de los espacios.