La Nintendo Switch yá supera en vientes a la Wii U

La Nintendo Switch yá supera en vientes a la Wii U depués de namái que diez meses no que fai albidrar l’éxitu de la nueva videoconsola xaponesa.

En payares de 2012, la empresa multinacional xaponesa Nintendo llanzó al mercáu la Wii U. La videoconsola de sobremesa pertenecía a la octava xeneración y presentóse como la directa sucesora de la Wii, qu’a día de güei sigue siendo la consola más esitosa de la empresa nipona con aprosimao 101,6 millones d’unidaes vendíes en tol mundu. Sicasí, l’acoyida pol públicu nun foi nin tanto la esperada y les resultancies llevaron a Nintendo a anunciar el cese de la so producción en xineru de 2017.

Y ye que, a fecha de 31 d’avientu de 2017, como amuesa esti gráficu de Statista, la Wii U vendiera un total de 13,56 millones d’unidaes. Una cifra que supon, amás, el volume de vientes más baxu dientro d’esti tipu de videoconsolas, siendo superáu inclusive por modelos yá obsoletos como la Nintendo 64 o la Super Nintendo.

Sicasí, la Nintendo Switch, una videoconsola híbrida (de mesa y portátil) disponible nes tiendes dende marzu de 2017, vendió en solu diez meses más de 14 millones d’unidaes. Esto ye, en tan curtiu periodu de tiempu yá superó en 1,2 millones les vientes rexistraes pola Wii U en cinco años. Paez que Nintendo dio cola fórmula para oldear el fracasu collecháu pola que yera la so sesta videoconsola de sobremesa dende la so fundación en 1889.