Llangréu acueye l’homenaxe d’Andecha Astur a Belarmino Tomás

Un añu más, la organización política Andecha Astur entama, coincidiendo col cabudañu de la Revolución d’Ochobre, un actu n’alcordanza de Belarmino Tomás Álvarez, que fuera presidente del Tercer Comité Revolucionariu en 1934 y presidente del Conseyu Soberanu d’Asturies y Lleón en 1937. L’actu va tener llugar énte la so tumba nel cementeriu de Pando, en Llangréu, el martes 12 d’ochobre a les 13 hores.

Ta prevista una pequeña intervención política acompañada de la ofrenda d’un ramu de lloréu y de la interpretación de delles pieces a la gaita. Tien confirmada la so asistencia Rafael Fernández Tomás, ñetu del homenaxeáu y fundador del Partíu Socialista de los Trabayadores en México, país onde, amás, foi diputáu federal.

Belarmino Tomás morrió en 1950, polo qu’esti añu, espliquen dende Andecha Astur “l’actu d’homenaxe tien un calter especial yá que se cumplen 60 años de la muerte del cabezaleru asturianu”.