Los Premios Príncipe acueyen 200 candidatures de 34 países

Más de 200 candidatures procedentes de 34 países de los cinco continentes fueron propuestes a los Premios Príncipe d’Asturies d’esti añu, na so vixésima octava edición. El plazu de presentación de candidatures finó a les 14.00 hores d’esti vienres día 14.

Nes próximes selmanes la Fundación va recibir les candidatures presentaes n’embaxaes y consulaos españoles nel estranxeru. De la mesma manera, los integrantes de cada xuráu van poder realizar les sos propies propuestes con una antelación mínima de dos díes a la fecha fixada pa la constitución del correspondiente Xuráu. El plazu de presentación de candidatures pa los galardones de Deportes y Concordia fina’l 25 de xineru, ya que los conceyos d’estos Xuraos van tener llugar en setiembre. La mayor parte de les candidatures fueron recibíes na sede de la Fundación por fax, corréu electrónicu o postal, o serviciu de mensaxería.

Más de 150 personalidaes, expertes en caúna de les materies, van integrar los ocho xuraos –ún por cada Premiu–, que ta previsto entamen los sos conceyos n’Uviéu a primeros del mes de mayu, según informaron fontes de la institución al traviés d’una nota prensa.L’actu d’entrega de los Premios Príncipe d’Asturies va celebrase na seronda nel Teatru Campoamor d’esta ciudá, nuna ceremonia presidida pol Príncipe d’Asturies.