L’Academia denuncia una estratexa d’espansionismu galleguista nel Navia-Eo

L’Academia de la Llingua Asturiana ofreció esti mediudía una rueda de prensa na so sé d’Uviéu pa denunciar la esistencia d’una estratexa de galleguización de la fastera de Navia-Eo desenvuelta dende les instituciones de la comunidá vecina. La prósima celebración d’unes xornaes en Ribadeo pa potenciar la presencia del idioma gallegu n’Asturies ye visto pola másima institución llingüística como un pasu más nesta estratexa que l’Academia califica de “intolerable”.

La presidenta de la institución académica, Ana Cano, pidió esta mañana a la Xunta Xeneral un pronunciamientu pa reafirmar l’asturianidá llingüística y cultural del Navia-Eo. Nel comunicáu lleíu na rueda de prensa pola presidenta de l’Academia enumérense les sucesives acciones empobinaes dende les instituciones autonómiques gallegues, como les pretensiones sobre’l territoriu d’Entrambasaguas conteníes’aprebación nel Plan Xeral de Normalización Lingüística o la promoción de la candidatura del patrimoniu oral galaico-portugués a la UNESCO, incluyendo conceyos asturianos. Pa la institución llingüística asturiana toes estes acciones respuenden a una estratexa espansionista promovida por sectores nacionalistes gallegos y sofitada poles instituciones polítiques y culturales de la comunidá vecina.

L’Academia denuncia la tibieza del gobiernu asturianu énte esos intentos espansionistes y les posiciones calteníes dende’l departamentu de Política Llingüística de la Conseyería de Cultura asina como en dellos sectores del movimientu asturianista respective a la realidá llingüística y cultural del Navia-Eo. L’Academia refuga nel so comunicáu lo que califica de “inconsciencia de dellos sectores asturianos, bien minoritarios, qu’emburriaos per un análisis infantil y desesperáu tán dispuestos a renunciar a l’asturianidá llingüística y cultural del Navia-Eo porque sopelexen, con incalificable inxenuidá, que nel momentu en que’l gallegu fuere oficial n’Asturies, nun habría más posibilidá que, “de rebote”, declarar tamién la oficialidá del asturianu” y llamenta arriendes “qu’estes posiciones se caltengan dende ámbitos más o menos averaos a la Oficina de Política Llingüística del Principáu d’Asturies”.

La másima institución asturiana en materia llingüística considera la situación creada poles pretensiones d’espardimientu del idioma gallegu per Asturies de “mui grave” y anuncia que va ponese dende agora mesmo en contactu colos grupos parlamentarios presentes na Xunta Xeneral pa tresllada-yos el so esmolecimientu y recorda-yos la necesidá d’oficializar la llingua asturiana en tol territoriu de la nuestra comunidá, asina como del gallegu-asturianu nes fasteres del Navia-Eo. L’Academia, a la postre, reafirma’l so compromisu tutelar coles fasteres afectaes poles pretensiones galleguistes y anuncia que va sofitar toles movilizaciones ciudadanes que s’entamen pa defender l’asturianidá d’Entrambasaguas.