La Procuradora Xeneral recibió namás una quexa alredor del asturianu en 2009

La Procuradora Xeneral ta acabante presentar el so Informe Añal 2009, y anque tovía nun pue consultase na web, una visita a la mesma, amuesa que nel apartáu de Resoluciones, y mirando l’añu 2009, namás una de trés (cuatro según l’informe), presentaes dientro del epígrafe “Cultura, Bable y Deportes” , taba venceyada directamente col asturianu, y yera nesti casu una quexa pola falta d’usu de la toponimia de oficial de Llangréu na señalítica.

Por embargu, les quexes y otres actuaciones solicitaes n’otros campos algamen un total de 332, ente les que destaquen función pública, con 43 quexes, y temes rellacionaos coles alministraciones de conceyos, qu’algama les 34 solicitúes.

La Procuradoría Xeneral ye una institución tradicional recuperada y qu’equival a la figura del Defensor del Pueblu. Según espresa na so web ye una institución independiente y garantista, creada pola Xunta Xeneral del Principáu d’Asturies pa la defensa de los derechos y llibertaes reconocíos nel Títulu I de la Constitución, y pa velar pol cumplimientu de los principios xenerales establecíos nel artículu 9 del Estatutu d’Autonomía del Principáu d’Asturies. Ye una Institución qu’investiga quexes, denuncia abusos, formula encamientos, realiza actuaciones de mediación y propón cambeos de les normes.

Sicasí, la Procuradora Xeneral ye nestos momentos la política socialista María Antonia Fernández Felgueroso, hermana de l’alcaldesa de Xixón, y hasta la so llegada a esti puestu, miembru del PSOE y conceyala d’esta formación nel mesmu conceyu. Pela so parte, l’axuntu ye Noel Zapico Rodríguez, tuvo venceyáu al PP y foi Director Xeneral na dómina del gobiernu popular n’Asturies.

Consulta les quexes presentaes na web de la Procuradora Xeneral