La mocedá d’Avilés cunta con un espaciu pa compartir esperiencies

Escribir un relatu de cómo la población infantil y adolescente d’Avilés y de toa Asturies ta viviendo estes circunstancies estraordinaries de confinamientu nes cases pola declaración del estáu d’alarma ye l’oxetivu del blogue que punxo en marcha l’asociación Los Glayus col respaldu del Institutu Asturianu para l’Atención Integral a la Infancia y a les Families y de los grupos municipales de Participación Infantil y Adolescente, ente ellos el d’Avilés.

La creación del blogue Memoria Infantil  d’un Estáu d’Alarma n’Asturies, tien la finalidá de siguir dando impulsu a la Participación Infantil y Adolescente d’Asturies mientres el periodu d’aislamientu al empar que xenerar un puntu d’alcuentru onde los mozos y moces pueden aprovechar el tiempu que pasen nes sos cases reflexando nesti blogue les sos impresiones, reflexones, formes de pasar el tiempu, la vida en familia, la comunicación dende casa con amigos y familiares.

Al traviés del corréu blogasturiaspiagmail.com  recoyerán les aportaciones de los mozos y moces que quieran contribuyir coles sos esperiencies a la ellaboración d’esa memoria colectiva nestos tiempos de confinamientu contra’l coronavirus.

La pretensión ye qu’esti espaciu sirva por que dende Avilés y los demás conceyos vaigan mandándose y compartiendo propuestes, idees ya iniciatives coles cualos los neños y neñes y adolescentes puedan siguir participando dende casa y siguir compartiendo les sos opiniones, siendo escuchaos, compartiendo idees creatives que sirvan pa entretenenos, prestanos, aprender, contribuyir al bien común y pa siguir participando dende casa.