Les Noticies cumple diez años con un conciertu nel Filarmónica

El periódicu selmanal Les Noticies cumple diez años d’existencia y por eso quier celebrar la efemeride con un conciertu espectáculu güei a les ocho la tarde nel Teatru Filarmónica d’Uvieu. Nel actu, al que va poder entrase de baldre, van participar dellos de los meyores músicos del país y representativos d’esti últimu deceniu nel panorama musical asturianu, como son Mariluz Cristóbal Caunedo, Carlos Rubiera, Dual, Toli Morilla, Tuenda, Anabel Santiago, Dulcamara y Nacho Vegas.

Xunto col conciertu nel Teatru Filarmónica, con motivu del decimu aniversariu, Les Noticies va editar un númberu especial del selmanariu que se va repartir ente tolos asistentes a la gala, amás de distribuise nos quioscos el vienres 26 de mayu. Esti númberu de Les Noticies quier ser un periódicu especial en conteníos y repercusión social, cuntando con más del doble de les páxines habituales, y faciendo repasu a lo que foron estos diez años pa la vida d’Asturies y del mundu, tanto nos aspectos políticos, como nos sociales y culturales.