L’Academia emplaza a los partíos parlamentarios a qu’escueyan un modelu d’oficialidá

L’Academia de la Llingua Asturiana espón nel editorial del últimu númberu de la so revista Lletres Asturianes el resultáu de les xestiones entamaes pola institución colos estremaos axentes políticos y sociales alrodiu de la propuesta llanzada nel Día de les Lletres de 2005 pola so presidenta Ana Cano. Arriendes de la propuesta de consensu y de la situación actual l’Academia emplaza a los grupos políticos presentes na Xunta Xeneral a que seyan ellos los qu’escueyan el modelu de redacción del artículu onde se reconoza la oficialidá nel nuevu Estatutu.

Pa la másima institución llingüística asturiana esti modelu d’oficialidá había ser “el que más s’axuste a les condiciones sociolóxiques” del país. Piden tamién que seyan los partíos parlamentarios los que “digan hasta ónde quieren llegar coles midíes normalizadores, a qué ritmu y con qué fases” y arriendes d’ello a que “pongan techu a la dotación presupuestaria pa facer efeutiva la normalización y que too ello lo faigan velando siempre pa que se llogre l’aceutación social y política de les midíes normalizadores”, afirma l’Academia que califica les sos propuestes de realistes y moderaes.

La institución llanza una clara andanada crítica contra les fuerces polítiques que n’Asturies nieguen la posibilidá de reconocer la cooficialidá y defenden nel Congresu de los Diputaos de Madrid iniciatives parlamentaries pa pidi-y al Gobiernu qu’afale la diversidá idiomática del estáu, n’alusión a la proposición non de llei presentada pol grupu socialista nel Congresu apocayá y na que se caltenía que la oficialización de les diverses llingües del estáu contribuía a fomentar la convivencia llingüística.

El mensaxe central del editorial de Lletres Asturianes insiste na idea ya formulada con abonda reiteración pola Academia de qu’una Llei de Normalización de la Llingua Asturiana “ha desendolcar los aspeutos básicos de la puesta en práutica de la oficialidá.