Uviéu apuesta por ampliar la representación de les ONGDs nel Conseyu Municipal de Cooperación al Desenvolvimientu

El Conseyu Municipal de Cooperación al Desenvolvimientu quedó constituyíu esta tarde tres una primer xunta na que tomaron parte representantes de tolos grupos políticos.

La conceyala de Cooperación al Desenvolvimientu, Marisa Ponga, plantegó la intención del equipu de gobiernu de revisar y modificar el reglamentu pa llograr una mayor participación, respondiendo tamién  al pidimientu de delles organizaciones y de la Coordinadora de ONG’s.

Nesti primer alcuentru diose cuenta del presupuestu pa 2016 que xube a 801.897,35 € y realizóse la siguiente propuesta de distribución de fondos: Un 5% p’actividaes de sensibilización; un 13% p’Ayuda humanitaria y d’emerxencia, lo que supon destinar más fondos a esti capítulu pa poder faer frente a la crisis humanitaria de los refuxaos y les emerxencies; un 14,5% pa cooperación directa (Conveniu con Asociación d’Amigos del Sahara; con Médicus Mundi;  y pa proyectos en Santa Clara) y un 67,5% pa la convocatoria de subvenciones, lo que supon destinar 513.337 €, que representa una xubida respecto al añu anterior del 2,3% .

Presentáronse les bases de la convocatoria de subvenciones que’l so conteníu nun difier al respective de les del añu pasáu, sacante nel importe destináu.