L’IES Salinas celebra unes xornaes sobre les persones refuxaes

A lo llargo d’esta selmana van desenvolvese nel IES Salinas les xornaes ¿Refuxaes o Refugaes? sobre exiliu, migración, asilu y derechos humanos. Los oxetivos d’esti eventu son sensibilizar y formar dende delles perspectives a la comunidá escolar sobre la problemática de les persones exiliaes y, en concreto, de les refuxaes siries. Pa ello, el programa inclúi una serie d’actos que van dende charres y esposiciones, a xuegos online, amás d’unacampaña recoyida d’alimentos, ropa y enseres.

Anque la mayor parte de les actividaes programaes tán dedicaes a la crisis actual de les refuxaes siries n’Europa, nes xornaes tamién se van analizar les migraciones forzoses dende un puntu de vista diacrónicu y sincrónicu: l’éxodu que sufren millones de persones anguaño nel mundu y l’exiliu asturianu na Guerra Civil española.

Los actos escomiencipiaron el llunes cola presentación de dos esposiciones: Refugio contra barbarie y Refugiados, bienvenidos, cedíes respectivamente por CODOPA, FACC y CMPA, y pol grupu Eleuterio Quintanilla, AcciónenRed y Accem. Na primera d’elles, Refugio contra barbarie, diez profesionales del diseñu y la ilustración dan rienda suelta a la so creatividá n’otros tantos cartelos col oxetivu de promover actitúes solidaries pa coles persones refuxaes per parte de la sociedá asturiana y prevenir, asina, actitúes racistes y xenófobes. Na segunda, Refugiados, bienvenidos, al traviés de 17 paneles informativos abórdase l’actual crisis de refuxaes: les causes que xeneren esta situación, les consecuencies de la guerra sobre la población civil, les polítiques europees de fronteres pesllaes, asina como’l derechu llegal d’asilu qu’asiste a quien ve la so vida en peligru.

A lo llargo la selmana distintes ponentes, dende estremaes perspectives y metodoloxíes, van abordar la cuestión de les persones desplazaes forzosamente. Asina, Sara Leal y Borja Llorente van compartir la so esperiencia como voluntarios nos campos de refuxaes siries de Ritsona y Moira, en Grecia; la organización non gubernamental ACCEM va facer que l’alumnáu se ponga na piel d’una refuxada pente medies d’un xuegu de rol online; l’historiador Pablo Martínez Corral xunto col alumnu del centru Daniel Ramos (sobrín-nietu de Galán Ramos, presu asturianu en Mathaussen) van falar sobre l’exiliu na comarca avilesina tres la Guerra Civil; pa rematar, Nacho González va ofrecer una charra-alderique sobre la situación del país con mayor númberu de desplazaes internes, Colombia.

Too ello, complétase con una campaña de recoyida de ropa, alimentos y enseres que tien como destín los campamentos de refuxaes siries. Dende’l IES Salinas vamos collaborar, gracies a la implicación del alumnáu, les families y el profesoráu, col llabor que vien desenvolviendo la organización Red de Madres sin Red y facer llegar la nuestra solidaridá a estes persones
desplazaes forzosamente y que s’alcuentren nes puertes d’Europa nuna situación de desamparu.