L’asturianismu llamenta la muerte del escritor Xaviel Vilareyo

Esti martes 19 a los 48 años morría de forma prematura Xaviel Vilareyo y Villamil, profesor y escritor n’asturianu y gallego-asturianu, activista cultural y promotor d’iniciatives tan granibles como’l Festival de Cine Asturianu, Conceyos d’escritores y delles otres actividaes que caltuvo a lo llargo de munchos años. Ñacíu en Mieres del Camín en 1967 foi un activu escritor y activista cultural, poniendo en marcha numberoses iniciatives siempres comprometíes col usu del asturianu. Iniciativa pol Asturianu daba conocer esti día la noticia al tiempu que llamentaba fondamente’l sucesu.

Destaca ente’l so llabor más d’una docena de llibros y una bayurosa producción d’artículos, tocando cásique tolos xéneros: poesía, narrativa, ensayu, teatru… Collaborador en numberoses revistes, participó dende los años noventa del grupu d’escritores que definió como “Xeneración del compromisu”, y ente 2005 y 2012 organizó cuatro ediciones de la Xunta d’Escritores Asturianos n’Uviéu.

Talamente como describen na nota de prensa d’Iniciativa, “nel ámbitu audiovisual grabó dellos curtiometraxes y entamó dos festivales, el de Cine Asturianu y el de Cine LGBT d’Asturies, que con delles ediciones al llombu taben yá afitaos ente les feches culturales habituales nel país. En 2009 asoleyó la ‘Historia del cine asturianu’, una de les obres más completes sobre’l cine fechu n’Asturies o nel esterior por asturianos, que se sumó a otros ensayos nos que reivindicó, non ensin polémica, dellos territorios del vieyu Reinu d’Asturies”.

Dende Iniciativa pol Asturianu llamentaben esta perda, “la d’una persona comprometida cola so llingua, y acompañamos a la familia y collacios de Vilareyo nel dolor”. La so despidida va ser güei, 20 de mayu, a les 16:30 hores na Ilesia de los Cuatro Apóstoles d’Uviéu.