Los carlistes asturianos rinden homenaxe a Xuan María Acebal

Les Xuventúes Carlistes d’Asturies entamen esti sábadu 1 d’abril un homenaxe al poeta Xuan María Acebal énte la so tumba nel cementeriu de San Salvador d’Uviéu. Javier Cubero, voceru del Partíu Carlista d’Asturies y l’académicu Lluis Xabel Álvarez, ‘Texuca’, van remembrar la figura y la obra del poeta en llingua asturiana, autor de ‘Cantar y más cantar’ y traductor d’Horacio al nuestru idioma.

Xuan María Acebal (1815-1895) fue un destacáu militante carlista, una causa política pola que tuvo d’esiliase a Francia. Como escritor n’asturiano, amás de tornar delles odes horacianes en versiones que merecieron los emponderamientos ente otros del ortodoxu Menéndez y Pelayo, destacó pol procuru d’una llingua lliteraria basada nel estándar central y por ser el primer poeta en buscar les posibilidaes líriques del nuestru idioma. Enantes d’esti homenaxe de los carlistes asturianos la so tumba nel cementeriu uvieín de San Salvador recibió l’homenaxe de la tertulia Zimbru, un grupu d’escritores de la segunda xeneración del Surdimientu agrupaos alrodiu la revista del mesmu nome y ente los que taben Antón García, Xuan Bello, José Luis Piquero, Ramón Lluis Bande, Fonsu Martín y Pablo Antón Marín Estrada, ente otros.

L’actu de les Xuventúes Carlistes escomienza a les 13,00 hores y amás de les intervenciones de Javier Cubero y Lluis Xabel Álvarez, va entamase una ufierta floral y el gaiteru Marcos Fernández aportará la solemnidá de la so música al homenaxe a Acebal, que dellos autores consideren el primer escritor modernu en llingua asturiana.