Les Xornaes de Lliteratura infantil de SMRA ufren talleres de llectura

Otru añu más, les Xornaes de Lliteratura Infantil y Xuvenil de Samartín van ufrir na cuenca’l Nalón talleres de llectura en llingua asturiana.

Coincidiendo cola décimocuarta edición de les Xornaes de Lliteratura Infantil y Xuvenil que se celebren nel mes de payares en Samartín del Rei Aurelio, la Oficina de Normalización Llingüística del conceyu, en colaboración coles asociación culturales Bocina Nalón y Reciella Malory y la Oficina d’Información Xuvenil vuelven a ufiertar unos talleres d’animación a la llectura colos que se nagua por averar la lliteratura asturiana a les xeneraciones más moces.

Estos talleres, que cuenten con una perbona acoyida, n’años pasaos tuvieron dedicaos a la narrativa y al cómic. Esti añu’l xéneru escoyíu ye la poesía, y pa ello va cuntase cola participación de los monitores de Bocina Nalón y la collaboración especial del escritor Pablo Rodríguez Medina, que van desendolcar estremaes actividaes rellacionaes cola poesía visual, los caligrames o la escritura automática, too ello col enfotu d’entretener y educar, consiguiendo que los neños y neñes participantes garren actitúes positives hacia la llectura.

Los talleres son de baldre y tán destinaos a edades ente 4 y 13 años. P’apuntase hai que llamar a Bocina Nalón, al teléfono 984112239 o unviar un corréu a bocina@bocina.org. El plazu pa facelo termina’l 3 de payares. Les sesiones van tener llugar los vienres 6, 13 y 27 d’esi mesmu mes na Casa de la Mocedá de Sotrondio a les 18 h., con una duración d’hora y media cada sesión. Amás, l’últimu día nesti mesmu centru va tener llugar la inauguración d’una esposición onde se van recoyer los trabayos de los participantes.