La Xunta de Galicia fai una declaración institucional de sofitu a la candidatura galaico-portuguesa a la UNESCO

El gobiernu de la Xunta de Galicia firma una declaración institucional en sofitu de la candidatura del patrimoniu oral gallegu-portugués a Obra Maestra del Patrimoniu Oral Inmaterial de la Humanidá. L’executivu que preside’l socialista Touriño col apoyu del Bloque Nacionalista Galego (BNG) respalda asina oficialmente una iniciativa pendiente de resolver por un xuráu internacional de la UNESCO y qu’inclúi ente los territorios culturales de fala galaico-portuguesa delles fasteres d’Asturies.

Na declaración de la Xunta de Galicia afírmase que “la cultura oral común galego-portuguesa conforma un ampliu abanicu de manifestaciones lliteraries, musicales y etnográfiques, enraigonaes na tradición y que perviven inda n’amplies zones del territoriu comprendíu ente’l Douro y el Cantábricu como expresiones d’una continuidá histórico-cultural que se remonta a más de 2.000 años” y considera que “esta comunidá cultural milenaria ta perdiendo vitalidá y munches manifestaciones que la constitúin tán en peligru de desaparición”.

El pronunciamientu de la Xunta ye’l primeru que fai oficial el nuevu gobiernu de coalición PSdG-BNG a la candidatura que ya cuntó col respaldu del anterior executivu del PP, presidíu por Manuel Fraga. En medios prósimos a los promotores de la candidatura celebrábase esta declaración como un impulsu necesariu de les másimes instituciones gallegues nun momentu nel que la UNESCO ta a piques de decidir si concede la consideranza de Obra Maestra del Patrimoniu de la Humanidá a la cultura y la fala galaico-portuguesa.

El testu de la candidatura preentada pola asociación cultural Ponte…nas Ondas inclúi dellos territorios pertenecientes a Asturies y nos últimos tiempos faise manifiestu’l rechazu qu’esta y otres iniciatives de promoción del idioma gallegu nel esterior tan provocando nos conceyos del Navia-Eo. Nos últimos díes diversos medios asturianos ficiéronse ecu del disgustu bultable qu’espresen alcaldes de la zona. Tamién l’Academia de la Llingua Asturiana fizo públicu’l so rechazu a les pretensiones de promocionar el gallegu en territoriu política y culturalmente asturianu y la organización nacionalista Andecha Astur presentó diverses iniciatives nos conceyos d’Entrambasaguas col fin de que solicitasen a la UNESCO la so esclusión de la candidatura promovida por Galicia y Portugal.