La Xunta concede los premios Andrés Solar a L’Entregu CF pola so aportación a la normalización y la madreña purpurina a Javier Fernández

Sigún asoleyaba esta selmana la web de Xunta Pola, el xuráu de los Premios Andrés Solar decidió’l pasáu miércoles 26 d’avientu otorgar el Pegollu de la edición correspondiente al añu 2007 al equipu de fútbol L’Entregu C.F. pola so aportación a la visualización y normalización de la llingua asturiana nel ámbitu del deporte. Asinamesmo’l xuráu valoró mui positivamente la voluntá firme del equipu na defensa del nome verdaderu del so llugar, L’Entregu, y la so difusión en tou tipu de medios deportivos y xeneralistes.

D’otra banda, decidióse entregar la versión negativa d’esta XXIII edición de los Premios Andrés Solar, la Madreña Purpurina, al secretariu xeneral de la FSA-PSOE Javier Fernández Fernández. El xuráu destaca nel merecedor del antipremiu la so trayectoria d’ataques y esibiciones de prexuicios contra la llingua asturiana y contra los derechos llingüísticos de los asturianos y asturianes.

La ceremonia d’entrega de premios va facese’l prósimu sábadu 19 de xineru, a partir de les siete de la tarde, nel Salón d’Actos del Antiguu Institutu Xovellanos de Xixón. Nos prósimos díes, van dase a conocer les intervenciones y actuaciones qu’acompañarán a la ceremonia asina como de la espicha que, como cada añu, va facese al acabu del actu.