La Xunta pola Defensa de la Llingua denuncia’l mal funcionamientu de los servicios de normalización

La Xunta pola Defensa de la Llingua responsabilizó al Principáu del pieslle de les oficines de normalización de Mieres y Samartín del Rei Aurelio y de la mala situación del restu de servicios que funcionen na comunidá. Según informa la Xunta nun comunicáu, la Conseyería de Cultura ta incumpliendo tolos alcuerdos algamaos n’ochobre colos trabayadores d’estos servicios.

“Los Servicios de Normalización formen parte de la propaganda institucional a la hora de vender la so confianza pola normalización del asturianu, pero la Conseyería de Cultura nun va más allá nel so apoyu”. La Xunta denuncia esta situación precisamente cuando haz poco que la Conseyería anunció l’apertura de más servicios de normalización na zona del Navia-Eo y en Llaviana.

Segun denuncia’l colectivu nel comunicáu esta situación ta derivada de la falta d’un conveniu seriu pa los trabayadores d’estos centros. “A estes altures desconozse siquiera con que presupuestu se cuenta pa da-yos continuidá a los Servicios qu’entá siguen funcionando”. Asimesmo, dende la XPDL pídese l’reapertura de les oficines ya’l cumplimientu efectivu de lo que prometió la Conseyería de Cultura.