La Xunta Moza paraliza l’actividá nos centros educativos del país

Los institutos asturianos vivieron ayer una xornada de fuelga en defensa de la presencia del asturianu nel sistema educativu. La fuelga convocada pola xunta Moza recibió’l sofitu d’organizaciones como Mocedá d’Andecha Astur, Mocedá d’Izquierda Asturiana, el Conceyu Universitariu pol Asturianu, los Colectivos de Mocedaes Comuinistes o la Xuventú Asturianista.
El siguimientu de la fuelga n’Uviéu foi del 85% del alumnáu, destacando los centros de la Iría y Ventanielles y l’IES de Cerdeño. En Xixón instituos como’l Nº1 o el Rosario Acuaña tuvieron paros totales. Nel restu del país el siguimientu de la fuelga foi d’alredor del 80%.

Dende la Xunta Moza denuncien que les direcciones de dalgunos centros “ficieron lo posible por facer fracasar la movilización”, fixando esámenes pa esta data o en dalgunos casos puntuales unviando circulares a les families.