La sociedá civil asturiana solidarizase col CSOA La Madreña

La sociedá civil asturiana ta afitando nestos díes la so solidaridá dafechu col proyeutu del COSA La Madreña pa evitar so pieslle xudicial. Na Sociedá Cultural Xixonesa manifiesten públicamente esti día el s refugu a la orde de desagospiar el CSOA La Madreña, qu’emitió l’Audiencia Provincial dempués d’almitir el recursu de la empresa inmobiliaria SEDES y la Xunta Pola Defensa de la Llingua fai otru tantu al tiempu animar a tola xente a participar na manifestación que’l CSOA LA Madreña tien convocada pa esti miércoles 21 a les 20 h y nel restu d’actividaes reivindicatives programaes pa estos díes.

L’edificiu abandonáu de l’antigua Conseyería de Sanidá n’Uviéu foi ocupáu en payares del 2011 por activistes del 15-M col consentimientu y la collaboración de los vecinos del barriu de Pumarín. La finalidá nun yera otra que rescatar esi espaciu de la especulación urbanística y da-y un usu comunitariu. Dende entós La Madreña soi convirtiéndose nun centru de referencia social y cultural, xenerándose servicios y actividaes comunitaries d’interés vecinal frente a una alministración pública caracterizada por una ufierta cultural elitista y los retayos nos servicios sociales; nun llugar d’alcuentru y alderique, nel que colectivos de tou tipu y condición teníen les puertes abiertes; ya inclusive nel nuevu epicentru de la protesta popular n’Asturies, contribuyendo al impulsu de movilizaciones tan significatives como la Marea Ciudadana del 23-F o el movimientu Asturies en Marcha de sofitu a les Marches de la Dignidá del 22-M.

Agora una decisión xudicial pretende anular tou esti patrimoniu social ya entregar l’edificiu a los intereses amorales de la especulación. Por mor d’ello, dende la Sociedá Cultural Xixonesa sofiten la manifestación convocada pa esti miércoles y animamos a toles ciudadanes y a tolos ciudadanos d’Asturies a participar nella.

La Xunta pola Defensa de la Llingua Asturiana y Xunta Moza, peo so lláu, espresaben pela mañana “la so fonda solidaridá con toles persones y colectivos que vienen desarrollando estos años el proyectu del CSOA La Madreña. Llabor que pudo visualizase ente la xente de la ciudá d’Uviéu a traviés miles d’actividaes culturales y reivindicatives. En bien d’eses actividaes tenemos participao y de la mesma manera, tenemos siempre atopao una gran recepción a les nuestres propuestes. Consideramos al CSOA La Madreña un proyectu indispensable pa Uviéu y Asturies”.

Por eso, queríen “animar a tola xente a participar na manifestación que’l CSOA LA Madreña tien convocada pa esti miércoles 21 a les 20 h y nel restu d’actividaes reivindicatives programaes pa estos díes”.

Reciella, l’ascoación de families pol asturianu tamién quixo xuntase esti día al movimientu civil de sofitu con una nota de prensa: “Nesti momentu difícil pa La Madreña, na que paez que’l so futuru ta cuestionáu por una orden xudicial de desagospiu, dende les families que facemos parte de Reciella queremos manda-yos el nuestru sofitu y solidaridá. Hai unos meses l’espaciu de La Madreña acoyó a Reciella pa facer una de les nueses actividaes nes que participen families, daqué que-yos agradecemos fondamente. Dende la nuesa asociación prestaríamos rescamplar especialmente’l llabor social que La Madreña ta faciendo pa da-yos espacios y ámbitos de trabayu y visibilidá a colectivos como’l nuestru que nun cuenten con grandes medios. Poro, esperamos una rectificación que faiga que La Madreña pueda siguir cumpliendo la so función como hasta ágora”.