La reivindicación de la #Oficialidá algamó 1.600.000 impresiones en Twitter sigún un seguimientu d’Iniciativa

El pasáu vienres 9 de mayu la sociedá asturiana salió a la cai por mor del Día de les Lletres Asturianes pa reclamar la oficialidá del asturianu y les redes sociales sofitaron esa xornada col hashtag #Oficialidá que sigún un estudiu de l’asociación Iniciativa pol Asturianu algamó más de 1.600.000 impresiones en Twitter, amosando la vitalidá de la reclamación llingüística n’Asturies. La reivindicación de la oficialidá del asturianu vien siendo unu de los temes centrales nesta campaña a les elecciones autonómiques.

Dende Iniciativa pol Asturianu presentaben esti xueves un informe de la repercusión d’esta reivindicación en Twitter, onde la etiqueta o hahstag #Oficialidá convirtióse en viral, llegando a más de 500.000 persones y con un total 1,6 millones d’impresiones (númberu de vegaes que los tuits fueron vistos).

Esti informe preparáu por Rubén Llames, secretariu d’Iniciativa pol Asturinau amuesa como se llanzaron tuits dende tol estáu español con especial incidencia dende Madrid, Cataluña y Euskadi, per esi orde, magar que tamién hebo actividá dende Inglaterra, Estaos Xuníos, Brasil, Chile, Méxicu y Venezuela. Pue destacase qu’inclusive hebo tuits reclamando la Oficialidá dende la islla africana de Santu Tomé.

El tuit más destacáu foi’l de la cantante Paula Rojo, que con más de 120.000 siguidores reclamó la #Oficialidá dende la so cuenta.

Dende Iniciativa pol Asturianu dicen tar “mui satisfechos col protagonismu que tuvo y sigue teniendo nestos díes de campaña la reivindicación de la #Oficialidá del asturianu. La organización, que ye la entidá que tuitea n’asturianu con más siguidores na rede (2.630 siguidores), tuvo nel puestu númberu dos nel númberu de tuits fechos cola etiqueta #Oficialidá, nun top 10 nel que tamién apaecen dellos miembros de la organización”.

Pa Iniciativa pol Asturianu esta importante repercursión de la reivindicación de la oficialidá nun fai más que confirmar la demanda social cada vegada mayor pa que se reconoza a la llingua asturiana col estatus d’oficial, “única forma de consiguir que se ponga en marcha un camín de midíes que garantice la supervivencia del asturianu y el reconocimientu de los drechos de los falantes d’asturianu”.